ಉಪ್ಪಿನಂಗಡಿ: ವಾಹನಗಳ ಚಕ್ರ ಪಂಕ್ಚರ್ ಆದರೆ ತಡ ರಾತ್ರಿಯವರೆಗೂ ಸೇವೆ ನೀಡುತ್ತಾ ವಾಹನ ಚಾಲಕರಿಗೆ ಆಪದ್ಭಾಂಧವರಾಗಿದ್ದ 34 ನೇ ನೆಕ್ಕಿಲಾಡಿ ಬೊಳ್ಳಾರ್ ಎಂಬಲ್ಲಿನ ಜಯರಾಮ ಎಂಬವರ ಟಯರ್ ವರ್ಕ್ಸ್ ಶಾಪ್ ನಿಂದ ಜಾಕ್, ಟ್ಯೂಬ್ ಸಹಿತ 45 ಸಾವಿರಕ್ಕೂ ಮಿಕ್ಕಿದ ಸೊತ್ತುಗಳನ್ನು ಕಳ್ಳರು ಕದ್ದೊಯ್ದ ಘಟನೆ ಬುಧವಾರ ರಾತ್ರಿ ಸಂಭವಿಸಿದೆ.
ಬುಧವಾರ ಮಧ್ಯ ರಾತ್ರಿಯವರೆಗೆ ವರ್ಕ್ಸ್ ಶಾಪ್‌ನಲ್ಲಿದ್ದು ಬಳಿಕ ಇವರು ಮನೆಗೆ ತೆರಳಿದ್ದು, ಆ ಬಳಿಕ ಇವರ ಅಂಗಡಿಗೆ ನುಗ್ಗಿದ ಕಳ್ಳರು, ಬೀಗವನ್ನು ಮುರಿದು ಅಂಗಡಿಯಲ್ಲಿದ್ದ ಹಲವು ವಾಹನಗಳಿಗೆ ಬಳಸುವ ಜಾಕ್‌ಗಳನ್ನು, ಹೊಸ ಟ್ಯೂಬ್‌ಗಳನ್ನು , ಟಯರ್ ಪ್ಲೇಟ್‌ಗಳನ್ನು ಕದ್ದೊಯ್ದಿದ್ದಾರೆ. ಈ ಮೂಲಕ ವಾಹನಗಳ ಸಂಕಷ್ಟ ಕಾಲದಲ್ಲಿ ಸಹಾಯ ಸಹಕಾರ ನೀಡುವ ಜಯರಾಮ ರವರ ಕಾರ್ಯಕ್ಕೆ ತಡೆಯನ್ನೊಡ್ಡಿದ್ದಾರೆ. ಘಟನೆಗೆ ಸಂಬಂಧಿಸಿ ಉಪ್ಪಿನಂಗಡಿ ಪೊಲೀಸರಿಗೆ ದೂರು ನೀಡಲಾಗಿದ್ದು, ಪೊಲೀಸರು ಘಟನಾ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ.
