ಪುತ್ತೂರು: ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನ ಸಂರಕ್ಷಣಾ ಸಮಿತಿ ವತಿಯಿಂದ ಪುತ್ತೂರು ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಕ್ಕೆ 3ನೇ ಕಂತಿನ ರೂಪದಲ್ಲಿ ಅಕ್ಕಿ, ಬೆಲ್ಲ, ತೊಗರಿಬೇಳೆ, ಕಡ್ಲೆಬೇಳೆಯನ್ನು ಡಿ.2ರಂದು ಸಮರ್ಪಣೆ ಮಾಡಲಾಯಿತು.
ಸಮಿತಿಯು ಮೊದಲ ಬಾರಿ ಒಂದು ಕ್ವಿಂಟಾಲ್ ಅಕ್ಕಿ, ಎರಡನೇ ಬಾರಿ ಎರಡು ಕ್ವಿಂಟಾಲ್ ಅಕ್ಕಿ, ಇದೀಗ ಮೂರನೇ ಬಾರಿ 2.51 ಕ್ವಿಂಟಾಲ್ ಅಕ್ಕಿ ನೀಡಿದೆ. 60 ಕೆಜಿ ತೊಗರಿಬೇಳೆ, 60 ಕೆಜಿ ಕಡ್ಲೆಬೇಳೆ, 1 ಕ್ವಿಂಟಾಲ್ ಬೆಲ್ಲ. ಇದು ಭಕ್ತರು ನೀಡಿದ ಹಣವನ್ನು ಒಟ್ಟುಗೂಡಿಸಿ ನೀಡಿದ್ದಾರೆ. ದೇವರ ನಡೆಯಲ್ಲಿ ದೇವಸ್ಥಾನದ ಪ್ರಧಾನ ಅರ್ಚಕ ವೇ.ಮೂ ವಿ.ಎಸ್ ಭಟ್ ಪ್ರಾರ್ಥನೆ ಮಾಡಿ ಪ್ರಸಾದ ವಿತರಿಸಿದರು. ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷ ಈಶ್ವರ ಭಟ್ ಪಂಜಿಗುಡ್ಡೆ ಅವರು ಸಮಿತಿ ಪ್ರಮುಖರಿಗೆ ದೇವಳದ ಗೌರವಾರ್ಥವಾಗಿ ಶಲ್ಯ ತೊಡಿಸಿದರು.
ಸಮಿತಿಯಿಂದ ಕಿಂಚಿತ್ ದೇವರಿಗೆ ಕಾಣಿಕೆ
ಶ್ರೀ ಮಹಾಲಿಂಗೇಶ್ವರ ಸಂರಕ್ಷಣಾ ಸಮಿತಿ ಪ್ರಮುಖರಾಗಿರುವ ಹರಿಪ್ರಸಾದ್ ನೆಲ್ಲಿಕಟ್ಟೆ ಅವರು ಮಾತನಾಡಿ ಭಕ್ತರೇ ಸೇರಿಕೊಂಡು ಸಮಿತಿ ರಚಿಸಿದ್ದೇವೆ. ಕೆಲ ಲೋಪಗಳು ಕಂಡುಬಂದಾಗ ಅದನ್ನು ಸರಿಪಡಿಸುವ ಕೆಲಸ ಮಾಡುತ್ತಾ ಬಂದೆವು. ದೇವರ ದಯೆಯಿಂದ ಅವೆಲ್ಲವೂ ಸರಿಯಾಗುತ್ತಾ ಬಂದಿತು. ಇದರೊಂದಿಗೆ ಸಮಿತಿ ವತಿಯಿಂದ ದೇವಸ್ಥಾನಕ್ಕೆ ಕಿಂಚಿತ್ ಕಾಣಿಕೆ ನೀಡುವ ಸಂಕಲ್ಪ ಮಾಡಿದೆವು. ಅದರ ಪ್ರಕಾರ ಇದು ಮೂರನೇ ಬಾರಿ ಅಕ್ಕಿ, ಬೆಲ್ಲ, ತೊಗರಿಬೇಳೆ, ಕಡ್ಲೆಬೇಳೆ ನೀಡಿದ್ದೇವೆ ಎಂದರು.
ರಾಜಕೀಯ, ಆಡಳಿತ ಸಮಿತಿ ವಿರುದ್ಧ ಅಲ್ಲ
ಅನಿಲ್ ಕುಮಾರ್ ಕಣ್ಣರ್ನೂಜಿ ಮಾತನಾಡಿ, ದೇವಸ್ಥಾನದ ಪಾವಿತ್ರ್ಯ ಉಳಿಸುವ ನಿಟ್ಟಿನಲ್ಲಿ ಸಮಿತಿ ಕೆಲಸ ಮಾಡುತ್ತಿದೆ. ಇದು ರಾಜಕೀಯ, ಆಡಳಿತ ಸಮಿತಿಯ ವಿರುದ್ಧ ಅಲ್ಲ. ಲೋಪಗಳು ಕಂಡುಬಂದಾಗ ಅದರ ಬಗ್ಗೆ ಮನವಿ ನೀಡಿದ್ದೇವೆ. ವ್ಯವಸ್ಥೆಗಳು ಸರಿಯಾಗುತ್ತಿದೆ. ಇಂದು ಭಕ್ತರೇ ಸೇರಿಕೊಂಡು ಸಣ್ಣ ಕಾಣಿಕೆ ನೀಡಿದ್ದೇವೆ ಎಂದರು.
ಅಧ್ಯಕ್ಷರು ಉತ್ತಮ ಕಾರ್ಯ ಮಾಡುತ್ತಿದ್ದಾರೆ
ಬಾಲಚಂದ್ರ ಸೊರಕೆ ಮಾತನಾಡಿ, ದೇವಳದ ಅಭಿವೃದ್ಧಿಗೆ ಸಂಬಂಧಿಸಿ 2014ರಿಂದಲೇ ವೈಯಕ್ತಿಕವಾಗಿ ಮನವಿ ನೀಡುತ್ತಾ ದೇವಸ್ಥಾನದ ಕಾರ್ಯದಲ್ಲಿ ತೊಡಗಿಕೊಂಡಿದ್ದೆ. ಒಂದು ವರ್ಷದ ಹಿಂದೆ ಇದನ್ನು ಸಂರಕ್ಷಣಾ ಸಮಿತಿಯ ಮೂಲಕ ಮಾಡಿಕೊಂಡು ಬರುತ್ತಿದ್ದೇವೆ. ಮೊದಲು ದೇವಳದ ಅಂಗಣಕ್ಕೆ ಚಪ್ಪಲಿ ಹಾಕಿ ಬರ್ತಾ ಇದ್ರು. ಈಗ ಕಡಿಮೆ ಆಗಿದೆ. ಈಗಿನ ವ್ಯವಸ್ಥಾಪನಾ ಸಮಿತಿ ಅಧ್ಯಕ್ಷರು ಉತ್ತಮ ಕಾರ್ಯ ಮಾಡುತ್ತಿದ್ದಾರೆ ಎಂದರು.
ಸಮಿತಿಯ ಪದ್ಮನಾಭ, ರಾಜೇಶ್ ಸೌಪರ್ಣಿಕಾ, ಜಯರಾಮ ರೈ, ಚಂದ್ರ, ಮನೋಹರ್ ಶೆಟ್ಟಿ ಪಡೀಲ್, ಸಂದೇಶ್ ನಾಯ್ಕ್, ಮೊದಲಾದವರು ಉಪಸ್ಥಿತರಿದ್ದರು.
