Home_Page_Advt
Home_Page_Advt
Home_Page_Advt
Breaking News

ಬೀರಮಲೆ ಅಭಿವೃದ್ಧಿಗೆ ದೊಡ್ಡ ಯೋಜನೆ – ನೀಲಿ ನಕಾಶೆ ಸಿದ್ಧತೆ : ಸಾಲುಮರದ ತಿಮ್ಮಕ್ಕ ವೃಕ್ಷೋದ್ಯಾನ ಉದ್ಘಾಟಿಸಿದ ಶಾಸಕ ಸಂಜೀವ ಮಠಂದೂರು

ಚಿತ್ರ: ಕೃಷ್ಣಾ ಪುತ್ತೂರು

  • ಪ್ರಕೃತಿ ದೇವರ ರೂಪದಲ್ಲಿ ಉಳಿಯಬೇಕಾದರೆ ನಮ್ಮ ಕೊಡುಗೆ ಅಗತ್ಯ – ಸಂಜೀವ ಮಠಂದೂರು
  • ಸಾಲು ಮರದ ತಿಮ್ಮಕ್ಕನ ದಾರಿಯಲ್ಲೇ ನಮ್ಮ ನಡೆಯಿರಲಿ – ರಾಧಾಕೃಷ್ಣ ಬೋರ್ಕರ್
  • ಹಸಿರಿನಿಂದ ಆರೋಗ್ಯಕರ ವಾತಾವರಣ ನಿರ್ಮಾಣ – ಮೀನಾಕ್ಷಿ ಶಾಂತಿಗೋಡು
  • ಎಲ್ಲೋ ಹೋಗಿ ಸುತ್ತುವ ಬದಲು ನಮ್ಮದೇ ಪರಿಸರದಲ್ಲಿ ಸುತ್ತಿ – ಶಕುಂತಳಾ ಶೆಟ್ಟಿ
  • ಪರಿಸರ ಉಳಿಸುವುದು ನಮ್ಮ ಕರ್ತವ್ಯ – ಎ.ವಿ ನಾರಾಯಣ
  • ಪುತ್ತೂರಿನ ವೃಕ್ಷೆದ್ಯಾನ ಮಾದರಿಯಾಗಲಿದೆ – ಬ್ರಿಜೇಶ್ ಕುಮಾರ್
  • ಮಕ್ಕಳು, ಹಿರಿಯರು ಪ್ರಕೃತಿಯೊಂದಿಗೆ ಸಂಭ್ರಮಿಸಬಹುದು- ಎನ್.ಸುಬ್ರಹ್ಮಣ್ಯ ರಾವ್

ಪುತ್ತೂರು: ಕಾರಣಿಕ ಪುರುಷರಾದ ಕೋಟಿ ಚೆನ್ನಯರ ಜನ್ಮಸ್ಥಳ ಪಡುಮಲೆ ಅಭಿವೃದ್ಧಿಯಂತೆ ದೊಡ್ಡ ಮಟ್ಟದ ಯೋಜನೆಯಲ್ಲಿ ಬೀರಮಲೆ ಅಭಿವೃದ್ಧಿಯನ್ನೂ ಮಾಡಲಾಗುವುದು. ಈ ನಿಟ್ಟಿನಲ್ಲಿ ಮುಂದಿನ ಬಜೆಟ್‌ನಲ್ಲಿ ಅನುದಾದನ ಇರಿಸುವ ಚಿಂತನೆ ನಡಸಲಾಗುವುದು. ಅದಕ್ಕೆ ತಕ್ಕಂತೆ ಈಗಲೇ ನೀಲಾ ನಕಾಶೆ ಸಿದ್ದತೆ ಮಾಡಬೇಕಾಗಿದೆ ಎಂದು ಶಾಸಕ ಸಂಜೀವ ಮಠಂದೂರು ಹೇಳಿದರು.

ಕರ್ನಾಟಕ ಅರಣ್ಯ ಇಲಾಖೆಯ ನೇತೃತ್ವದಲ್ಲಿ ಬೀರಮಲೆಯಲ್ಲಿ ಸಾಲುಮರದ ತಿಮ್ಮಕ್ಕ ವೃಕ್ಷೋದ್ಯಾನವನ್ನು ಅ.16ರಂದು ಉದ್ಘಾಟಿಸಿ, ಅಲ್ಲೇ ಬೀರಮಲೆ ಟ್ರೀಪಾರ್ಕ್‌ನಲ್ಲಿ ನಡೆದ ಸಭಾಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು. ಬೀರಮಲೆ ಬೆಟ್ಟದ ಕುರಿತು ಅರಣ್ಯ ಇಲಾಖೆ ಕಾಳಜಿ ಇಟ್ಟು ಕೊಂಡು ಮತ್ತು ಸಾಲುಮರದ ತಿಮ್ಮಕ್ಕನನ್ನು ನೆನಪಿಸುವ ಕೆಲಸವನ್ನು ಅರಣ್ಯ ಇಲಾಖೆ ಮಾಡಿದೆ. ಶಾಸಕನಾಗಿ ಬೀರಮಲೆಯ ಅಭಿವೃದ್ಧಿಗಾಗಿ ನಾನೇನು ಮಾಡಬೇಕೋ ಅದನ್ನು ಮಾಡಲು ಬದ್ಧನಿದ್ದೇನೆ. ಇಲ್ಲಿ ಇನ್ನೊಂದಷ್ಟು ವ್ಯವಸ್ಥೆಗಳು ಬೇಕು. ಎಲ್ಲಾ ವ್ಯವಸ್ಥೆಗಳಾದಾಗ ಬೀರಮಲೆ ರಾಜ್ಯದ ರಾಷ್ಟ್ರದ ಭೂಪಟದಲ್ಲಿ ಗುರುತಿಸುವ ಜಾಗ ಆಗುತ್ತದೆ. ಈ ನಿಟ್ಟಿನಲ್ಲಿ ಪ್ರವಾಸೋದ್ಯಮ ಇಲಾಖೆಯ ಸಚಿವ ಸಿಟಿ ರವಿ, ಧಾರ್ಮಿಕ ಇಲಾಖೆ ಸಚಿವ ಕೋಟ ಶ್ರೀನಿವಾಸ ಪೂಜಾರಿ ಅವರಲ್ಲಿ ಈಗಾಗಲೇ ಒಂದು ಹಂತದಲ್ಲಿ ಮಾತುಕತೆ ನಡೆಸಲಾಗಿದೆ. ಮುಂದಿನ ಬಜೆಟ್‌ನಲ್ಲಿ ಬೀರಮಲೆ ಬೆಟ್ಟಕ್ಕೂ ಪ್ರವಾಸೋದ್ಯಮದ ನೆಲೆಯಲ್ಲಿ ಬಜೆಟ್ ಇರಿಸಲಾಗುವುದು ಎಂದರು.

ಪ್ರಕೃತಿ ದೇವರ ರೂಪದಲ್ಲಿ ಉಳಿಯಬೇಕಾದರೆ ನಮ್ಮ ಕೊಡುಗೆ ಅಗತ್ಯ:
ಪ್ರಕೃತಿಯನ್ನು ಉಳಿಸಲು, ಬೆಳೆಸಲು ರಾಜ ಯಾವ ರೀತಿಯ ಕೊಡುಗೆಯನ್ನು ಕೊಡಬಹುದೋ ಅದೇ ರೀತಿಯ ಕೊಡುಗೆಯನ್ನು ಒಬ್ಬ ಅನಕ್ಷರಸ್ತ ಮಹಿಳೆ ಕೂಡಾ ಕೊಡಬಹುದು ಎಂದು ತಿಮ್ಮಕ್ಕ ತೋರಿಸಿಕೊಟ್ಟಿದ್ದಾರೆ. ಅಂತಹ ತಾಯಿಯ ಹೆಸರನ್ನು ಇಟ್ಟುಕೊಂಡು ಪುತ್ತೂರು ಜನತೆಗೆ ಒಂದು ಆದರ್ಶ ಪ್ರಾಯವಾದ ಒಂದು ವೃಕ್ಷೆದ್ಯಾನವನ್ನು ಅರಣ್ಯ ಇಲಾಖೆ ಕೊಟ್ಟಿದೆ. ಅದಕ್ಕೆ ಅಭಿನಂದನೆ ಸಲ್ಲಿಸುತ್ತಿದ್ದೇನೆ ಎಂದ ಅವರು ಬೀರಮಲೆ ಪ್ರಕೃತಿಯನ್ನು ಒದಗಿಸಿಕೊಟ್ಟು ಪುತ್ತೂರು ಹೇಗಿರಬೇಕೆಂದು ಬಹಳ ಹಿಂದೆಯೇ ನಿರ್ಧರಿಸಿದ ನಿವೃತ್ತ ತಹಶೀಲ್ದಾರ್ ಕೋಚ್ಚಣ್ಣ ರೈ ಅವರನ್ನು ನೆನಪಿಸಿದರು. ಇವತ್ತು ಅರಣ್ಯ ಇಲಾಖೆಯವರ ಸಹಕಾರದಿಂದ ಸ್ವಚ್ಛಂದವಾದ ಪರಿಸರ, ಮನಸ್ಸಿಗೆ ಮುದ ನೀಡುವ ವಾತಾವರಣ, ವ್ಯಾವಹಾರಿಕ ಜಂಜಾಟದಿಂದ ದೂರು ಇದ್ದು, ಪ್ರಕೃತಿಯನ್ನು ಆಸ್ವಾಧಿಸುವ ತಾಣ ಸಾಲು ಮರ ತಿಮ್ಮಕ್ಕ ವೃಕ್ಷೆದ್ಯಾನ ಆಗಲಿದೆ ಎಂದು ಸಂಜೀವ ಮಠಂದೂರು ಹೇಳಿದರು. ನಾವು ಪ್ರಕೃತಿಯನ್ನು ಆರಾಧನೆ ಮಾಡಿದರೆ ಪ್ರಕೃತಿ ನಮ್ಮನ್ನು ಉಳಿಸುತ್ತದೆ. ಅದೇ ರೀತಿ ಪ್ರಕೃತಿ ದೇವರ ರೂಪದಲ್ಲಿ ಉಳಿಯಬೇಕಾದರೆ ನಮ್ಮ ಕೊಡುಗೆ ಅಗತ್ಯ ಎಂದರು. ಯಾವುದೋ ಮೊಬೈಲ್‌ಗೂ, ಯಂತ್ರಕ್ಕೂ ಸೀಮಿತ ಪಟ್ಟು ಜೀವನ ನಡೆಸುವ ಈ ಅವಧಿಯಲ್ಲಿ ನಮ್ಮ ಬದುಕು ಒಂದು ಥರಾ ಏಕಾಂಗಿಯಾದ ಸಂದರ್ಭದಲ್ಲಿ ಸಮಾಜಮುಖಿಯಾಗಿ ಪ್ರಕೃತಿದತ್ತವಾಗಿ ಚಿಂತನೆ ಮಾಡುವ ಅವಕಾಶ ಅರಣ್ಯ ಇಲಾಖೆ ಮಾಡಿ ಕೊಟ್ಟಿದೆ ಎಂದು ಶಾಸಕ ಸಂಜೀವ ಮಠಂದೂರು ಹೇಳಿದರು.

ಸಾಲು ಮರದ ತಿಮ್ಮಕ್ಕನ ದಾರಿಯಲ್ಲೇ ನಮ್ಮ ನಡೆಯಿರಲಿ:
ತಾ.ಪಂ ಅಧ್ಯಕ್ಷ ರಾಧಾಕೃಷ್ಣ ಬೋರ್ಕರ್ ಅವರು ಮಾತನಾಡಿ ಸುಂದರವಾದ ವೃಕ್ಷೆದ್ಯಾನ ನಿರ್ಮಾಣ ಆಗಿದೆ. ಸ್ವಚ್ಛ ಪುತ್ತೂರು ಆಗಬೇಕೆನ್ನುವ ನಿಟ್ಟಿನಲ್ಲಿ ಇದರೊಳಗೆ ಮುಂದೆ ಯಾವುದೆ ಪ್ಲಾಸ್ಟಿಕ್ ಪ್ರವೇಶಿಸದಂತೆ ಎಚ್ಚರ ವಹಿಸಿ. ಪ್ರಕೃತಿ ಒಂದಷ್ಟು ನಮಗೆ ಒಳಿತನ್ನು ನೀಡುವಾಗ ಅದಕ್ಕೆ ಪೂರಕವಾಗಿ ನಡೆಯಬೇಕು. ಹಾಗಾಗಿ ಸಾಲು ಮರದ ತಿಮ್ಮಕ್ಕನ ದಾರಿಯಲ್ಲೇ ನಮ್ಮ ನಡೆಯಿರಲಿ ಎಂದು ಅವರು ಹೇಳಿದರು.

ಹಸಿರಿನಿಂದ ಆರೋಗ್ಯಕರ ವಾತಾವರಣ ನಿರ್ಮಾಣ:
ಜಿ.ಪಂ ಅಧ್ಯಕ್ಷೆ ಮೀನಾಕ್ಷಿ ಶಾಂತಿಗೋಡು ಅವರು ಮಾತನಾಡಿ ಹಸಿರಿನಿಂದ ಆರೋಗ್ಯಕರ ವಾತಾವರಣ ನಿರ್ಮಾಣ ಆಗುತ್ತದೆ. ಈ ನಿಟ್ಟಿನಲ್ಲಿ ಪ್ರಕೃತಿಯನ್ನು ಆರಾಧಿಸೋಣ ಎಂದರು.

ಎಲ್ಲೋ ಸುತ್ತುವ ಬದಲು ನಮ್ಮದೇ ಪರಿಸರದಲ್ಲಿ ಸುತ್ತಿ:
ಮಾಜಿ ಶಾಸಕಿ ಶಕುಂತಳಾ ಶೆಟ್ಟಿಯವರು ಮಾತನಾಡಿ ವೃಕ್ಷೆದ್ಯಾನ ಯೋಜನೆಗೆ ಅನುದಾನ ನೀಡಿದ ಆಗಿನ ಅರಣ್ಯ ಸಚಿವ ರಮಾನಾಥ ರೈ ಅವರಿಗೆ ಮೊದಲು ಅಭಿನಂದನೆ ಸಲ್ಲಿಸಿದರು. ಇವತ್ತು ಉತ್ತಮ ರೀತಿಯ ವೃಕ್ಷೆದ್ಯಾನ ನಿರ್ಮಾಣ ಆಗಿದೆ. ಮುಂದೆ ಜನರು ಎಲ್ಲೋ ಹೋಗಿ ಸುತ್ತುವ ಬದಲು ನಮ್ಮದೇ ಜಾಗದಲ್ಲಿ ಸುತ್ತಿ ಪ್ರಕೃತಿ ಆಸ್ವಾಧಿಸಬೇಕು ಎಂದ ಅವರು ಗುಡ್ಡೆಯ ತುದಿಯಲ್ಲಿ ಸನ್ ಸೆಟ್ ನೋಡಲು ವ್ಯವಸ್ಥೆ ಕಲ್ಪಿಸಬೇಕು ಮತ್ತು ನನ್ನ ಆಸೆಯಂತೆ ಬೀರಮಲೆಯಿಂದ ಡಾ.ಶಿವರಾಮ ಕಾರಂತರ ಬಾಲವನಕ್ಕೆ ರೋಫ್ ವೇ ಮಾಡಬೇಕು ಆಗ ಬೀರಮಲೆ ಬೆಟ್ಟ ಇನ್ನಷ್ಟು ಪ್ರಸಿದ್ದಿಯಾಗಲಿದೆ ಎಂದರು.

ಪರಿಸರ ಉಳಿಸುವುದು ನಮ್ಮ ಕರ್ತವ್ಯ:
ಬೀರಮಲೆ ಬೆಟ್ಟ ಅಭಿವೃದ್ಧಿ ಸಮಿತಿ ಅಧ್ಯಕ್ಷ ಪ್ರೊ.ಎ.ವಿ.ನಾರಾಯಣ್ ಅವರು ಮಾತನಾಡಿ ಬೀರಮಲೆ ಅಭಿವೃದ್ಧಿ ಪಡಿಸುವ ನಿಟ್ಟಿನಲ್ಲಿ ನಿವೃತ್ತ ತಹಶೀಲ್ದಾರ್ ಕೋಚಣ್ಣ ರೈ ತುಂಬಾ ಶ್ರಮ ಪಟ್ಟಿದ್ದಾರೆ. ಈ ಕಾರ್ಯಕ್ರಮದಲ್ಲಿ ನಮ್ಮನ್ನು ಸೇರಿಸಿಕೊಂಡರು. ಸುಮಾರು ೪೮ ಎಕ್ರೆ ಸ್ಥಳವನ್ನು ಕಾಪಾಡಿಕೊಂಡು ಬಂದಿರುವ ನಮಗೆ ಅದನ್ನು ಅಭಿವೃದ್ಧಿ ಪಡಿಸಲು ಸಂಪನ್ಮೂಲ ಕೊರತೆ ಕಂಡು ಬಂದಾಗ ನಾವು ಅರಣ್ಯ ಇಲಾಖೆಯ ಮೊರೆ ಹೋದೆವು. ಆಗಿನ ವಲಯ ಅರಣ್ಯಾಧಿಕಾರಿ ಕಾರ್ಯಾಪ್ಪ ಅವರು ಉತ್ತಮ ಸಲಹೆ ನೀಡಿ ಬೀರಮಲೆ ಅಭಿವೃದ್ಧಿಗೆ ಯೋಜನೆ ರೂಪಿಸಿದರು. ಆಗಿನ ಶಾಸಕರು ಅದಕ್ಕೆ ಸಚಿವರಲ್ಲಿ ಶೀಫಾರಸ್ಸು ಮಾಡಿದರು. ಅದಾದ ಬಳಿಕ ಯೋಜನೆ ಕೈಗೂಡಿದೆ. ಈ ಸಂದರ್ಭದಲ್ಲಿ ಉಪವಲಯ ಅರಣ್ಯಾಧಿಕಾರಿಗಳಾದ ಸಂಗಮೇಶ್ ಮತ್ತು ಶಿವಾನಂದ ಅವರು ಉತ್ತಮ ಕೆಲಸ ಮಾಡಿದ್ದಾರೆ. ಈ ಹಿಂದೆಯೇ ಲಯನ್ಸ್ ಮತ್ತು ರೋಟರಿ ಸಂಸ್ಥೆ ನೀಡಿದ ಜೋಕಾಲಿ ಜಾರು ಬಂಡಿಗಳನ್ನು ಅಭಿವೃದ್ಧಿ ಪಡಿಸಲಾಗಿದೆ. ಅದೇ ರೀತಿ ನಿತಿನ್ ಪಕ್ಕಳ ಅವರ ಬಳಗದಿಂದ ಸುಮಾರು ೧೦೮ ಅಶ್ವತ್ಥ ಮರದ ಗಿಡಗಳನ್ನು ನೆಡಲಾಗಿದೆ. ಇದೀಗ ಅರಣ್ಯ ಇಲಾಖೆಯೂ ಸುಮಾರು ೩ಸಾವಿರ ವಿವಿಧ ಜಾತಿಯ ಹಣ್ಣಿನ ಗಿಡಗಳನ್ನು ನೆಟ್ಟಿದ್ದಾರೆ. ಒಟ್ಟು ಬೀರಮಲೆ ಅಭಿವೃದ್ಧಿ ಕಂಡಿದೆ. ಇದನ್ನು ಉಳಿಸುವುದು ನಮ್ಮ ಕರ್ತವ್ಯ ಎಂದರು.

ಪುತ್ತೂರಿನ ವೃಕ್ಷೆದ್ಯಾನ ಮಾದರಿಯಾಗಲಿದೆ:
ಅಪಾರ ಪ್ರಧಾನ ಮುಖ್ಯ ಅರಣ್ಯ ಸಂರಕ್ಷಣಾಧಿಕಾರಿ ಬ್ರಿಜೇಶ್ ಕುಮಾರ್ ಅವರು ಮಾತನಾಡಿ ಅರಣ್ಯ ಇಲಾಖೆಯ ವತಿಯಿಂದ ಪ್ರತಿ ವಿಧಾನಸಭಾ ಕ್ಷೇತ್ರದಲ್ಲೂ ವೃಕ್ಸೋದ್ಯಾನ ನಿರ್ಮಾಣ ಆಗಲಿದೆ. ಆದರೆ ಪುತ್ತೂರಿನ ವೃಕ್ಷೆದ್ಯಾನ 3ನೇಯದಾಗಿದ್ದು ಇದು ಇತರ ಕಡೆಗೆ ಮಾದರಿಯಾಗಲಿದೆ ಎಂದರು.

ಮಕ್ಕಳು, ಹಿರಿಯರು ಪ್ರಕೃತಿಯೊಂದಿಗೆ ಸಂಭ್ರಮಿಸಬಹುದು:
ಪುತ್ತೂರು ಉಪವಿಭಾಗದ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ಎನ್.ಸುಬ್ರಹ್ಮಣ್ಯ ರಾವ್ ಅವರು ಪ್ರಾಸ್ತಾವಿಕವಾಗಿ ಮಾತನಾಡಿ ಸಮುದ್ರ ಮಟ್ಟದಿಂದ ಬರೋಬ್ಬರಿ 55 ಅಡಿ ಎತ್ತರದಲ್ಲಿರುವ ಬೀರಮಲೆ ಅಭಿವೃದ್ಧಿಯಾಗಬೇಕು, ಇದೊಂದು ಪ್ರವಾಸಿತಾಣವಾಗಬೇಕು ಎಂಬ ನಿಟ್ಟಿನಲ್ಲಿ ಬಹಳಷ್ಟು ಮಂದಿ ಪ್ರಯತ್ನ ಪಡುತ್ತಲೇ ಬಂದಿದ್ದಾರೆ. ಆದರೆ ಅರಣ್ಯ ಇಲಾಖೆ ವತಿಯಿಂದ ರೂ. 60 ಲಕ್ಷ ವೆಚ್ಚದಲ್ಲಿ ಉತ್ತಮ ವೃಕ್ಷೆದ್ಯಾನ ಮಾಡಬೇಕೆಂದು ಯೋಜನೆ ರೂಪಿಸಿ ಕಾರ್ಯಗತಗೊಳಿಸಲಾಗಿದೆ. ಮಕ್ಕಳಿಂದ ಹಿಡಿದು ಹಿರಿಯರ ತನಕ ಎಲ್ಲರೂ ಇಲ್ಲಿ ಪ್ರಕೃತಿಯೊಂದಿಗೆ ಬೆರೆತು ಸಂಭ್ರಮಿಸಬಹುದು. ಮರದ ಮಾದರಿಯ ಪ್ರವೇಶ ದ್ವಾರ ಪ್ರವಾಸಿಗರನ್ನು ಆಕರ್ಷಿಸುವಂತಿದೆ. ಮಕ್ಕಳಿಗಾಗಿ ಜೋಕಾಲಿ, ಜಾರುಬಂಡಿ, ನೆಟ್‌ವಾಕ್, ರೋಪ್‌ಸ್ಲೈಡಿಂಗ್ ಅಳವಡಿಸಲಾಗಿದೆ. ೧೬ ವರ್ಷದೊಳಗಿನ ಮಕ್ಕಳು ರೋಪ್‌ವೇ ಮೇಲೆ ನಡೆದಾಡಬಹುದು. ಇದಲ್ಲದೆ ಕಾರಂಜಿ, ತಾವರೆಕೊಳ, ಯೋಗ ಕುಟೀರ ಗಮನ ಸೆಳೆಯುತ್ತದೆ. ಬೆಟ್ಟದ ಮೇಲಿದ್ದ ಹಳೆಯ ಕಟ್ಟಡವನ್ನು ದುರಸ್ತಿಗೊಳಿಸಲಾಗಿದ್ದು ಇದನ್ನು ಮಾಹಿತಿ ಸಂವಹನ ಕೇಂದ್ರವಾಗಿ ಅಭಿವೃದ್ಧಿಪಡಿಸಲು ಉದ್ದೆಶಿಸಲಾಗಿದೆ. ಪ್ರವಾಸಿಗರಿಗೆ ಅನುಕೂಲವಾಗುವ ರೀತಿಯಲ್ಲಿ ಶೌಚಾಲಯ ವ್ಯವಸ್ಥೆ, ಆಸನ ವ್ಯವಸ್ಥೆ ಇತ್ಯಾದಿಗಳನ್ನು ನಿರ್ಮಿಸಲಾಗಿದೆ. ಬೆಟ್ಟದ ಮೇಲೆ ಸುಮಾರು ೧೬ ಎಕರೆ ವಿಸ್ತೀರ್ಣದಲ್ಲಿ ಸಾಲುಮರದ ತಿಮ್ಮಕ್ಕ ವೃಕ್ಷೆದ್ಯಾನ ನಿರ್ಮಾಣ ಮಾಡಲಾಗಿದ್ದು, ಇದರಲ್ಲಿ ಕಾಡು ಜಾತಿಯ ೩ ಸಾವಿರ ಸಸಿಗಳನ್ನು ನೆಡಲಾಗಿದೆ. ಆಲ, ಅರಳಿ, ಮಾವು, ನೇರಳೆ ಸೇರಿದಂತೆ ಉತ್ತಮ ಜಾತಿಯ ಗಿಡಗಳು ಬೆಳೆಯುತ್ತಿವೆ ಎಂದು ಅವರು ಮಾಹಿತಿ ನೀಡಿದರು.

ವೇದಿಕೆಯಲ್ಲಿ ಮಂಗಳೂರು ಅರಣ್ಯ ವಿಭಾಗದ ಉಪ ಅರಣ್ಯ ಸಂರಕ್ಷಣಾಧಿಕಾರಿ ಡಾ.ಕರಿಕಲನ್ ವಿ, ಜಿ.ಪಂ ಸದಸ್ಯ ರವೀಂದ್ರ ಕಂಬಾಳಿ ವೇದಿಕೆಯಲ್ಲಿ ಉಪಸ್ಥಿತರಿದ್ದರು. ಸುಬ್ರಹ್ಮಣ್ಯ ವಲಯ ಅರಣ್ಯಾಧಿಕಾರಿ ಕಾರ್ಯಾಪ್ಪ, ಗಿರೀಶ್, ಸುಬ್ಬಯ್ಯ, ಸುರೇಶ್, ಅರಣ್ಯ ರಕ್ಷಕ ವೆಂಕಟೇಶ್ ಅತಿಥಿಗಳನ್ನು ಗೌರವಿಸಿದರು. ಗಾನಸಿರಿಯ ವರುಣ್ ಕುಮಾರ್ ಪ್ರಾರ್ಥಿಸಿದರು. ಪುತ್ತೂರು ವಲಯ ಅರಣ್ಯಾಧಿಕಾರಿ ಮೋಹನ್ ಕುಮಾರ್ ಬಿ.ಜಿ ಸ್ವಾಗತಿಸಿ, ಸುಳ್ಯ ವಲಯ ಅರಣ್ಯಾಧಿಕಾರಿ ಮಂಜುನಾಥ್ ವಂದಿಸಿದರು. ಶಶಿಧರ್ ಕಿಣ್ಣಿಮಜಲು ಕಾರ್ಯಕ್ರಮ ನಿರೂಪಿಸಿದರು. ಬೆಳಿಗ್ಗೆ ಸಾಲುಮರದ ತಿಮ್ಮಕ್ಕ ವೃಕ್ಷೆದ್ಯಾನವನ್ನು ರಿಬ್ಬನ್ ಕಟ್ ಮಾಡುವ ಮೂಲಕ ಉದ್ಘಾಟಿಸಿದ ಶಾಸಕ ಸಂಜೀವ ಮಠಂದೂರು ಅವರು ವೃಕ್ಸೋದ್ಯಾನ ಪಾರ್ಕ್‌ನಲ್ಲಿ ಹಲಸಿನ ಗಿಡ ನೆಟ್ಟರು. ಅದೇ ರೀತಿ ಬ್ರಿಜೇಶ್ ಕುಮಾರ್ ಅವರು ಮಾವಿನ ಗಿಡ ನೆಟ್ಟು ನೀರೇರೆಯುವ ಮೂಲಕ ವೃಕ್ಷೆದ್ಯಾನಕ್ಕೆ ಚಾಲನೆ ನೀಡಿದರು. ಈ ಸಂದರ್ಭದಲ್ಲಿ ಎಪಿಎಂಸಿ ಅಧ್ಯಕ್ಷ ದಿನೇಶ್ ಮೆದು, ಕರ್ನಾಟಕ ಸಂಘದ ಅಧ್ಯಕ್ಷ ಬಿ.ಪುರಂದರ ಭಟ್, ಬಿಜೆಪಿ ಗ್ರಾಮಾಂತರ ಮಂಡಲದ ಅಧ್ಯಕ್ಷ ಚನಿಲ ತಿಮ್ಮಪ್ಪ ಶೆಟ್ಟಿ, ನಗರಸಭಾ ಸದಸ್ಯರಾದ ಜೀವಂಧರ್ ಜೈನ್, ಇಂದಿರಾ, ಪರಮೇಶ್ವರ, ತಾ.ಪಂ ಉಪಾಧ್ಯಕ್ಷೆ ಲಲಿತಾ ಈಶ್ವರ್, ಸ್ಥಾಯಿ ಸಮಿತಿ ಅಧ್ಯಕ್ಷ ಹರೀಶ್ ಬಿಜತ್ರೆ, ತಾ.ಪಂ ಸದಸ್ಯ ರಾಧಾಕೃಷ್ಣ ಬೋರ್ಕರ್, ರೋಟರಿಕ್ಲಬ್‌ನ ವಾಮನ್ ಪೈ, ಸಂತೋಷ್ ಶೆಟ್ಟಿ ಸೇರಿದಂತೆ ಬೀರಮಲೆ ಅಭಿವೃದ್ಧಿ ಸಮಿತಿ ಸದಸ್ಯರು, ಉದ್ಯಮಿಗಳು ಉಪಸ್ಥಿತರಿದ್ದರು.

ಸದ್ಯ ಉಚಿತ ಎಂಟ್ರಿಯಿರಲಿ
ವೃಕ್ಷೋದ್ಯಾನಕ್ಕೆ ಪ್ರತಿನಿತ್ಯ ಮಕ್ಕಳು ಬಂದು ಇಲ್ಲಿಗೆ ಬರಬೇಕು. ಮಕ್ಕಳ ಚಿಲಿಪಿಲಿ ಕೇಳಬೇಕು. ಈ ನಿಟ್ಟಿನಲ್ಲಿ ಒಂದಷ್ಟು ಸಮಯ ಯಾವುದೇ ಎಂಟ್ರಿ ಫೀಸ್ ಇಡದೆ ಉಚಿತ ಎಂಟ್ರಿಯನ್ನು ಕೊಡಬೇಕು ಎಂದು ಶಾಸಕ ಸಂಜೀವ ಮಠಂದೂರು ಹೇಳಿದರು. ಇದೇ ವಿಚಾರವನ್ನು ಮಾಜಿ ಶಾಸಕಿ ಶಕುಂತಳಾ ಶೆಟ್ಟಿಯವರು ಕೂಡಾ ತಮ್ಮ ಭಾಷಣದಲ್ಲಿ ಉಲ್ಲೇಖಿಸಿದರು.

Puttur_Advt_NewsUnder_2
Puttur_Advt_NewsUnder_2
Puttur_Advt_NewsUnder_2
Puttur_Advt_NewsUnder_2
Puttur_Advt_NewsUnder_2

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.