Home_Page_Advt
Home_Page_Advt
Home_Page_Advt

ಕುಕ್ಕೆ ಸುಬ್ರಹ್ಮಣ್ಯದಲ್ಲಿ ಮಠದ ಅರ್ಚಕರ ಮೇಲೆ ಹಲ್ಲೆ ಆರೋಪ, ಅರ್ಚಕ ಪುತ್ತೂರು ಆಸ್ಪತ್ರೆಗೆ ದಾಖಲು : ಮೂವರ ಮೇಲೆ ದೂರು

Puttur_Advt_NewsUnder_1
Puttur_Advt_NewsUnder_1

ಪುತ್ತೂರು: ಕುಕ್ಕೆ ಸುಬ್ರಹ್ಮಣ್ಯದಲ್ಲಿ ಮೂವರು ತನ್ನ ಮೇಲೆ ಹಲ್ಲೆ ನಡೆಸಿದ್ದಾರೆ ಎಂದು ಆರೋಪಿಸಿ ಸಂಪುಟ ನರಸಿಂಹ ಮಠದ ಅರ್ಚಕ ಕುಮಾರ್ ಬನ್ನಿಂತಾಯ ಎಂಬವರು ಪುತ್ತೂರು ಖಾಸಗಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಕಳೆದ ೫ ವರ್ಷಗಳಿಂದ ಮಠದಲ್ಲಿ ಅರ್ಚಕರಾಗಿರುವ ಅವರು ನಿನ್ನೆ ರಾತ್ರಿ ತನ್ನ ಮೇಲೆ ಗುರುಪ್ರಸಾದ ಪಂಜ, ಪ್ರಶಾಂತ್ ಭಟ್ ಮಾಣಿಲ ಹಾಗೂ ಮಹೇಶ್ ಕರಿಕ್ಕಳ ಎಂಬವರು ಆಡಳಿತ ಮಂಡಳಿ ಕಛೇರಿಯ ಬಳಿ ಹಲ್ಲೆ ನಡೆಸಿದ್ದಾರೆ ಎಂದು ಆರೋಪಿಸಿ, ಪುತ್ತೂರು ಸಿಟಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ.

ಜೂ. ೧ರಂದು ಸಂಜೆ ಕುಮಾರ ಬನ್ನಿಂತಾಯ ಅವರು ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಕ್ಕೆ ಸರ್ಪ ಸಂಸ್ಕಾರಕ್ಕೆಂದು ಬಂದ ಭಕ್ತರನ್ನು ಮಠಕ್ಕೆ ಕರೆದೊಯ್ಯುತ್ತಿದ್ದಾರೆಂದು ಆರೋಪಿಸಿ ದೇವಸ್ಥಾನದ ಸೆಕ್ಯುರಿಟಿಯವರು ಮತ್ತು ಊರ ಕೆಲವರು ಅವರನ್ನು ದೇವಳದ ಆಡಳಿತ ಮಂಡಳಿ ಕಛೇರಿಗೆ ಕರೆದೊಯ್ದು ಕಾರ್ಯನಿರ್ವಹಣಾಧಿಕಾರಿಯವರ ಮುಂದೆ ಹಾಜರುಪಡಿಸಿದ್ದರು. ಕಾರ್ಯನಿರ್ವಹಣಾಧಿಕಾರಿಯವರ ಸೂಚನೆಯ ಮೇರೆಗೆ ಕುಮಾರ ಬನ್ನಿಂತಾಯರನ್ನು ಸುಬ್ರಹ್ಮಣ್ಯ ಪೊಲೀಸ್ ಠಾಣೆಗೆ ಕರೆದೊಯ್ದು ಅವರ ಮೇಲೆ ದೂರು ನೀಡಲಾಗಿತ್ತು. ಪೊಲೀಸರು ಕುಮಾರ ಬನ್ನಿಂತಾಯರಿಂದ ಇನ್ನು ಮುಂದೆ ದೇವಸ್ಥಾನಕ್ಕೆ ಬಂದ ಭಕ್ತರನ್ನು ಮಠಕ್ಕೆ ಕರೆದೊಯ್ಯುವುದಿಲ್ಲ ಎಂದು ಕ್ಷಮಾಪಣಾ ಹೇಳಿಕೆ ಬರೆಸಿ ಕಳುಹಿಸಿಕೊಟ್ಟಿದ್ದರೆನ್ನಲಾಗಿದೆ.

ರಾತ್ರಿ ಮಠದಲ್ಲಿ ಊಟ ಮಾಡುವ ವೇಳೆಗೆ ಕುಮಾರ ಬನ್ನಿಂತಾಯರು ವಾಂತಿ ಮಾಡಿ ಕುಸಿದು ಬಿದ್ದರೆಂದೂ, ವಿಚಾರಿಸಿದಾಗ “ತನಗೆ ದೇವಸ್ಥಾನದಲ್ಲಿ ಹಲ್ಲೆ ನಡೆಸಿರುವುದಾಗಿ” ಹೇಳಿದರೆಂದೂ, ಬಳಿಕ ಮಠದವರು ಪುತ್ತೂರಿಗೆ ಕರೆದೊಯ್ದು ಸಿಟಿ ಆಸ್ಪತ್ರೆಗೆ ದಾಖಲಿಸಿದರೆಂದೂ ತಿಳಿದು ಬಂದಿದೆ.

ಮಠದಿಂದ ವಂಚನೆ : ಭಕ್ತನ ದೂರು
ಬೆಂಗಳೂರಿನ ಕೆಂಗೇರಿಯ ಪಳನಿಸ್ವಾಮಿ ಎಂಬವರು ಸುಬ್ರಹ್ಮಣ್ಯ ಠಾಣಾಧಿಕಾರಿಗಳಿಗೆ ಮಠದ ರಾಘವೇಂದ್ರ ಹಾಗೂ ಅನಂತ ಭಟ್ ಎಂಬವರ ವಿರುದ್ಧ ದೂರು ನೀಡಿದ ಘಟನೆಯೂ ನಡೆದಿದೆ. ತಾನು ಕುಕ್ಕೆ ಸುಬ್ರಹ್ಮಣ್ಯ ದೇವಸ್ಥಾನಕ್ಕೆ ಸರ್ಪ ಸಂಸ್ಕಾರ ಪೂಜೆ ಮಾಡಲು ನಿರ್ಧರಿಸಿ ರಾಘವೇಂದ್ರರನ್ನು ಸಂಪರ್ಕಿಸಿದಾಗ ಅವರು ೭೦೦೦ ರೂ. ಪಡೆದುಕೊಂಡು ಸುಬ್ರಹ್ಮಣ್ಯಕ್ಕೆ ಹೋಗಲು ತಿಳಿಸಿದ್ದರು. ಅದರಂತೆ ಸುಬ್ರಹ್ಮಣ್ಯಕ್ಕೆ ಬಂದು ರಾಘವೇಂದ್ರರು ನೀಡಿದ ಅನಂತ ಭಟ್ ಎಂಬವರ ಫೋನ್ ನಂಬರ್‌ಗೆ ಕರೆ ಮಾಡಿದಾಗ ಮಠಕ್ಕೆ ಬರುವಂತೆ ತಿಳಿಸಿದರು. ನಾನು ದೇವಸ್ಥಾನದ ಹೊರಗಿರುವ ಪ್ರಕಟಣೆಯನ್ನು ನೋಡಿ, ದೇವಸ್ಥಾನಕ್ಕೆ ಬರುವ ಭಕ್ತರನ್ನು ವಂಚಿಸಿ ಮಠಕ್ಕೆ ಕರೆದೊಯ್ಯುವ ವಿಚಾರ ತಿಳಿದು, ನಾನು ಕೂಡಾ ಮೋಸ ಹೋಗಿರುವುದು ಗೊತ್ತಾಗಿ, ಮಠಕ್ಕೆ ಹೋಗಿ ನಾನು ಕಟ್ಟಿದ ೭೦೦೦ ರೂ. ವಾಪಾಸ್ ಕೊಡುವಂತೆ ಕೇಳಿದೆ. ಅದಕ್ಕೆ ಅಲ್ಲಿಯವರು ಉಡಾಫೆಯಿಂದ ವರ್ತಿಸಿ ಹಣ ಹಿಂತಿರುಗಿಸಲು ನಿರಾಕರಿಸಿದರು ಎಂದು ಬೆಂಗಳೂರಿನ ಪಳನಿಸ್ವಾಮಿ ಎಂಬವರು ಜೂ. ೧ರಂದು ಸುಬ್ರಹ್ಮಣ್ಯ ಪೊಲೀಸರಿಗೆ ದೂರು ನೀಡಿದ್ದಾರೆ. ಸುಬ್ರಹ್ಮಣ್ಯ ಪೊಲೀಸರು ದೂರು ಸ್ವೀಕರಿಸಿದ್ದು, ಪ್ರಕರಣ ದಾಖಲಿಸಿಕೊಂಡು ವಿಚಾರಣೆ ಆರಂಭಿಸಿದ್ದಾರೆ.

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.