ನಗರ ಸಭೆ – ಸದ್ಯ ಆಸ್ತಿ ತೆರಿಗೆ ಪರಿಷ್ಕರಣೆ ಸರಕಾರಕ್ಕೆ ಪತ್ರ ಬರೆಯಲು ನಿರ್ಣಯ

0

 

ಪುತ್ತೂರು:ನಗರಸಭೆ ಆಸ್ತಿ ತೆರಿಗೆಯನ್ನು ನಿಯಮಾನುಸಾರ ಪರಿಷ್ಕರಣೆ ಮಾಡುವಂತೆ ಪೌರಾಡಳಿತ ನಿರ್ದೇಶನಾಲಯದಿಂದ ಸುತ್ತೋಲೆ ಬಂದಿದ್ದರೂ ಸದ್ಯಕ್ಕೆ ಯಾವುದೇ ಪರಿಷ್ಕರಣೆ ಮಾಡುವುದು ಬೇಡ ಎಂದು ಸದಸ್ಯರು ನಗರಸಭೆ ಸಾಮಾನ್ಯ ಸಭೆಯಲ್ಲಿ ಒಕ್ಕೊರಳಿನಿಂದ ಒತ್ತಾಯಿಸಿದ್ದಾರೆ.ಪರಿಣಾಮ ಯಥಾಸ್ಥಿತಿ ಕಾಪಾಡಲು ಸರಕಾರಕ್ಕೆ ಬರೆದುಕೊಳ್ಳಲಾಗುವುದು ಎಂದು ನಗರಸಭೆ ಅಧ್ಯಕ್ಷ ಕೆ.ಜೀವಂಧರ್ ಜೈನ್ ಅವರು ತಿಳಿಸಿದ್ದಾರೆ.

ನಗರಸಭೆ ಸಾಮಾನ್ಯ ಸಭೆಯು ಮಾ.೨೪ರಂದು ನಗರಸಭೆ ಮೀಟಿಂಗ್ ಹಾಲ್‌ನಲ್ಲಿ ಅಧ್ಯಕ್ಷ ಕೆ.ಜೀವಂಧರ್ ಜೈನ್ ಅವರ ಅಧ್ಯಕ್ಷತೆಯಲ್ಲಿ ನಡೆಯಿತು.ಪೌರಾಡಳಿತ ನಿರ್ದೇಶನಾಲಯ ಬೆಂಗಳೂರು ಇದರ ಸುತ್ತೋಲೆಯಂತೆ, ನಗರ ಸ್ಥಳೀಯ ಸಂಸ್ಥೆಗಳ ಆರ್ಥಿಕ ಸಬಲೀಕರಣ ಕಾಯ್ದೆಗಳನ್ವಯ ಪ್ರತಿ ಹಣಕಾಸು ವರ್ಷ ಚಾಲ್ತಿ ಸಾಲಿನ ಮಾರುಕಟ್ಟೆ ಮಾರ್ಗಸೂಚಿ ಬೆಲೆಗಳನ್ನು ಆಧರಿಸಿ ಆಸ್ತಿ ತೆರಿಗೆಯನ್ನು ನಿಯಮಾನುಸಾರ ಪರಿಷ್ಕರಣೆ ಮಾಡಬೇಕಾಗಿದೆ.ಮಾರ್ಚ್ ಮೊದಲ ವಾರದಲ್ಲಿ ಚಾಲ್ತಿಯಲ್ಲಿರುವ ಮಾರ್ಗಸೂಚಿ ಬೆಲೆಗಳನ್ನು ಆಧರಿಸಿ ಮುಂದಿನ ಹಣಕಾಸು ವರ್ಷದ ಆಸ್ತಿ ತೆರಿಗೆಯನ್ನು ನಿಗದಿ ಪಡಿಸುವಂತೆ ಸಭೆಯಲ್ಲಿ ಓದಿ ಹೇಳಲಾಯಿತು.ಈ ಸಂದರ್ಭ ಸದಸ್ಯ ಭಾಮಿ ಅಶೋಕ್ ಶೆಣೈ ಅವರು, ಈಗಾಗಲೇ ಕೋವಿಡ್ ಸಂದರ್ಭದಲ್ಲಿ ತೊಂದರೆ ಅನುಭವಿಸಿದವರಿಗೆ ತೆರಿಗೆ ಮತ್ತೆ ಹೊರೆಯಾಗಲಿದೆ ಎಂದು ಪ್ರಸ್ತಾಪಿಸಿದರು.ಎಲ್ಲಾ ಸ್ಥಳೀಯಾಡಳಿತದಲ್ಲಿ ಈ ವಿಚಾರವನ್ನು ಕೈ ಬಿಡುವ ಕೆಲಸ ಮಾಡಿದ್ದಾರೆ.ಇದರ ಜೊತೆಯಲ್ಲಿ ಕೋವಿಡ್ ಬಗ್ಗೆ ಸಾರ್ವಜನಿಕರಿಂದ ಬೇರೆ ಬೇರೆ ರೀತಿಯಲ್ಲಿ ಅರ್ಜಿಗಳನ್ನು ಬಂದ ಪ್ರಕಾರ ಸರಕಾರಕ್ಕೆ ಬರೆದುಕೊಂಡಿದ್ದೇವೆ ಎಂದು ಅಧ್ಯಕ್ಷರು ಹೇಳಿದರು.ಸದಸ್ಯ ಶಕ್ತಿ ಸಿನ್ಹಾ ಅವರು ಮಾತನಾಡಿ ಈ ಹಿಂದೆಯೂ ಜಿಲ್ಲಾಽಕಾರಿಗಳಿಗೆ ಪತ್ರ ಬರೆಯಲಾಗಿತ್ತು ಎಂದು ಪ್ರಸ್ತಾಪಿಸಿದರು.ಇದೀಗ ಸಾರ್ವಜನಿಕರ ಹಿತಾಸಕ್ತಿಯಿಂದ ಸರಕಾರಕ್ಕೆ ಬರೆದುಕೊಳ್ಳವುದು.ಆದರೆ ಈಗಾಗಲೇ ತೆರಿಗೆ ಬಾಕಿ ಮಾಡಿದವರು ತೆರಿಗೆಯನ್ನು ಪಾವತಿಸದಿದ್ದಲ್ಲಿ ಅವರಿಗೆ ನೊಟೀಸ್ ಜಾರಿ ಮಾಡಲಾಗುವುದು ಎಂದು ಅಧ್ಯಕ್ಷರು ಹೇಳಿದರು.

ಹಂಪ್ಸ್‌ಗಳಿಗೆ ಮುನ್ಸೂಚನೆ ಗುರುತು ಅಳವಡಿಸಿ: ನಗರಸಭೆ ವ್ಯಾಪ್ತಿಯಲ್ಲಿ ಈಗಾಗಲೇ ಹಲವು ಕಡೆ ರಸ್ತೆ ಹಂಪ್ಸ್ ಅಳವಡಿಸಲಾಗಿದೆ.ಆದರೆ ಈ ಕುರಿತು ಯಾವುದೇ ಮುನ್ಸೂಚನೆ ಇಲ್ಲದ್ದರಿಂದ ಹಲವು ಅಪಘಾತ ನಡೆದಿರುವ ಕುರಿತು ಪತ್ರಿಕೆಯಲ್ಲಿ ವರದಿಯಾಗಿದೆ.ಈ ನಿಟ್ಟಿನಲ್ಲಿ ಹಂಪ್ಸ್‌ಗಳಿದ್ದಲ್ಲಿ ಮುನ್ಸೂಚನೆ ನೀಡುವ ಬಿಳಿ ಪಟ್ಟಿಗಳನ್ನು ಅಳವಡಿಸುವಂತೆ ಸದಸ್ಯ ಶಕ್ತಿಸಿನ್ಹ ಅವರು ಪ್ರಸ್ತಾಪಿಸಿದರು.ಉತ್ತರಿಸಿದ ಅಧ್ಯಕ್ಷರು, ಈ ಕುರಿತು ಚರ್ಚಿಸಲಾಗಿದ್ದು,ಸಾರ್ವಜನಿಕರ ಬೇಡಿಕೆಯಂತೆ ಅವಶ್ಯಕತೆ ಇದ್ದ ಕಡೆ ಹಂಪ್ಸ್‌ಗಳನ್ನು ಅಳವಡಿಸಲಾಗಿದೆ.ವೈಜ್ಞಾನಿಕವಾಗಿ ಸರಿ ಇಲ್ಲದ ಹಂಪ್ಸ್‌ಗಳನ್ನು ಸರಿಪಡಿಸುವ ಕೆಲಸ ನಡೆಯುತ್ತಿದೆ.ಇದರ ಜೊತೆಗೆ ಎಲ್ಲಾ ಹಂಪ್ಸ್‌ಗಳಿಗೂ ರಿ-ಕ್ಟರ್ ಮತ್ತು ಬಿಳಿ ಬಣ್ಣ ಅಳವಡಿಸಲಾಗುತ್ತದೆ ಎಂದರು.

 


ನಗರಸಭೆಯಿಂದ ಸಾರ್ವಜನಿಕ ಸ್ಥಳದ ಸಿಸಿ ಕ್ಯಾಮರಾ ದುರಸ್ತಿ: ಪೊಲೀಸ್ ಇಲಾಖೆಯ ಸುಪರ್ದಿಯಲ್ಲಿರುವ,ನಗರಸಭೆ ವ್ಯಾಪ್ತಿಯ ಸಾರ್ವಜನಿಕ ಸ್ಥಳಗಳಲ್ಲಿರುವ ಸಿಸಿ ಕ್ಯಾಮರಾಗಳು ಕೆಟ್ಟು ಹೋಗಿದ್ದು, ಅದರ ದುರಸ್ತಿಗೆ ಇಲಾಖೆಯಿಂದ ಅನುದಾನದ ಕೊರತೆ ಇದ್ದು, ನಗರಸಭೆಯಿಂದ ಅದನ್ನು ದುರಸ್ತಿ ಪಡಿಸುವಂತೆ ಪೊಲೀಸ್ ಇಲಾಖೆ ಮನವಿ ಮಾಡಿದೆ ಎಂದು ಸಭೆಯಲ್ಲಿ ಓದಿ ಹೇಳಲಾಯಿತು.ಅಧ್ಯಕ್ಷರು ಮಾತನಾಡಿ, ಈ ಹಿಂದೆ ಮಹೇಶ್‌ಪ್ರಸಾದ್ ಅವರು ವೃತ್ತ ನಿರೀಕ್ಷಕರಾಗಿದ್ದ ಸಂದರ್ಭ ಎಲ್ಲಾ ಸಂಘ ಸಂಸ್ಥೆಗಳ ಸಹಯೋಗದೊಂದಿಗಿನ ಸಹಕಾರದಿಂದ ಸಿಸಿ ಕ್ಯಾಮರ ಅಳವಡಿಸಿದ್ದರು.ಇದೀಗ ಅದರ ದುರಸ್ತಿಗಾಗಿ ಪೊಲೀಸ್ ಇಲಾಖೆ ಮನವಿ ಮಾಡಿದೆ ಎಂದರು.ಭಾಮಿ ಅಶೋಕ್ ಶೆಣೈ ಅವರು ಮಾತನಾಡಿ, ಸಿಸಿ ಕ್ಯಾಮರಾ ದುರಸ್ತಿ ಮಾಡಿದರೆ ನಗರಸಭೆಗೂ ಪ್ರಯೋಜನ ಆಗುತ್ತದೆ.ಅಲ್ಲಲ್ಲಿ ಕಸ ಬಿಸಾಡುವವರನ್ನು ಪತ್ತೆ ಮಾಡಲು ಸಿಸಿ ಕ್ಯಾಮರಾ ದುರಸ್ತಿ ಅಗತ್ಯ ಎಂದರು.ನಗರಭೆಯಿಂದ ದುರಸ್ತಿ ಮಾಡುವ ಅವಕಾಶ ಇದ್ದರೆ ಅದನ್ನು ಮಾಡಬಹುದು ಎಂದರು.ಸದಸ್ಯ ಸುಂದರ ಪೂಜಾರಿ ಬಡಾವು ಧ್ವನಿಗೂಡಿಸಿದರು.

ಚರಂಡಿ ಹೂಳೆತ್ತಲು ಅನುದಾನ ಜಾಸ್ತಿ ಇರಿಸಿ: ನಗರಸಭೆ ವ್ಯಾಪ್ತಿಯಲ್ಲಿ ಹರಿಯುವ ಮುಖ್ಯ ರಾಜಾಕಾಲುವೆ ಮತ್ತು ವಾರ್ಡ್‌ಗಳಲ್ಲಿ ಮಳೆ ನೀರಿನ ಚರಂಡಿ ಹೂಳೆತ್ತುವ ಕಾರ್ಯಕ್ಕೆ ರೂ.೪೦ ಲಕ್ಷಕ್ಕೆ ಅಂದಾಜು ಪಟ್ಟಿ ತಯಾರಿಸಿರುವ ಕುರಿತು ಸಭೆಯಲ್ಲಿ ಓದಿ ಹೇಳಲಾಯಿತು.ಸದಸ್ಯ ಭಾಮಿ ಅಶೋಕ್ ಶೆಣೈ ಅವರು ಮಾತನಾಡಿ ರೂ.೪೦ ಲಕ್ಷ ಅನುದಾನ ಸಾಕಾಗುವುದಿಲ್ಲ.ವಾರ್ಡ್ ಗಳಲ್ಲಿ ಚರಂಡಿಗಳು ಹೆಚ್ಚಿರುವುದರಿಂದ ಅನುದಾನ ಹೆಚ್ಚಿಗೆ ಇಡುವಂತೆ ತಿಳಿಸಿದರು.ಸದಸ್ಯ ರಿಯಾಜ್ ಅವರು ಮಾತನಾಡಿ ಪ್ಯಾಕೇಜ್ ಟೆಂಡರ್ ಆಗಿರಲಿ.ಒಬ್ಬರಿಗೆ ಮಾತ್ರ ಕೊಡುವುದು ಬೇಡ.ಕೊನೆಗೆ ಮಳೆ ಮುಗಿದರೂ ಕಾಮಗಾರಿ ಪೂರ್ಣಗೊಳ್ಳುವುದಿಲ್ಲ ಎಂದರು.ಉತ್ತರಿಸಿದ ಅಧ್ಯಕ್ಷರು, ಪ್ಯಾಕೇಜ್ ಟೆಂಡರ್ ಅನ್ನು ಕರೆಯಲಾಗುವುದು ಎಂದರು.

ನೆಲ್ಲಿಗುಂಡಿ ರಸ್ತೆಗಾಗಿ ಭೂಸ್ವಾಽನ: ನೆಲ್ಲಿಗುಂಡಿ ದಲಿತ ಕಾಲೋನಿಗೆ ಹೋಗುವ ರಸ್ತೆ ಕಿರಿದಾಗಿದ್ದು, ವಾಹನ ಓಡಾಡಲು ರಸ್ತೆ ಅಗಲೀಕರಣಕ್ಕಾಗಿ ಅಗತ್ಯ ಇರುವಷ್ಟು ಜಮೀನನ್ನು ಭೂ ಸ್ವಾಽನ ಮಾಡಲು ಸಭೆಯಲ್ಲಿ ಪ್ರಸ್ತಾಪ ಮಾಡಲಾಯಿತು.ಸದಸ್ಯ ಶಕ್ತಿ ಸಿನ್ಹ ಅವರು ಮಾತನಾಡಿ ರಸ್ತೆಗಾಗಿ ಭೂ ಸ್ವಾಽನ ಮಾಡಬೇಕೆಂದರು.ಭಾಮಿ ಅಶೋಕ್ ಶೆಣೈ ಧ್ವನಿಗೂಡಿಸಿದರು.

ಸದಸ್ಯರು ತಿಳಿಸಿದಲ್ಲಿ ರಸ್ತೆ ಗುಂಡಿಗಳ ಪ್ಯಾಚ್‌ವರ್ಕ್‌ಗೆ ಸೂಚನೆ: ನಗರಸಭೆ ವಾರ್ಡ್ ಗಳಲ್ಲಿ ಸದಸ್ಯರು ತಿಳಿಸಿದಂತೆ ರಸ್ತೆಯಲ್ಲಿರುವ ಗುಂಡಿಗಳ ಪ್ಯಾಚ್‌ವರ್ಕ್ ಡಾಮರೀಕರಣ ಮಾಡಬೇಕು.ಈಗಾಗಲೇ ಒಂದಷ್ಟು ಕಡೆಗಳಲ್ಲಿ ಕಾಮಗಾರಿ ಬಾಕಿ ಆಗಿದೆ.ಹಲವು ದೂರುಗಳು ಬಂದಿವೆ.ಈ ನಿಟ್ಟಿನಲ್ಲಿ ಗುತ್ತಿಗೆದಾರರು ಮತ್ತು ಇಂಜಿನಿಯರ್‌ಗಳನ್ನು ಕರೆಸಿ ಮಾತನಾಡಿದ್ದೇನೆ.ಸದಸ್ಯರು ತೋರಿಸಿದ ರಸ್ತೆಗಳನ್ನು ಕಡ್ಡಾಯವಾಗಿ ಡಾಮರೀಕರಣ ಮಾಡಬೇಕೆಂದು ಸ್ಪಷ್ಟ ಸೂಚನೆ ನೀಡಿದ್ದೇನೆ ಎಂದು ಅಧ್ಯಕ್ಷರು ತಿಳಿಸಿದರು.

ಪೊಲೀಸರು ಜನಪ್ರತಿನಿಽಗಳಿಗೆ ಗೌರವ ಕೊಡುವುದನ್ನು ಕಲಿಯಬೇಕು: ಪೊಲೀಸ್ ಠಾಣೆಗಳಿಗೆ ಜನಪ್ರತಿನಿಧಿಗಳು ಹೋದಾಗ ಅವರನ್ನು ನೋಡಿಕೊಳ್ಳುವ ರೀತಿ ಸರಿಯಲ್ಲ.ಇದಕ್ಕೆ ಉದಾಹರಣೆಯಾಗಿ ಇತ್ತೀಚೆಗೆ ಒಂದು ಘಟನೆ ನಡೆದಿದೆ.ಈ ನಿಟ್ಟಿನಲ್ಲಿ, ಜನಪ್ರತಿನಿಧಿಗಳಿಗೆ ಗೌರವ ಕೊಡುವ ಕುರಿತು ಪೊಲೀಸರ ಸಭೆ ಕರೆಸುವುದು ಉತ್ತಮ ಎಂದು ಸದಸ್ಯ ಶಕ್ತಿಸಿನ್ಹ ಹೇಳಿದರು.

ಘನ ತ್ಯಾಜ್ಯ ವಿಲೇವಾರಿ ವಾಹನ ವಾರ್ಡ್‌ಗಳಿಗೆ ಹೋಗಿ ಬರುವಾಗ ಸುಲಭವಾಗುವಂತೆ ದೊಡ್ಡ ವಾಹನವೊಂದನ್ನು ನಿರ್ದಿಷ್ಟ ಸ್ಥಳದಲ್ಲಿ ನಿಲ್ಲಿಸಿ ಅದಕ್ಕೆ ತ್ಯಾಜ್ಯ ಡಂಪ್ ಮಾಡುವುದು ಉತ್ತಮ. ಆಗ ಸಮಯವೂ ಉಳಿಯುತ್ತದೆ ಎಂದು ಶಕ್ತಿಸಿನ್ಹ ಅವರು ಪ್ರಸ್ತಾಪಿಸಿದರು.ನಗರಸಭೆ ಉಪಾಧ್ಯಕ್ಷೆ ವಿದ್ಯಾ ಆರ್ ಗೌರಿ, ಸ್ಥಾಯಿ ಸಮಿತಿ ಅಧ್ಯಕ್ಷ ಬಾಲಚಂದ್ರ, ಪೌರಾಯುಕ್ತ ಮಧು ಎಸ್ ಮನೋಹರ್, ಸದಸ್ಯರಾದ ಪಿ.ಜಿ.ಜಗನ್ನಿವಾಸ ರಾವ್, ಶಿವರಾಮ ಎಸ್, ವಸಂತ ಕಾರೆಕ್ಕಾಡು, ಗೌರಿ ಬನ್ನೂರು, ಕೆ.-ತಿಮಾತ್ ಝೆರಾ, ಮೋಹಿನಿ ವಿಶ್ವನಾಥ ಗೌಡ, ಲೀಲಾವತಿ ಅಣ್ಣು ನಾಯ್ಕ, ಸುಂದರ ಪೂಜಾರಿ ಬಡಾವು, ರೋಬಿನ್ ತಾವ್ರೋ, ಪ್ರೇಮ್ ಕುಮಾರ್, ಶಕ್ತಿ ಸಿನ್ಹ, ಪದ್ಮನಾಭ ನಾಯ್ಕ ಪಡೀಲು, ಪ್ರೇಮಲತಾ ಜಿ, ಕೆ.ಸಂತೋಷ್ ಕುಮಾರ್, ನವೀನ್ ಕುಮಾರ್, ಯಶೋದಾ ಹರೀಶ್, ದೀಕ್ಷಾ ಪೈ, ಶಶಿಕಲಾ ಸಿ.ಎಸ್, ಮನೋಹರ್ ಕಲ್ಲಾರೆ, ರೋಹಿಣಿ ಕೇಶವ ಪೂಜಾರಿ, ಮಮತಾರಂಜನ್, ಬಿ.ಶೈಲಾ ಪೈ, ಯೂಸುಫ್ ಡ್ರೀಮ್, ಮಹಮ್ಮದ್ ರಿಯಾಜ್, ಶೀನಪ್ಪ ನಾಯ್ಕ, ಪೂರ್ಣಿಮಾ ಕೋಡಿಯಡ್ಕ ಸಭೆಯಲ್ಲಿ ಉಪಸ್ಥಿತರಿದ್ದರು. ಜಯಲಕ್ಷ್ಮೀ ಬೇಕಲ್ ಸಭಾ ನಡಾವಳಿಯನ್ನು ಓದಿದರು. ನಗರಸಭೆ ಅಭಿಯಂತರರು, ಅಽಕಾರಿಗಳು ಉಪಸ್ಥಿತರಿದ್ದರು.

ಜಾತ್ರೆಯ ಸಂದರ್ಭ ಸ್ವಚ್ಛತೆ ಇರಲಿ

ಪುತ್ತೂರು ಜಾತ್ರೆ ಬರುವ ಸಂದರ್ಭ ದೇವರ ಪೇಟೆ ಸವಾರಿ ಸೇರಿದಂತೆ ಪೇಟೆಯಲ್ಲಿ ಭಕ್ತರ ಸಂಖ್ಯೆ ಹೆಚ್ಚುತ್ತದೆ.ಈ ಸಂದರ್ಭ ದಾರಿ ದೀಪ ನಿರ್ವಹಣೆ ಸರಿಯಾಗಿರಬೇಕು.ಅದರ ಜೊತೆಗೆ ಜಾತ್ರೆಯ ಸಂದರ್ಭ ಬೇರೆ ಬೇರೆ ಊರುಗಳಿಂದ ಪುತ್ತೂರಿಗೆ ಬಂದವರು ಸ್ವಚ್ಛತೆಯನ್ನು ಕಾಪಾಡುವ ಕುರಿತು ಮನವರಿಕೆ ಮಾಡಬೇಕು.ಈಗಾಗಲೇ ನಗರಸಭೆ ಸ್ವಚ್ಛತೆಯಲ್ಲಿ ೩ನೇ ಸ್ಥಾನದಲ್ಲಿದೆ.ಮುಂದೆ ಅದನ್ನು ೧ನೇ ಸ್ಥಾನಕ್ಕೆ ಹೋಗುವ ಚಿಂತನೆಯಲ್ಲಿರುವಾಗ ಮತ್ತೆ ಸಮಸ್ಯೆ ಆಗಬಾರದು.ಈ ನಿಟ್ಟಿನಲ್ಲಿ ಮುಂದಿನ ದಿನ ವರ್ತಕರ ಸಂಘ ಸೇರಿದಂತೆ ಇತರ ಸಂಘ ಸಂಸ್ಥೆಗಳ ಸಭೆ ಕರೆಯಲಾಗುವುದು.
ಜೀವಂಧರ್ ಜೈನ್, ಅಧ್ಯಕ್ಷರು ನಗರಸಭೆ

ಪೌರ ಕಾರ್ಮಿಕರಿಗೆ ವಿಶ್ರಾಂತಿ ಕಂಟೈನರ್

ನಿರ್ಮಲ ನಗರ ಯೋಜನೆಯ ಅನುದಾನದಲ್ಲಿ ಪೌರ ಕಾರ್ಮಿಕರಿಗೆ ನಗರ ಪ್ರದೇಶದಲ್ಲೇ ವಿಶ್ರಾಂತಿ ಕೊಠಡಿ ತೆರಯುವುದಕ್ಕೆ ಸೂಚಿಸಿದಂತೆ ಈಗಾಗಲೇ ಟೆಂಡರ್ ಕರೆಯಲಾಗಿದೆ.ಈ ವಿಶ್ರಾಂತಿ ಕಂಟೈನರ್‌ನ್ನು ಎಲ್ಲಿಗೆ ಬೇಕಾದರೂ ಸ್ಥಳಾಂತರಿಸಬಹುದು.ಇದರ ಜೊತೆಗೆ ನಿರ್ಮಲ ನಗರ ಯೋಜನೆಯ ಅಡಿಯಲ್ಲಿ ನಗರಸಭೆ ೬ ಸಾವಿರ ಲೀಟರ್ ಸಾಮರ್ಥ್ಯದ ಸಕ್ಕಿಂಗ್ ಮೆಷಿನ್ ಖರೀದಿಸಲಾಗುತ್ತದೆ.ಈಗಾಗಲೇ ಇರುವ ೩ ಸಾವಿರ ಲೀಟರ್ ಸಾಮರ್ಥ್ಯದ ಸಕ್ಕಿಂಗ್ ಮೆಷಿನ್ ವಾಹನಕ್ಕೆ ೧೬ ವರ್ಷ ಆಗಿದೆ.ಮುಂದಿನ ನಗರದ ಅಭಿವೃದ್ಧಿಯ ದೃಷ್ಟಿಯಿಂದ ಯೋಜನೆ ಕೈಗೆತ್ತಿಕೊಳ್ಳಲಾಗಿದೆ ಎಂದು ಪೌರಾಯುಕ್ತ ಮಧು ಎಸ್.ಮನೋಹರ್ ಮಾಹಿತಿ ನೀಡಿದರು.

LEAVE A REPLY

Please enter your comment!
Please enter your name here