ಬಡಗನ್ನೂರು: ಬಡಗನ್ನೂರು ಗ್ರಾಮದ ತುಳಸಿಯಡ್ಕ ಅಂಗನವಾಡಿ ಕಾರ್ಯಕರ್ತೆ ಜಯಲಕ್ಷ್ಮಿ ನಾಯಕ್ ರವರಿಗೆ ಬಾಲವಿಕಾಸ ಸಮಿತಿ ಹಾಗೂ ಪೋಷಕಕರ ವತಿಯಿಂದ ಬೀಳ್ಕೊಡುಗೆ ಸಮಾರಂಭವು ಇತ್ತೀಚಿಗೆ ತುಳಸಿಯಡ್ಕ ಅಂಗನವಾಡಿ ಕೇಂದ್ರದಲ್ಲಿ ನಡೆಯಿತು.
ಬಡಗನ್ನೂರು ಗ್ರಾ.ಪಂ ಸದಸ್ಯರು, ಬಾಲವಿಕಾಸ ಸಮಿತಿ ಅಧ್ಯಕ್ಷ ಲಿಂಗಪ್ಪ ಗೌಡ ಮೋಡಿಕೆ ಮಾತನಾಡಿ, ಶಿಕ್ಷಕಿ ಜಯಲಕ್ಷ್ಮಿ ನಾಯಕ್ ರವರು ಕಳೆದ 22 ವರ್ಷಗಳಿಂದ ಅಂಗನವಾಡಿ ಕಾರ್ಯಕರ್ತರಾಗಿ ಉತ್ತಮ ಸೇವೆ ಮಾಡಿದ್ದಾರೆ, ಮಕ್ಕಳೊಂದಿಗೆ ಮಕ್ಕಳಾಗಿದ್ದುಕೊಂಡು ಮಕ್ಕಳಿಗೆ ಕಲಿಕೆಯೊಂದಿಗೆ ಕಥೆ, ಪದ್ಯ, ನೃತ್ಯ ಕಲಿಸುತ್ತಿದ್ದರು ಮತ್ತು ಇಲಾಖೆಯಿಂದ ಸಿಗುವ ಸೌಲಭ್ಯಗಳ ಜೊತೆಗೆ ಸ್ತ್ರೀ ಶಕ್ತಿ ಸಂಘದ ಸದಸ್ಯರ ವ್ಯಕ್ತಿತ್ವ ವಿಕಾಸ ಬೇಕಾದ ವಿವಿಧ ಮಾಹಿತಿ ಕಾರ್ಯಕ್ರಮಗಳನ್ನು ಮಾಡುತ್ತ ಎಲ್ಲರಿಗೂ ಪ್ರೀತಿಪಾತ್ರರಾಗಿದ್ದರು.ಇವರ ನಿವೃತ್ತಿ ಜೀವನ ಸುಖ ಶಾಂತಿ ನೆಮ್ಮದಿಯಾಗಿರಲಿ ಎಂದರು.
ಬಡಗನ್ನೂರು ಗ್ರಾ. ಪಂ ಸದಸ್ಯೆ ಹೇಮಾವತಿ ಮೋಡಿಕೆ, ಈಶ್ವರಮಂಗಲ ಪ್ರಾಥಮಿಕ ಆರೋಗ್ಯ ಕೇಂದ್ರ ಆರೋಗ್ಯ ಸಂರಕ್ಷಣಾಧಿಕಾರಿ ನಂದಿನಿ ಸಂಧರ್ಭೋಚಿತ ಮಾತನಾಡಿ, ಶುಭ ಹಾರೖೆಸಿದರು. ಸಭೆಯಿಂದ ಪೋಷಕರಾದ ವಿಜಯ ಎಸ್, ಅಬ್ದುಲ್ ರಝಾಕ್ ತಾಯಂದಿರಾದ ಅಲೀಮತ್ ನಾಫಿಯಾ,ಸೆಫಿಯಾ, ಸ್ತ್ರೀ ಶಕ್ತಿ ಸಂಘದ ಸದಸ್ಯರಾದ ವಿದ್ಯಾ ಭಟ್, ವಿಲಾಸಿನಿ ಸೊಣಗೇರಿ, ಕಿಶೋರಿ ಸಂಘದ ಕಾರ್ಯದರ್ಶಿ ಶರಣ್ಯ ಭಟ್, ಹಿರಿಯ ವಿದ್ಯಾರ್ಥಿಗಳಾದ ವಿನುತ, ಹಾಗೂ ಅಬೂಬಕ್ಕರ್ ಹಾಗೂ ಅಶ್ವಿನಿ ಮೂಂಡೋಕೊಚ್ಚಿ ಅನಿಸಿಕೆಗಳನ್ನು ವ್ಯಕ್ತಪಡಿಸಿ ಶುಭ ಹಾರೖೆಸಿದರು.
ಬೀಳ್ಕೊಡುಗೆ ಸಮಾರಂಭದಲ್ಲಿ ಆಭಿನಂದನೆ ಸ್ವೀಕರಿಸಿದ ಜಯಲಕ್ಷ್ಮಿ ನಾಯಕ್ ಮಾತನಾಡಿ, ಬಂಟ್ವಾಳ ತಾಲೂಕು ಮಂಚಿ ಗ್ರಾಮದ ಕುಕ್ಕಾಜೆ 1 ಅಂಗನವಾಡಿ ಕೇಂದ್ರದಲ್ಲಿ 1991 ರಲ್ಲಿ ಸೇವೆಯನ್ನು ಪ್ರಾರಂಭಿಸಿ ತದನಂತರ 2003 ರಲ್ಲಿ ವರ್ಗಾವಣೆಗೊಂಡು ಈ ಅಂಗನವಾಡಿ ಕೇಂದ್ರದಲ್ಲಿ ಸೇವೆ ಪ್ರಾರಂಬಿಸಿದ್ದೇನೆ. ಒಟ್ಟು 35 ವರ್ಷ ಸೇವೆಯಲ್ಲಿ 22 ವರ್ಷ ಈ ಅಂಗನವಾಡಿ ಕೇಂದ್ರದಾಗಿದೆ. ಈ 22 ವರ್ಷ ಸೇವೆಯಲ್ಲಿ ಸಮುದಾಯದ ಸಲಹೆ ಸಹಕಾರದಲ್ಲಿ ಅಂಗನವಾಡಿ ಕೇಂದ್ರ ಅಭಿವೃದ್ಧಿ ಜೊತೆಗೆ ತಮ್ಮಲ್ಲರ ಸಹಕಾರದಲ್ಲಿ ಉತ್ತಮ ಸೇವೆ ಮಾಡಲು ಸಾಧ್ಯವಾಗಿದೆ ಎಂದು ಹೇಳಿದರು.
ಸಭೆಯಲ್ಲಿ ಹಿರಿಯ ಪೋಷಕರಾದ ಸುಬ್ರಹ್ಮಣ್ಯ ಭಟಾ ಪಾದೆಕರ್ಯ, ಪೋಷಕ ಶಿವಪ್ರಸಾದ್ ಪರಮೇಶ್ವರ ಮೂಲೆ, ಹಾಗೂ ಬಾಲವಿಕಾಸ ಸಮಿತಿ ಸದಸ್ಯರು, ಮಕ್ಕಳ ಪೋಷಕರು, ಸ್ತ್ರೀ ಶಕ್ತಿ ಸ್ವ ಸಹಾಯ ಸಂಘದ ಸದಸ್ಯರು ಹಾಗೂ ಊರಿನವರು ಉಪಸ್ಥಿತರಿದ್ದರು.ಅಂಬಟೆಮೂಲೆ ಅಂಗನವಾಡಿ ಕೇಂದ್ರದ ಕಾರ್ಯಕರ್ತೆ ವೀಣಾ ಸ್ವಾಗತಿಸಿ, ಕಾರ್ಯಕ್ರಮ ನಿರೂಪಿಸಿದರು.ಗ್ರಾ. ಪಂ ಸದಸ್ಯೆ ಹೇಮಾವತಿ ವಂದಿಸಿದರು.
ಅಭಿನಂದನಾ ಕಾರ್ಯಕ್ರಮ
ಅಂಗನವಾಡಿ ಕಾರ್ಯಕರ್ತೆ ಜಯಲಕ್ಷ್ಮಿ ನಾಯಕ್ ರವರನ್ನು ಬಾಲವಿಕಾಸ ಸಮಿತಿ, ಪೋಷಕರು ಮತ್ತು ಸ್ತ್ರೀ ಶಕ್ತಿ ಸಂಘಗಳ ವತಿಯಿಂದ ಗೌರವಿಸಿದರು.
