ಪುತ್ತೂರು: ರಾಜ್ಯದ ಪ್ರತಿಷ್ಟಿತ ಮಂಗಳೂರಿನ ಇಂಡಿಯಾನ ಹಾಸ್ಪಿಟಲ್ & ಹಾರ್ಟ್ ಇನ್ಸ್ಟಿಟ್ಯೂಟ್ ನ ಚೀಫ್ ಇಂಟರ್ವೆನ್ಶನ್ ಹೃದ್ರೋಗ ತಜ್ಞ ಡಾ. ಯೂಸುಫ್ ಕುಂಬ್ಳೆಯವರನ್ನು ವೈದ್ಯಕೀಯ ಕ್ಷೇತ್ರದಲ್ಲಿ ಸೇವೆ ಸಲ್ಲಿಸುತ್ತಿರುವ ಸ್ವಯಂ ಸೇವಾ ಸಂಸ್ಥೆಯಾದ ಫಾತಿಮಾ ಫೌಂಡೇಶನ್ ವತಿಯಿಂದ ಮಂಗಳೂರು ತಾಜ್ ವಿವಾಂತದಲ್ಲಿ ಸನ್ಮಾನಿಸಲಾಯಿತು.
ಅಧ್ಯಕ್ಷತೆಯನ್ನು ಇಂಡಿಯಾನ ಹಾಸ್ಪಿಟಲ್ & ಹಾರ್ಟ್ ಇನ್ಸ್ಟಿಟ್ಯೂಟ್ ಛೇರ್ಮನ್ ಪ್ರೊ. ಅಲಿ ಕುಂಬ್ಳೆ ವಹಿಸಿದ್ದರು. ಅಭಿನಂದನಾ ಭಾಷಣ ಮಾಡಿದ ಲಯನ್ಸ್ ಜಿಲ್ಲಾ ಮಾಜಿ ಉಪ ರಾಜ್ಯಪಾಲ ಎಂ.ಬಿ. ಸದಾಶಿವ ಮಾತನಾಡಿ, ಡಾ. ಯೂಸುಫ್ ಕುಂಬ್ಳೆ ಮಂಗಳೂರಿನಲ್ಲಿ ವಿಶ್ವ ದರ್ಜೆಯ ಸೂಪರ್ ಸ್ಪೆಷಾಲಿಟಿ ಹಾರ್ಟ್ ಇನ್ಸ್ಟಿಟ್ಯೂಟ್ ಪ್ರಾರಂಭಿಸಿದ್ದರಿಂದ ಕಾರ್ಪೊರೇಟ್ ಆಸ್ಪತ್ರೆ ಗಳು ಮಂಗಳೂರಿಗೆ ಬರಲಿಲ್ಲ 2002ರಲ್ಲಿ ದೆಹಲಿಯ ಏಮ್ಸ್ ನಿಂದ ಪದವಿ ಪಡೆದ ಪ್ರಥಮ ಮುಸ್ಲಿಂ ಕಾರ್ಡಿಯೋಲಜಿ ಎಂಬ ಹೆಗ್ಗಳಿಕೆ ಗೆ ಪಾತ್ರರಾದರು. 2006 ರಲ್ಲಿ ಕರ್ನಾಟಕ ರಾಜ್ಯದ ಪ್ರಥಮ ರೇಡಿಯಲ್ ಆರ್ಟರಿ ಅಂಜಿಯೋಪ್ಲಾಸ್ಟಿ ನಿರ್ವಹಿಸಿದರು. 25000 ರೇಡಿಯಲ್ ಅಂಜಿಯೋಪ್ಲಾಸ್ಟಿ ನಿರ್ವಹಿಸಿರುವ ಕುಂಬ್ಳೆ ವೈದ್ಯಕೀಯ ಕ್ಷೇತ್ರದ ಅಜಾತ ಶತ್ರು ಎಂದರು.
ಸುಳ್ಯ ನಗರ ಯೋಜನಾ ಪ್ರಾಧಿಕಾರ ( ಸೂಡ ) ಅಧ್ಯಕ್ಷ ಕೆ. ಎಂ. ಮುಸ್ತಫ, ಕರ್ನಾಟಕ ರಾಜ್ಯ ಮುಸ್ಲಿಂ ಜಮಾಅತ್ ಪ್ರದಾನ ಕಾರ್ಯದರ್ಶಿ ಡಾ. ಅಬ್ದುರ್ರಶೀದ್ ಝ್ಯನಿ ಖಾಮಿಲ್ ಸಖಾಫಿ ಸನ್ಮಾನ ನೆರವೇರಿಸಿದರು. ರಾಜೀವ್ ಗಾಂಧಿ ಆರೋಗ್ಯ ವಿಜ್ಞಾನ ವಿಶ್ವ ವಿದ್ಯಾನಿಲಯದ ಉಪ ಕುಲಪತಿ ಡಾ. ಭಗವಾನ್ ಬಿ. ಸಿ. ಮಂಗಳೂರಿನ ಹಿರಿಯ ಹೃದ್ರೋಗ ತಜ್ಞ ಡಾ ಆರ್ ಎಲ್ ಕಾಮತ್, ಕಣ ಚೂರು ಮೆಡಿಕಲ್ ಕಾಲೇಜು ಮುಖ್ಯ ವೈದ್ಯಾಧಿಕಾರಿ ಡಾ ಮಹಮ್ಮದ್ ಇಸ್ಮಾಯಿಲ್, ಇಂಡಿಯಾನ ಹಾಸ್ಪಿಟಲ್ ನಿರ್ದೇಶಕರಾದ ಡಾ ನಿಹಾಲ್ ಅಲಿ ಕುಂಬ್ಳೆ, ಡಾ. ಅಪೂರ್ವ, ಶ್ರೀ ಜಯದೇವ್, ಆಡಳಿತ ವಿಭಾಗ ನಿರ್ದೇಶಕ ಡಾ. ಆದಿತ್ಯ ಭಾರದ್ವಾಜ್ ಉಪಸ್ಥಿತರಿದ್ದರು.
