HomePage_Banner
HomePage_Banner

ಪತ್ರಕರ್ತೆ ಗೌರಿ ಲಂಕೇಶ್ ಮರ್ಡರ್ ಕೇಸ್ – 3 ವರ್ಷಗಳಿಂದ ಜೈಲಿನಲ್ಲೇ ಇರುವ ಕೆಮ್ಮಾಯಿಯ ಮೋಹನ್ ನಾಯಕ್‌ಗೆ ಸಿಗದ ಜಾಮೀನು ಭಾಗ್ಯ

Puttur_Advt_NewsUnder_1
Puttur_Advt_NewsUnder_1
Puttur_Advt_NewsUnder_1
  • ‘ಕೋಕಾ’ ಕಾಯ್ದೆ ರದ್ದು ಪಡಿಸಿದ ಹೈಕೋರ್ಟ್
  • ಮೇಲ್ಮನವಿ ಸಲ್ಲಿಸಿದ ಕವಿತ ಲಂಕೇಶ್
  • ಹೈಕೋರ್ಟ್ ಆದೇಶದ ಬೆನಿಫಿಟ್ ಪಡೆಯಲು ಅವಕಾಶ ನಿರಾಕರಿಸಿದ ಸುಪ್ರೀಂಕೋರ್ಟ್

ಪುತ್ತೂರು: ಖ್ಯಾತ ಪತ್ರಕರ್ತೆ ಗೌರಿ ಲಂಕೇಶ್‌ರವರನ್ನು ಬೆಂಗಳೂರಿನಲ್ಲಿ ಗುಂಡಿಟ್ಟು ಕೊಲೆಗೈದ ಪ್ರಕರಣದಲ್ಲಿ ಆರೋಪಿಯಾಗಿರುವ ಪುತ್ತೂರು ಕೆಮ್ಮಾಯಿ ಮೂಲದ ಮೋಹನ್ ನಾಯಕ್(52ವ) ಮತ್ತು ಇತರರ ವಿರುದ್ಧ ವಿಶೇಷ ತನಿಖಾ ತಂಡ ದಾಖಲಿಸಿದ್ದ ‘ಕೋಕಾ’ ಕಾಯ್ದೆಯನ್ನು ರದ್ದು ಪಡಿಸಿರುವ ಕರ್ನಾಟಕ ಹೈಕೋರ್ಟ್ ಆದೇಶವನ್ನು ಪ್ರಶ್ನಿಸಿ ಗೌರಿ ಲಂಕೇಶ್ ಸಹೋದರಿ ಕವಿತಾ ಲಂಕೇಶ್ ಸುಪ್ರೀಂಕೋರ್ಟ್ ಮೆಟ್ಟಿಲೇರಿದ್ದಾರೆ. ಸಿನಿಮಾ ನಿರ್ದೇಶಕಿಯೂ ಆಗಿರುವ ಕವಿತಾ ಲಂಕೇಶ್ ಸಲ್ಲಿಸಿರುವ ಮೇಲ್ಮನವಿ ಅರ್ಜಿಯನ್ನು ವಿಚಾರಣೆಗೆ ಅಂಗೀಕರಿಸಿರುವ ಸರ್ವೋಚ್ಛ ನ್ಯಾಯಾಲಯವು ಪ್ರತಿವಾದಿಗಳಿಗೆ ನೊಟೀಸ್ ಜಾರಿ ಮಾಡಿದೆ. ಅಲ್ಲದೆ, ಕೋಕಾ(ಕರ್ನಾಟಕ ಸಂಘಟಿತ ಅಪರಾಧ ತಡೆ ಕಾಯ್ದೆ) ರದ್ದು ಪಡಿಸಿರುವ ಹೈಕೋರ್ಟ್ ತೀರ್ಪಿನ ಯಾವುದೇ ಪ್ರಯೋಜನವನ್ನು ಸದ್ಯಕ್ಕೆ ಆರೋಪಿಗಳು ಪಡೆಯುವಂತಿಲ್ಲ ಎಂದು ಸುಪ್ರೀಂಕೋರ್ಟ್ ತಿಳಿಸಿದೆ. ಈ ಹಿನ್ನೆಲೆಯಲ್ಲಿ ಮೂರು ವರ್ಷಗಳಿಂದ ಜೈಲಿನಲ್ಲಿರುವ ಮೋಹನ್ ನಾಯಕ್ ಸದ್ಯಕ್ಕೆ ಜಾಮೀನು ಪಡೆದುಕೊಳ್ಳಲು ಸಾಧ್ಯವಾಗುವುದಿಲ್ಲ ಎಂದು ಮಾಹಿತಿ ಲಭ್ಯವಾಗಿದೆ.

ಗೌರಿ ಮರ್ಡರ್ ಕೇಸಲ್ಲಿ ಅರೆಸ್ಟ್ ಆಗಿದ್ದ ಕೆಮ್ಮಾಯಿಯ ಮೋಹನ ನಾಯಕ್ ವಿರುದ್ಧ ದಾಖಲಾಗಿದ್ದ ಕೋಕಾ ಕಾಯ್ದೆ : `ಲಂಕೇಶ್’ ಪತ್ರಿಕೆಯ ಸಂಪಾದಕರಾಗಿದ್ದ ಹಿರಿಯ ಪತ್ರಕರ್ತ ದಿ.ಪಿ.ಲಂಕೇಶ್‌ರವರ ಪುತ್ರಿ, `ಗೌರಿ ಲಂಕೇಶ್’ ಪತ್ರಿಕೆಯ ಸಂಪಾದಕಿ ಗೌರಿ ಲಂಕೇಶ್‌ರವರನ್ನು ೨೦೧೭ರ ಸೆಪ್ಟೆಂಬರ್ ೫ರಂದು ರಾತ್ರಿ ಬೆಂಗಳೂರಿನ ರಾಜರಾಜೇಶ್ವರಿ ನಗರದಲ್ಲಿರುವ ಅವರ ನಿವಾಸದಲ್ಲಿ ಗುಂಡಿಟ್ಟು ಕೊಲೆಗೈಯಲಾಗಿತ್ತು. ನಕ್ಸಲರನ್ನು ಮುಖ್ಯವಾಹಿನಿಗೆ ಕರೆ ತರುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದ್ದ ಮತ್ತು ಎಡಪಂಥೀಯ ವಿಚಾರಧಾರೆಗಳನ್ನು ಅಳವಡಿಸಿಕೊಂಡಿದ್ದ ಗೌರಿ ಲಂಕೇಶ್‌ರವರು ಬೆಂಗಳೂರಿನಲ್ಲಿರುವ ತನ್ನ ಪತ್ರಿಕಾ ಕಛೇರಿಯಿಂದ ಕಾರಿನಲ್ಲಿ ಬಂದು ತನ್ನ ಮನೆಯೊಳಗೆ ಪ್ರವೇಶಿಸುತ್ತಿದ್ದಂತೆಯೇ ಅವರ ಹಿಂದಿನಿಂದ ಬಂದಿದ್ದ ಹಂತಕರ ಪಡೆ ಗೌರಿಯವರಿಗೆ ಗುಂಡಿಟ್ಟು ಬರ್ಬರವಾಗಿ ಕೊಲೆಗೈದಿತ್ತು. ವಿಚಾರವಾದಿಯೂ ಆಗಿದ್ದ ಗೌರಿ ಲಂಕೇಶ್‌ರವರ ಕೊಲೆ ಪ್ರಕರಣ ದೇಶ ವಿದೇಶದಲ್ಲಿ ಸಂಚಲನ ಮೂಡಿಸಿತ್ತಲ್ಲದೆ ವ್ಯಾಪಕ ಖಂಡನೆ, ಪ್ರತಿಭಟನೆ ವ್ಯಕ್ತವಾಗಿತ್ತು. ಬಳಿಕ ತನಿಖೆಗಾಗಿ ಹಿರಿಯ ಪೊಲೀಸ್ ಅಧಿಕಾರಿಗಳ ತಂಡಗಳನ್ನು ರಚಿಸಲಾಗಿತ್ತು. ಗೌರಿ ಲಂಕೇಶ್ ಹತ್ಯಾ ಪ್ರಕರಣದ ತನಿಖೆಗೆಂದೇ ವಿಶೇಷ ತನಿಖಾ ತಂಡ ರಚನೆಯಾಗಿತ್ತು. ಪುತ್ತೂರಿನಲ್ಲಿ ಈ ಹಿಂದೆ ಎಎಸ್ಪಿಯಾಗಿದ್ದು ಬೆಂಗಳೂರಿನಲ್ಲಿ ಡಿಸಿಪಿಯಾಗಿರುವ ಐಪಿಎಸ್ ಅಧಿಕಾರಿ ಅನುಚೇತ್ ಎಂ.ಎನ್.ರವರರು ಮುಖ್ಯಸ್ಥರಾಗಿರುವ ವಿಶೇಷ ತನಿಖಾ ತಂಡವು ಗೌರಿ ಮರ್ಡರ್ ಕೇಸ್‌ನಲ್ಲಿ ಹಲವರನ್ನು ಬಂಧಿಸಿತ್ತು. ಬಳಿಕ ಕೆಮ್ಮಾಯಿ ಮೂಲದ ಮೋಹನ್ ನಾಯಕ್‌ರನ್ನು ಬಲೆಗೆ ಕೆಡವಿತ್ತು.

ರಿವಾಲ್ವರ್ ನೀಡಿದ್ದ ಆರೋಪದಲ್ಲಿ ಮೋಹನ್ ನಾಯಕ್ ಅರೆಸ್ಟ್: ಹಿಂದೂ ಧರ್ಮವನ್ನು ಟೀಕಿಸುತ್ತಿದ್ದರು ಎಂಬ ಕಾರಣಕ್ಕಾಗಿ ಗೌರಿ ಲಂಕೇಶ್‌ರವರನ್ನು ಬಲಪಂಥೀಯ ಸಂಘಟನೆಯವರು ಕೊಲೆಗೈದಿರಬೇಕೆಂಬ ಶಂಕೆಯಲ್ಲಿ ತನಿಖೆ ಕೈಗೆತ್ತಿಕೊಂಡಿದ್ದ ವಿಶೇಷ ತನಿಖಾ ತಂಡವು ಮದ್ದೂರಿನ ಕೆ.ಟಿ. ನವೀನ್ ಕುಮಾರ್ ಅಲಿಯಾಸ್ ಹೊಟ್ಟೆ ಮಂಜ, ಶಿವಮೊಗ್ಗ ಜಿಲ್ಲೆಯ ಶಿಕಾರಿಪುರ ತಾಲೂಕಿನ ಕಪ್ಪನಹಳ್ಳಿಯ ಸುಜೀತ್ ಕುಮಾರ್ ಅಲಿಯಾಸ್ ಪ್ರವೀಣ್ ಕುಮಾರ್, ಮಹಾರಾಷ್ಟ್ರ ಪುಣೆಯ ಅಮೋಲ್ ಕಾಳೆ, ಅಮಿತ್ ದೇಗ್ವೇಕರ್, ಮನೋಹರ್ ಯಡವೆ ಮತ್ತು ವಿಜಯಪುರ ಸಿಂಧಗಿಯ ಪರಶುರಾಮ್ ವಾಗ್ಮೋರೆ ಎಂಬವರನ್ನು ಬಂಧಿಸಿ ತನಿಖೆ ನಡೆಸಿತ್ತು. ಈ ಆರೋಪಿಗಳಿಗೆ ೭.೬೫ ಎಂ.ಎಂ.ಗನ್ ಸರಬರಾಜು ಮಾಡಿದ ಹಾಗೂ ಬೆಂಗಳೂರಿನಲ್ಲಿ ನೆಲೆಸಲು ಮತ್ತು ವಾಹನದಲ್ಲಿ ಸಂಚರಿಸಲು ಅವಕಾಶ ನೀಡಿದ ಆರೋಪದಡಿ ಮೋಹನ್ ನಾಯಕ್ ಅವರನ್ನು ಬಂಧಿಸಲಾಗಿತ್ತು. ಮೂಲತಃ ಪುತ್ತೂರಿನ ಕೆಮ್ಮಾಯಿಯವರಾಗಿದ್ದು ಸುಳ್ಯ ಸಂಪಾಜೆ ಗ್ರಾಮದ ಮುಂಡಡ್ಕದಲ್ಲಿ ವಾಸವಿದ್ದ ಮೋಹನ್ ನಾಯಕ್‌ರನ್ನು ವಿಶೇಷ ತನಿಖಾ ತಂಡ ೨೦೧೮ರ ಜುಲೈ ೧೮ರಂದು ಬಂಧಿಸಿ ಅಂದು ಬೆಂಗಳೂರಿನ ೩ನೇ ಎಸಿಎಂಎಂ ನ್ಯಾಯಾಲಯಕ್ಕೆ ಹಾಜರುಪಡಿಸಿತ್ತು. ನ್ಯಾಯಾಲಯವು ಹೆಚ್ಚಿನ ತನಿಖೆಗಾಗಿ ಮೋಹನ್ ನಾಯಕ್‌ರನ್ನು ಎಸ್.ಐ.ಟಿ. ವಶಕ್ಕೆ ಒಪ್ಪಿಸಿತ್ತು.

ಗೌರಿ ಲಂಕೇಶ್‌ರವರನ್ನು ಹತ್ಯೆಗೈಯುವ ೩ ತಿಂಗಳ ಮೊದಲು ಬೆಂಗಳೂರಿನ ಕುಂಬಳಗೋಡು ಪೊಲೀಸ್ ಠಾಣಾ ವ್ಯಾಪ್ತಿಯ ಬಿಡದಿ ಬಳಿ ಮೋಹನ್ ನಾಯಕ್ ಬಾಡಿಗೆ ಮನೆ ಮಾಡಿದ್ದು ಅದೇ ಮನೆಯಲ್ಲಿ ಗೌರಿ ಲಂಕೇಶ್ ಹತ್ಯೆಗೆ ಸಂಚು ರೂಪಿತವಾಗಿತ್ತು. ಹೇಗೆ ಹತ್ಯೆ ಮಾಡಬೇಕು, ಎಲ್ಲಿ ಹತ್ಯೆ ಮಾಡಬೇಕು, ಅನಂತರ ಯಾವ ಮಾರ್ಗದಲ್ಲಿ ಪರಾರಿಯಾಗಬೇಕು ಎಂಬುದರ ಬಗ್ಗೆ ಚರ್ಚೆ ನಡೆಸಲಾಗಿತ್ತು. ಬಳಿಕ ಪೊಲೀಸರ ದಿಕ್ಕು ತಪ್ಪಿಸಲು ಸಿಗ್ಗೇಹಳ್ಳಿ ಗೇಟ್ ಬಳಿಯ ಸರಕಾರಿ ಶಾಲೆಯ ಹಿಂಭಾಗದಲ್ಲಿ ಪೊಲೀಸಪ್ಪನ ಬಿಲ್ಡಿಂಗ್ ಹಾಗೂ ಮಾಗಡಿ ಮುಖ್ಯ ರಸ್ತೆಯ ಸಾಯಿಲಕ್ಷ್ಮಿ ಲೇಔಟ್‌ನಲ್ಲಿಯೂ ಮೋಹನ್ ನಾಯಕ್ ಕೊಠಡಿಗಳನ್ನು ಬಾಡಿಗೆಗೆ ಪಡೆದು ಕೊಲೆಗೆ ಯೋಜನೆ ರೂಪಿಸಲಾಗಿತ್ತು ಎಂದು ಹೇಳಲಾಗುತ್ತಿತ್ತು. ಬಲಪಂಥೀಯ ಚಟುವಟಿಕೆಗಳಲ್ಲಿ ಸಕ್ರಿಯವಾಗಿದ್ದ ಆರೋಪಿಗಳು ಒಟ್ಟಾಗಿ ಯೋಜನೆ ರೂಪಿಸಿ ಗೌರಿ ಮರ್ಡರ್ ಮಾಡಿದ್ದರು ಎಂದು ತನಿಖೆಯಲ್ಲಿ ಬಯಲಾಗಿತ್ತು.

ಪುತ್ತೂರಿನ ಮುಖ್ಯ ರಸ್ತೆಯಲ್ಲಿ ಹೊಗೆಸೊಪ್ಪು ವ್ಯಾಪಾರಿಯಾಗಿದ್ದ ವಾಸು ನಾಯಕ್‌ರವರ ಪುತ್ರರಾದ ಮೋಹನ್ ನಾಯಕ್ ಜ್ಯೋತಿಷ್ಯ ಹೇಳುವ ಹವ್ಯಾಸ ಹೊಂದಿದ್ದರೆಂದು ಹೇಳಲಾಗುತ್ತಿತ್ತು. ಪುತ್ತೂರಿನಲ್ಲಿ ವ್ಯವಹಾರದಲ್ಲಿ ತೊಡಗಿಸಿಕೊಂಡಿದ್ದ ಮೋಹನ್ ನಾಯಕ್ ಕಳೆದ ಕೆಲವು ವರ್ಷಗಳಿಂದ ಸುಳ್ಯ ತಾಲೂಕಿನ ಸಂಪಾಜೆಯ ಮುಂಡಡ್ಕದಲ್ಲಿರುವ ತಂದೆಯ ಜಮೀನಿನಲ್ಲಿ ಮನೆ ಮಾಡಿ ಗೃಹಿಣಿಯಾಗಿರುವ ಪತ್ನಿ ಮತ್ತು ಮಕ್ಕಳೊಂದಿಗೆ ವಾಸವಿದ್ದರು. ಮೋಹನ್ ಅಲ್ಲಿ ಸಂಘಟನೆಗಳಲ್ಲಿ ಗುರುತಿಸಿಕೊಂಡಿದ್ದರು. ಕೃಷಿಕರೂ ಆಗಿದ್ದ ಮೋಹನ್ ನಾಯಕ್ ಸನಾತನ ಸಂಸ್ಥೆಯಲ್ಲಿ ತನ್ನನ್ನು ತೊಡಗಿಸಿಕೊಂಡಿದ್ದರು. ಉಚಿತವಾಗಿ ಆಕ್ಯೂಪ್ರೆಶರ್ ಚಿಕಿತ್ಸೆ, ಸಲಹೆ ನೀಡುತ್ತಿರುವ ಕಾರಣಕ್ಕಾಗಿ ಇವರ ಮನೆಗೆ ಜನ ಬರುತ್ತಿದ್ದುದರಿಂದ ಹೊರ ಜಿಲ್ಲೆಯಿಂದ ಇಲ್ಲಿಗೆ ಬಂದರೂ ಸ್ಥಳೀಯರು ಸಂಶಯಪಡುತ್ತಿರಲಿಲ್ಲ. ಆಗಾಗ ಬೆಂಗಳೂರಿಗೆ ಹೋಗುತ್ತಿದ್ದ ಮೋಹನ್ ನಾಯಕ್ ಇತರ ಆರೋಪಿಗಳೊಂದಿಗೆ ಸಂಘಟನೆಯ ಮೂಲಕ ಸಂಪರ್ಕ ಹೊಂದಿದ್ದು ಬಂಧನಕ್ಕೊಳಗಾಗಿರುವ ಇತರ ಆರೋಪಿಗಳು ನೀಡಿದ ಮಾಹಿತಿಯನ್ನಾಧರಿಸಿ ಮೋಹನ್ ನಾಯಕ್ ಬೆನ್ನು ಬಿದ್ದಿದ್ದ ವಿಶೇಷ ತನಿಖಾ ತಂಡದ ಅಧಿಕಾರಿಗಳು ಮೋಹನ್ ಮೇಲೆ ವಿಶೇಷ ಕಣ್ಣಿಟ್ಟಿದ್ದರು. ಈತನ ಚಲನವಲನಗಳನ್ನು ಗಮನಿಸಿ ಬಲೆಗೆ ಕೆಡವಿದ್ದರು. ಸಂಘಟನೆಯಲ್ಲಿ ಹೊರತುಪಡಿಸಿದರೆ ಇತರ ಸಾರ್ವಜನಿಕರೊಂದಿಗೆ ಅಷ್ಟಾಗಿ ಬೆರೆಯದ ಮೋಹನ್ ನಾಯಕ್ ಸದಾ ಪಂಚೆ ಧರಿಸಿ ಜೀಪು ಅಥವಾ ಕಾರಿನಲ್ಲಿ ಪ್ರಯಾಣಿಸುತ್ತಿದ್ದ. ಈತನ ಮನೆಗೆ ಸಂಪಾಜೆ ಮುಖ್ಯರಸ್ತೆಯಿಂದ ೨ ಕಿಲೋ ಮೀಟರ್ ಹೋಗಬೇಕಿದ್ದು ಸುಮಾರು ಒಂದು ಕಿಲೋ ಮೀಟರ್ ಮಣ್ಣಿನ ಮಾರ್ಗದಲ್ಲಿ ತೆರಳಬೇಕು. ಈ ರಸ್ತೆ ಕಾಡುಗಳಿಂದ ಕೂಡಿದ್ದು ಮನೆಗೆ ತಲುಪಬೇಕಾದರೆ ಒಂದು ಗೇಟಿನಿಂದ ಇನ್ನೊಂದು ಗೇಟಿಗೆ ೧೦೦ ಮೀಟರ್‌ಗಿಂತ ಜಾಸ್ತಿ ಅಂತರ ಇದೆ. ೨ನೇ ಗೇಟಿನಿಂದ ಸುಮಾರು ೫೦ ಮೀಟರ್ ಅಂತರ ಇದೆ. ಮೋಹನ್ ನಾಯಕ್ ಬಂಧನವಾಗುತ್ತಿದ್ದಂತೆಯೇ ಅವರ ಪತ್ನಿ ಮತ್ತು ಮಕ್ಕಳು ಪುತ್ತೂರಿನ ಮನೆಗೆ ಬಂದಿದ್ದರು. ಬಂಧನಕ್ಕೊಳಗಾಗಿ ಜೈಲಿನಲ್ಲಿರುವ ಮೋಹನ್ ನಾಯಕ್ ಸಹಿತ ಇತರ ಆರೋಪಿಗಳು ಜಾಮೀನು ಕೋರಿ ಸಲ್ಲಿಸಿದ್ದ ಅರ್ಜಿ ಹಲವು ಬಾರಿ ಉಚ್ಛ ನ್ಯಾಯಾಲಯದಲ್ಲಿ ವಜಾಗೊಂಡಿತ್ತು. ಈ ಮಧ್ಯೆ ಎಸ್.ಐ.ಟಿ. ಅಧಿಕಾರಿಗಳು ಆರೋಪಿಗಳ ವಿರುದ್ಧ ಸಾವಿರಾರು ಪುಟಗಳ ಚಾರ್ಜ್ ಶೀಟ್ ಸಲ್ಲಿಸಿದ್ದರಲ್ಲದೆ ಆರೋಪಿಗಳ ವಿರುದ್ಧ ಕೋಕಾ ಕಾಯ್ದೆ ಹೇರಿದ್ದರು. ಇದನ್ನು ಆರೋಪಿಗಳು ಹೈಕೋರ್ಟಲ್ಲಿ ಪ್ರಶ್ನಿಸಿದ್ದರು. ಹೈಕೋರ್ಟ್ ಇತ್ತೀಚೆಗೆ ಆರೋಪಿಗಳ ಮೇಲಿನ ಕೋಕಾ ಕಾಯ್ದೆ ರದ್ದು ಪಡಿಸಿತ್ತು. ಇದರಿಂದಾಗಿ ಆರೋಪಿಗಳಿಗೆ ಜಾಮೀನು ಮಂಜೂರಾಗುವ ನಿರೀಕ್ಷೆ ಇತ್ತು. ಆದರೆ, ಹೈಕೋರ್ಟ್ ತೀರ್ಪು ಪ್ರಶ್ನಿಸಿ ಗೌರಿ ಸಹೋದರಿ ಕವಿತ ಲಂಕೇಶ್ ಸುಪ್ರೀಂಕೋರ್ಟ್ ಮೆಟ್ಟಿಲೇರಿದ್ದರು. ಸುಪ್ರೀಂಕೋರ್ಟ್ ನ್ಯಾಯಮೂರ್ತಿಗಳು ಜೂನ್ ೨೯ರಂದು ಅರ್ಜಿಯ ವಿಚಾರಣೆ ನಡೆಸಿ ಪ್ರತಿವಾದಿಗಳಿಗೆ ನೊಟೀಸ್ ಜಾರಿ ಮಾಡಿದ್ದು ಹೈಕೋರ್ಟ್ ಆದೇಶದಿಂದ ಆರೋಪಿಗಳು ಯಾವುದೇ ಬೆನಿಫಿಟ್ ಪಡೆಯದಂತೆ, ಜಾಮೀನು ಪಡೆದುಕೊಳ್ಳಲು ಹೈಕೋರ್ಟ್ ಸ್ಟೇ ಆರ್ಡರ್ ಪೂರಕವಾಗದಂತೆ ನೋಡಿಕೊಳ್ಳಲು ಆದೇಶಿಸಿದೆ. ಇದರಿಂದಾಗಿ ಮೋಹನ್ ನಾಯಕ್ ಸಹಿತ ಪ್ರಕರಣದ ಹದಿನೈದು ಆರೋಪಿಗಳು ಸದ್ಯಕ್ಕೆ ಜೈಲಿನಲ್ಲಿಯೇ ಇರುವಂತಾಗಿದೆ.

ಮಿಸ್ ಅಂಡರ್‌ಸ್ಟ್ಯಾಂಡಿಂಗ್ ಆಗಿದೆ, ಅಣ್ಣ ಆ ರೀತಿಯ ಕೃತ್ಯ ಮಾಡಿರಲಿಕ್ಕಿಲ್ಲ ಎಂದು ಸಹೋದರ ಹೇಳಿದ್ದರು. ಗೌರಿ ಲಂಕೇಶ್ ಹತ್ಯೆ ಪ್ರಕರಣದ ಆರೋಪಿಯಾಗಿ ಮೋಹನ್ ನಾಯಕ್ ಬಂಧನವಾಗಿರುವ ಬಗ್ಗೆ ಅವರ ಸಹೋದರ, ಉದ್ಯಮಿ ರವೀಂದ್ರ ನಾಯಕ್ ಅವರನ್ನು ಅಂದು ಸಂಪರ್ಕಿಸಿದ್ದಾಗ ಅವರು, ಅಣ್ಣನ ಮೇಲಿನ ಆರೋಪ ನಿರಾಧಾರ ಎಂದಿದ್ದರು.

ಅಣ್ಣ ಮೋಹನ್ ನಾಯಕ್ ಹಿಂದೆ ಇಲ್ಲಿಯೇ ನಮ್ಮ ಜೊತೆ ವ್ಯಾಪಾರ ಮಾಡುತ್ತಿದ್ದವರು. ಕಳೆದ ಕೆಲವು ವರ್ಷಗಳಿಂದ ಸಂಪಾಜೆಯಲ್ಲಿ ತಂದೆಯ ಆಸ್ತಿಯನ್ನು ಅವರು ನೋಡಿಕೊಂಡು ಅಲ್ಲೇ ಮನೆ ಮಾಡಿ ಪತ್ನಿ, ಮಕ್ಕಳೊಂದಿಗೆ ವಾಸವಿದ್ದರು. ನಮ್ಮ ಸಂಬಂಧ ಈಗಲೂ ಹಾಗೆಯೇ ಇದೆ. ಇಲ್ಲಿಗೆ ಆಗಾಗ ಬರುತ್ತಿರುತ್ತಾರೆ. ಕಾರ್ಯಕ್ರಮಗಳಿದ್ದಲ್ಲಿ ಬಂದು ಹೋಗುತ್ತಾರೆ. ಅವರ ಕುರಿತು ಮಾಧ್ಯಮಗಳಲ್ಲಿ ಏನೆಲ್ಲಾ ಕಪೋಲಕಲ್ಪಿತ ವರದಿಗಳು ಬಂದಿವೆ. ಆದರೆ ನಮ್ಮ ಅಣ್ಣ ಹೇಗೆಂದು ನಮಗೆ ಗೊತ್ತು.ಅವರು ಆ ರೀತಿಯ ದುಷ್ಕೃತ್ಯಗಳನ್ನು ಮಾಡುವವರಲ್ಲ ಎನ್ನುವುದನ್ನು ಧೈರ್ಯವಾಗಿ ಹೇಳಬಲ್ಲೆವು. ಏನೋ ಮಿಸ್ ಅಂಡರ್‌ಸ್ಟ್ಯಾಂಡಿಂಗ್ ಆಗಿ ಏನೋ ತಪ್ಪಾಗಿರಬೇಕು. ಅಣ್ಣನನ್ನು ಈ ಪ್ರಕರಣದಲ್ಲಿ ಸಿಲುಕಿಸಿದ ಕುರಿತು ನಮಗೆ ಮಾಹಿತಿಯಿದೆ. ಅದರ ವಿರುದ್ಧ ಏನು ಮಾಡಬೇಕೋ ಅದನ್ನು ಮಾಡುತ್ತೇವೆ. ಅಣ್ಣ ತಪ್ಪು ಮಾಡಿಲ್ಲ ಎನ್ನುವುದು ಇವತ್ತಲ್ಲ ನಾಳೆ ಖಂಡಿತವಾಗಿಯೂ ತಿಳಿಯುತ್ತದೆ ಎಂದು ರವೀಂದ್ರ ನಾಯಕ್ ಪ್ರತಿಕ್ರಿಯಿಸಿದ್ದರು. ಅವರ ತಂದೆ ವಾಸು ನಾಯಕ್ ಈ ಸಂದರ್ಭದಲ್ಲಿ ಜತೆಗಿದ್ದರು.

ಮರ್ಡರ್ ಆದ ಗೌರಿಗೂ, ಆರೋಪಿ ಮೋಹನರಿಗೂ, ತನಿಖಾ ತಂಡದ ಮುಖ್ಯಸ್ಥ ಅನುಚೇತರಿಗೂ ಪುತ್ತೂರಿಗೂ ನಂಟು
ಪುತ್ತೂರಿಗೆ ಬರುತ್ತಿದ್ದ ಗೌರಿ ಲಂಕೇಶ್
ಕೊಲೆ ಪ್ರಕರಣದ ಓರ್ವ ಆರೋಪಿ ಪುತ್ತೂರಿನ ವ್ಯಕ್ತಿ ಎಂಬುದರ ಜತೆಗೆ ಗೌರಿ ಲಂಕೇಶ್ ಕೂಡ ಪುತ್ತೂರಿಗೆ ಬರುತ್ತಿದ್ದರು ಎಂಬುದು ಕಾಕತಾಳೀಯವಾಗಿದೆ. ಹೊಸನಗರ ಶ್ರೀರಾಮಚಂದ್ರಾಪುರ ಮಠದ ಶ್ರೀ ರಾಘವೇಶ್ವರ ಭಾರತಿ ಸ್ವಾಮೀಜಿಯವರ ವಿರುದ್ಧ ಪತ್ರಿಕೆಯಲ್ಲಿ ಮಾನಹಾನಿಕರ ಲೇಖನ ಪ್ರಕಟಿಸಿದ ಆರೋಪದಲ್ಲಿ ಕೇಶವ ಕೃಷ್ಣ ಎಂಬವರು ವಕೀಲ ಮಹೇಶ್ ಕಜೆಯವರ ಮೂಲಕ ಗೌರಿ ಲಂಕೇಶ್ ವಿರುದ್ಧ ಪುತ್ತೂರು ನ್ಯಾಯಾಲಯದಲ್ಲಿ ಕೇಸು ದಾಖಲಿಸಿದ್ದರು. ಈ ಕೇಸ್‌ನ ವಿಚಾರಣೆಗಾಗಿ ಗೌರಿ ಲಂಕೇಶ್‌ರವರು ಪುತ್ತೂರು ನ್ಯಾಯಾಲಯಕ್ಕೆ ಬರುತ್ತಿದ್ದರು. ಸರಿಯಾಗಿ ವಿಚಾರಣೆಗೆ ಹಾಜರಾಗದ ಅವರನ್ನು ವಾರೆಂಟ್ ಮೂಲಕ ಬಂಧಿಸಿ ಕರೆ ತರಲಾಗಿತ್ತು. ಜಾಮೀನಿನಲ್ಲಿ ಬಿಡುಗಡೆಗೊಂಡಿದ್ದ ಅವರು ಬಳಿಕ ನ್ಯಾಯಾಲಯದ ವಿಚಾರಣೆಗೆ ಹಾಜರಾಗುತ್ತಿದ್ದರು. ಪ್ರಕರಣದ ವಿಚಾರಣೆ ಮುಕ್ತಾಯವಾಗುವ ಮುಂಚೆಯೇ ಗೌರಿ ಲಂಕೇಶ್ ಮರ್ಡರ್ ಆಗಿದ್ದರು. ಕೇಸ್ ವಿಚಾರಣೆಗಾಗಿ ಗೌರಿ ಪುತ್ತೂರಿಗೆ ಬರುತ್ತಿದ್ದರೆ ಅವರ ಕೊಲೆ ಮಾಡಿದ ಆರೋಪಿಗಳಲ್ಲಿ ಓರ್ವ ಪುತ್ತೂರಿನವನೇ ಆಗಿದ್ದಾನೆ. ಇದರ ತನಿಖೆ ನಡೆಸಿದ ವಿಶೇಷ ತನಿಖಾ ತಂಡದ ಮುಖ್ಯಸ್ಥ ಅನುಚೇತ್ ಅವರು ಪುತ್ತೂರಿನಲ್ಲಿ ಎಎಸ್ಪಿಯಾಗಿದ್ದರು.

About The Author

Related posts

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.

Copy Protected by Chetan's WP-Copyprotect.