ಸೆ.8: ದೇವಮಾತೆ, ಪ್ರಕೃತಿಮಾತೆಯ ಸ್ಮರಿಸುವ ಕರಾವಳಿ ಕ್ರೈಸ್ತ ಬಾಂಧವರ ಹಬ್ಬ ‘ತೆನೆ ಹಬ್ಬ’

Puttur_Advt_NewsUnder_1
Puttur_Advt_NewsUnder_1

ಭರತ ಭೂಮಿಯ ಮಣ್ಣಿನ ಸೊಗಡೇ ಅಂತದ್ದು. ಯಾವುದೇ ಧರ್ಮವಿರಲಿ ಮಣ್ಣಿನ ಸೊಗಡಿನ ಜೊತೆ ಸಂಪ್ರದಾಯ, ಆಚರಣೆ ಮಿಲನವಾಗುತ್ತದೆ. ಅದಕ್ಕೆ ಯಾವುದೇ ಅಡೆತಡೆಗಳಿಲ್ಲ, ಮಣ್ಣಿನ ಸಂಸ್ಕೃತಿಯ ಜತೆ ಧರ್ಮದ ಸಂಸ್ಕೃತಿಯೂ ಒಂದಾಗಿರುತ್ತದೆ. ಕರಾವಳಿ ಕ್ರೈಸ್ತರು ಒಂದಾಗಿ ಆಚರಿಸುವ ಈ ಹಬ್ಬವೇ ತುಳುವಿನಲ್ಲಿ ಪುದ್ವಾರ್, ಕನ್ನಡದಲ್ಲಿ ತೆನೆಹಬ್ಬ ,ಕೊಂಕಣಿಯಲ್ಲಿ ಮೊಂತಿ ಫೆಸ್ತ್ ಎಂದೇ ಕರೆಯಲ್ಪಡುವ ಈ ಹಬ್ಬಕ್ಕೆ ತನ್ನದೇ ವೈಶಿಷ್ಟ್ಯವನ್ನು ಸಾರುತ್ತದೆ. ಕರಾವಳಿ ಮಣ್ಣಿನ ಆಚರಣೆಯೊಂದಿಗೆ ಇನ್ನೂ ಸಮೃದ್ಧಿಗೊಂಡಿದೆ. ಹೆಚ್ಚಾಗಿ ಕೊಂಕಣಿ ಕ್ರೈಸ್ತ ಬಾಂಧವರು ಆಚರಿಸುವ ಈ ಹಬ್ಬವನ್ನು ಮೇರಿ ಮಾತೆಯ ಜನ್ಮ ದಿನಾಚರಣೆಯನ್ನಾಗಿಯೂ ಆಚರಿಸಲಾಗುತ್ತದೆ. ಮೇರಿ ಮಾತೆ ಕುಟುಂಬದ ಮಾತೆ ಎಂದೇ ಪೂಜಿಸಲಾಗುತ್ತದೆ. ಹಾಗಾಗಿ ಈ ಹಬ್ಬ ಕುಟುಂಬದ ಸಾಮರಸ್ಯವನ್ನು ಸಾರಿ ಹೇಳುತ್ತದೆ.

ಏನಿದು ಮೊಂತಿಫೆಸ್ತ್:
ಕರ್ನಾಟಕ ಕರಾವಳಿಯ ಕ್ಯಾಥೊಲಿಕ್ ಕ್ರೈಸ್ತರಲ್ಲಿ ಸೆಪ್ಟಂಬರ್ ೮ರ ಈ ತೆನೆಹಬ್ಬ `ಮೊಂತಿಫೆಸ್ತ್’ ಹೆಸರಿನಿಂದಲೇ ಹೆಚ್ಚು ಪರಿಚಿತ. ಯೇಸುಕ್ರಿಸ್ತರ ತಾಯಿ ಮಾತೆ ಮರಿಯಮ್ಮ ಈ ಹಬ್ಬದ ಪೂಜ್ಯ ದೇವತೆ. ಮುಂಬಯಿಯ ಬಾಂದ್ರಾದಲ್ಲಿ ೧೫೬೬ರ ಸುಮಾರಿಗೆ ಆರಂಭಗೊಂಡ ಈ `ಮೊಂತಿ ಹಬ್ಬ’ದ ಆಚರಣೆಯು ಮುಂದೆ ಗೋವಾ ಹಾಗೂ ಕರಾವಳಿ ಕರ್ನಾಟಕ ಭಾಗದ ಕ್ಯಾಥೊಲಿಕ್ ಕ್ರೈಸ್ತರಲ್ಲಿ ಹೆಚ್ಚು ಪ್ರಚಲಿತವಾಯಿತು ಎನ್ನುವ ಉಲ್ಲೇಖವಿದೆ. ಲ್ಯಾಟಿನ್ ಭಾಷೆಯಲ್ಲಿ `ಮೊನ್ಸ್’ ಅಂದರೆ ಬೆಟ್ಟ ಎಂಬ ಅರ್ಥವಿದೆ. ಪೋರ್ಚುಗೀಸ್ ಭಾಷೆಯಲ್ಲೂ `ಮೊಂತೆ’ ಅಂದರೆ ಬೆಟ್ಟವೆಂಬ ಅರ್ಥ. ಬಾಂದ್ರಾದ ಬೆಟ್ಟದ ಮೇಲೆ ಪ್ರತಿಷ್ಠಾಪಿಸಿದ ಮಾತೆ ಮೇರಿಯ ಗುಡಿಯಲ್ಲಿ ಆರಂಭಗೊಂಡ ಈ ಹಬ್ಬ, `ಬೆಟ್ಟದ ಮಾತೆಯ ಹಬ್ಬ’ ಎಂಬುದಾಗಿ ನಡೆದುಬಂದಿರುವ ಊಹೆಯಿದೆ. ಆದರೆ ಕರಾವಳಿ ಭಾಗದ ಕ್ರೈಸ್ತರು ಹಿಂದೆ ಕೃಷಿಯೇ ತಮ್ಮ ಪ್ರಧಾನ ವ್ಯಾಪ್ತಿ ಮಾಡಿಕೊಂಡಿರುವುದು, ಇದು ಸಂಭ್ರಮದ `ತೆನೆಹಬ್ಬ’ವಾಗಿ ಆಚರಿಸಿಕೊಂಡು ಬಂದಿರುವುದಕ್ಕೆ ಕಾರಣವಾಗಿರಬಹುದು.

ತೆನೆಹಬ್ಬ:
`ಮೊಂತಿ ಹಬ್ಬ’ದ ಮತ್ತೊಂದು ಪ್ರಮುಖ ಆಚರಣೆ ಹೊಸ ಅಕ್ಕಿ ಊಟ. ಗುರಿಕಾರರೆನ್ನುವ ಭಕ್ತಜನ ಪ್ರತಿನಿಧಿಗಳು ಹೊಲದಿಂದ ಕೊಯ್ದು ತಂದ ಹೊಸ ಭತ್ತದ ತೆನೆಗಳನ್ನು ದೇವಾಲಯಗಳಲ್ಲಿ ಪವಿತ್ರೀಕರಿಸುವುದು ಕ್ಯಾಥೊಲಿಕ್ ಕ್ರೈಸ್ತರ ಸಂಪ್ರದಾಯ. ಇದರ ಜತೆ ಹೊಸತಾಗಿ ಬೆಳೆದ ಹಸಿರು ತರಕಾರಿಗಳನ್ನೂ ದೇವರಿಗೆ ಅರ್ಪಿಸುತ್ತಾರೆ. ಭಕ್ತಿಯಿಂದ ಮನೆಗೆ ತಂದ ಭತ್ತದ ತೆನೆಯನ್ನು ಪ್ರಾರ್ಥನೆ ಬಳಿಕ ಕುಟುಂಬ ಸದಸ್ಯರೆಲ್ಲರೂ ಒಟ್ಟಾಗಿ ಕೂತು ಸೇವಿಸುವುದು ಈ ಹಬ್ಬದ ವಿಶೇಷತೆ. ಅಂದಿನ ಹಬ್ಬದ ಎಲ್ಲಾ ಅಡುಗೆ ರುಚಿಗಳು ಸಸ್ಯಾಹಾರವೇ ಆಗಿರುತ್ತದೆ. ಸಾಂಬಾರು ಅಥವಾ ಪದಾರ್ಥಗಳು ಬೆಸಸಂಖ್ಯೆ ಆಧಾರದಲ್ಲಿ ಇರುತ್ತದೆ. ವಿದೇಶದಲ್ಲಿರುವ ಕುಟುಂಬದ ಸದಸ್ಯರಿಗೆ ಪೋಸ್ಟ್‌ಗಳ ಮೂಲಕ ಕಳುಹಿಸಿ ಕೊಡಲಾಗುತ್ತದೆ. ಹೀಗೆ ಕೌಟುಂಬಿಕ ಸಾಮರಸ್ಯವನ್ನು ಈ ಹಬ್ಬದ ಮೂಲಕ ಸಾರಲಾಗುತ್ತದೆ. ಎಲ್ಲ ವಿಘ್ನ ನಿವಾರಿಸಿ ದೇವರು ನೀಡಿದ ಪ್ರಥಮ ಫಲಕ್ಕೆ ವಂದಿಸಿ ವರ್ಷಪೂರ್ತಿ ನೆಮ್ಮದಿ-ಸಮ್ಥದ್ಧಿ ನೀಡೆಂದು ಮಕ್ಕಳು ಹಿರಿಯರೆಲ್ಲ ಪ್ರಾರ್ಥಿಸುತ್ತಾರೆ.

ಮಕ್ಕಳಿಂದ ಹೂಗಳ ಅರ್ಪಣೆ:
ಈ ಹಬ್ಬ ಕೇವಲ ಒಂದು ದಿನದ ಆಚರಣೆಯಲ್ಲ. ೯ ದಿನಗಳ ಸಂಭ್ರಮ. ಹಬ್ಬಕ್ಕಿಂತಲೂ ಮೊದಲು ೯ ದಿನ ಮಾತೆ ಮೇರಿಯ ಕೃಪೆ ಬೇಡಿಕೊಂಡು ವಿಶೇಷ ಪ್ರಾರ್ಥನೆ (ನವೇನಾ) ಎಲ್ಲಾ ಕ್ಯಾಥೊಲಿಕ್ ಕ್ರೈಸ್ತ ದೇವಾಲಯಗಳಲ್ಲಿ ನಡೆಯುತ್ತದೆ. ಪುಟ್ಟ ಪುಟ್ಟ ಮಕ್ಕಳು ಚೆಂದದ ಹೂಗಳನ್ನು ಚಿಕ್ಕ ಬುಟ್ಟಿಗಳಲ್ಲಿ ದೇವಾಲಯಕ್ಕೆ ಹೊತ್ತು ತಂದು ಮಾತೆ ಮೇರಿಗೆ ಭಕ್ತಿಪೂರ್ವಕವಾಗಿ ಅರ್ಪಿಸಲಾಗುತ್ತಿದೆ. ಒಂಭತ್ತನೆಯ ದಿನ ಹಬ್ಬದ ಸಂಭ್ರಮ. ಕೆಥೊಲಿಕ್ ಕ್ರೈಸ್ತ ದೇವಾಲಯಗಳಲ್ಲಿ ವಿಶೇಷ ಪೂಜೆ ಪುನಸ್ಕಾರಗಳು ನಡೆಯುತ್ತವೆ.

ಪೂರ್ವಿಕರಿಂದಲೇ ಆಚರಿಸುವ ಈ ಹಬ್ಬವು ತನ್ನದೇ ವಿಶಿಷ್ಟ ಸಂಸ್ಕೃತಿಯಿಂದ ಸಂಪ್ರದಾಯವನ್ನು ಎತ್ತಿ ಹಿಡಿಯಲಾಗುತ್ತದೆ. ಭರತ ಭೂಮಿಯ ಕನ್ಯಾಡಿಯ ಸೇವಾಭಾರತಿ ಟ್ರಸ್ಟ್‌ನ ಮಣ್ಣಿನ ಸೊಗಡು ಧರ್ಮದ ಆಚರಣೆಯಲ್ಲಿ ಒಳಹೊಕ್ಕಿದೆ ಎಂದು ಹೇಳಿದರೆ ತಪ್ಪಾಗಲಾರದು. ಈ ಹಬ್ಬವು ಎಲ್ಲರಿಗೂ ಸಮೃದ್ಧಿ, ಶಾಂತಿ, ನೆಮ್ಮದಿಯನ್ನು ನೀಡುವ ಹಬ್ಬವಾಗಲಿ ಎಂದು ಹಾರೈಸೋಣ.

ಕೋವಿಡ್ ಎಫೆಕ್ಟ್: ಸರಳ ರೀತಿಯಲ್ಲಿ ಆಚರಣೆ…
ಮಹಾಮಾರಿ ಕೊರೋನಾದಿಂದ ಇಡೀ ವಿಶ್ವವೇ ಥರಗುಟ್ಟಿದೆ. ಈ ನಿಟ್ಟಿನಲ್ಲಿ ದೇವಾಲಯಗಳಲ್ಲಿ ಪೂಜೆ, ಪುನಸ್ಕಾರಗಳಿಗೆ ಕಡಿವಾಣ ಬಿದ್ದಿದೆ. ಈ ಕೋವಿಡ್ ಎಫೆಕ್ಟ್‌ನಿಂದಾಗಿ ಯಾವುದೇ ಧಾರ್ಮಿಕ ಆಚರಣೆಯನ್ನು ವಿಜ್ರಂಭಣೆಯಿಂದ ಆಚರಿಸಲು ಸಾಧ್ಯವಿಲ್ಲ. ಆದ್ದರಿಂದ ಸರಕಾರದ ನಿಯಾಮಾವಳಿಗಳ ಕಟ್ಟುನಿಟ್ಟಿನ ಪಾಲನೆಯೊಂದಿಗೆ ಈ ಬಾರಿಯ ಮೊಂತಿ ಫೆಸ್ತ್‌ನ್ನು ಕರಾವಳಿ ಭಾಗದಲ್ಲಿ ಆಚರಿಸಲಾಗುತ್ತಿದೆ. ಪ್ರತೀ ವರ್ಷ ಒಂಭತ್ತು ದಿನ ಹಾಗೂ ಹಬ್ಬದ ದಿನದಂದು ಪುಟ್ಟ ಮಕ್ಕಳು ಹೂವುಗಳ ಬುಟ್ಟಿಯೊಂದಿಗೆ ಮೇರಿ ಮಾತೆಗೆ ಹೂವುಗಳನ್ನು ಅರ್ಪಿಸಲಾಗುತ್ತಿತ್ತು. ಈ ಬಾರಿ ಹೂವುಗಳ ಬುಟ್ಟಿಯ ಹೊರತುಪಡಿಸಿ ಕೇವಲ ಒಂದೇ ಹೂವಿನೊಂದಿಗೆ ಪುಟ್ಟ ಮಕ್ಕಳು ಮೇರಿ ಮಾತೆಗೆ ಅರ್ಪಿಸಬೇಕಾಗಿದೆ. ಅಲ್ಲದೆ ಪ್ರತೀ ದಿವ್ಯ ಬಲಿಪೂಜೆಯಲ್ಲಿ ಭತ್ತದ ತೆನೆಗಳ ಪವಿತ್ರೀಕರಣ, ಸಿಹಿಯ ಪ್ರತೀಕವಾದ ಕಬ್ಬಿನ ವಿತರಣೆ ಕಾರ್ಯವು ಆಯಾ ಚರ್ಚ್‌ಗಳಲ್ಲಿ ಸಾಮಾಜಿಕ ಅಂತರದೊಂದಗೆ ಭಕ್ತಿಪೂರ್ವಕವಾಗಿ ನಡೆಸಲಾಗುತ್ತಿದೆ.

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.