ಪುತ್ತೂರು:ಚಾಲಕನ ನಿಯಂತ್ರಣ ತಪ್ಪಿ ಕಾರೊಂದು ರಸ್ತೆ ಬದಿ ನಿಲ್ಲಿಸಿದ್ದ ದ್ವಿಚಕ್ರ ವಾಹನಗಳು ಹಾಗೂ ತಡೆಬೇಲಿಗೆ ಡಿಕ್ಕಿ ಹೊಡೆದ ಘಟನೆ ನ.7ರಂದು ಸಂಜೆ ನಗರದ ಮುಖ್ಯರಸ್ತೆಯ ಹರಿಪ್ರಸಾದ್ ಹೊಟೇಲ್ ಮುಂಭಾಗದಲ್ಲಿ ನಡೆದಿದೆ.
ಬೊಳುವಾರು ಕಡೆಯಿಂದ ಬಂದ ಮಾರುತಿ ಡಿಸೈರ್(ಕೆಎ01ಎಂ.ಎಸ್5984) ಕಾರು ಚಾಲಕ ನಿಯಂತ್ರಣ ತಪ್ಪಿ ಮುಖ್ಯರಸ್ತೆಯ ಹರಿಪ್ರಸಾದ್ ಹೊಟೇಲ್ ಮುಂಭಾಗದಲ್ಲಿಯವ ಪಾರ್ಕಿಂಗ್ ಕಡೆಗೆ ನುಗ್ಗಿದೆ. ಅಪಘಾತದಿಂದ ರಸ್ತೆ ಬದಿ ನಿಲ್ಲಿಸಿದ್ದ 5 ದ್ವಿಚಕ್ರ ವಾಹನ ಹಾಗೂ ಒಂದು ಎಲೆಕ್ಟ್ರಿಕ್ ರಿಕ್ಷಾಕ್ಕೆ ಡಿಕ್ಕಿ ಹೊಡೆದಿದ್ದು ಜಖಂಗೊಂಡಿದೆ. ಪಾರ್ಕಿಂಗ್‌ನ ತಡೆಬೇಲಿಗೂ ಹಾನಿಯಾಗಿದೆ. ಪಾದಾಚಾರಿ ಮಹಿಳೆಯೊಬ್ಬರು ಸಣ್ಣಪುಟ್ಟ ಗಾಯಗಳೊಂದಿಗೆ ಪಾರಾಗಿದ್ದಾರೆ.
ತಪ್ಪಿದ ಬಾರೀ ದುರಂತ:
ನಿತ್ಯ ಜನ ಸಂದಣಿಯಲ್ಲಿರುತ್ತಿದ್ದ ರಸ್ತೆ ಬದಿಯಲ್ಲಿ ಅಪಘಾತ ನಡೆದ ಸಂದರ್ಭದಲ್ಲಿ ಯಾರೂ ಇರಲಿಲ್ಲ. ಮಹಿಳೆಯೊಬ್ಬರು ಸಣ್ಣ ಪುಟ್ಟ ಗಾಯಗಳೊಂದಿಗೆ ಪಾರಾಗಿದ್ದಾರೆ. ಅಲ್ಲದೆ ಅಪಘಾತ ನಡೆದ ಸ್ಥಳದ ಸಮೀಪವೇ ವಿದ್ಯುತ್ ಟ್ರಾನ್ಸ್‌ಫಾರ್ಮರ್ ಇದ್ದು ಸ್ವಲ್ಪವೇ ಅಂತರದಲ್ಲಿ ಬಾರಿ ದುರಂತದಿಂದ ಪಾರಾಗಿದ್ದಾರೆ.
