ಪುತ್ತೂರು: ಕೇರಳ-ಕರ್ನಾಟಕ ಗಡಿಪ್ರದೇಶದಲ್ಲಿ ನಿಷೇಧಿತ ಎಂಡೋಸಲ್ಫಾನ್ ಕೀಟನಾಶಕವನ್ನು ಅವೈಜ್ಞಾನಿಕವಾಗಿ ಮಣ್ಣಿನಡಿ ಹುಗಿದು ಹಾಕಿದ್ದು ನೂರಾರು ಬ್ಯಾರಲ್‌ಗಳು ಕಾಣೆಯಾಗಿರುವ ಬಗ್ಗೆ ತನಿಖೆ ನಡೆಸಿದ ರಾಷ್ಟ್ರೀಯ ಹಸಿರು ನ್ಯಾಯಮಂಡಳಿ, ಕಾಣೆಯಾದ ಎಂಡೋ ಬ್ಯಾರಲ್‌ಗಳ ಬಗ್ಗೆ ಸಮಗ್ರ ತನಿಖೆ ನಡೆಸುವಂತೆ ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ, ಕೇರಳ ತೋಟಗಾರಿಕೆ ನಿಗಮ ಹಾಗೂ ಕೇರಳ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿಗೆ ಸೂಚಿಸಿದೆ.ಅಲ್ಲದೆ ಜನವರಿ ಮೊದಲ ವಾರದಲ್ಲಿ ಈ ಕುರಿತು ವಿಸ್ತೃತ ವರದಿ ಸಲ್ಲಿಸುವಂತೆ ನಿರ್ದೇಶಿಸಿದೆ.
ಅತ್ಯಂತ ವಿಷಕಾರಿ ಎಂಡೋಸಲ್ಫಾನ್ ಕೀಟನಾಶಕವನ್ನು 2011ರಲ್ಲಿ ಸುಪ್ರೀಂಕೋರ್ಟ್ ನಿಷೇಧಿಸಿತ್ತು. 2024ರ ಜನವರಿಯಲ್ಲಿ ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ ಸಲ್ಲಿಸಿದ್ದ ತನ್ನ ಮೊದಲ ವರದಿಯಲ್ಲಿ ಕೇರಳದ ಗಡಿಭಾಗವಾದ ಮಿಂಚಿಪದವು ಎಂಬಲ್ಲಿ 278 ಬ್ಯಾರಲ್ ಎಂಡೋಸಲಾನ್ ಇದೆ ಎಂದು ಹೇಳಿತ್ತು.ಆದರೆ ಮಂಡಳಿಗೆ ಕೇವಲ 20 ಬ್ಯಾರಲ್ ಎಂಡೋಸಲ್ಫಾನ್ ಮಾತ್ರ ಪತ್ತೆ ಹಚ್ಚಿ ನಾಶಪಡಿಸಲು ಸಾಧ್ಯವಾಗಿತ್ತು. ಆನಂತರ 2025ರ ಜುಲೈ 16ರಂದು ನೀಡಿದ ವರದಿಯಲ್ಲಿ 69 ಬ್ಯಾರಲ್‌ಗಳನ್ನು ಪತ್ತೆಹಚ್ಚಲಾಗಿದೆ ಎಂದು ಹೇಳಿತ್ತು. ಈ ಭಿನ್ನ ಅಭಿಪ್ರಾಯದ ಹಿನ್ನೆಲೆಯಲ್ಲಿ ಪರಿಸರ ಹೋರಾಟಗಾರ ಉಡುಪಿಯ ಮಾನವ ಹಕ್ಕು ಸಂರಕ್ಷಣಾ ಪ್ರತಿಷ್ಠಾನದ ಅಧ್ಯಕ್ಷ ಡಾ|ರವೀಂದ್ರ ಶ್ಯಾನುಭಾಗ್ ಅವರು, ಕೇರಳ-ಕರ್ನಾಟಕ ಗಡಿಭಾಗದ ಗುಡ್ಡಪ್ರದೇಶದಲ್ಲಿ ಎಂಡೋಸಲ್ಫಾನ್ ನ್ನು ಅವೈಜ್ಞಾನಿಕವಾಗಿ, ಅಕ್ರಮವಾಗಿ ವಿಲೇವಾರಿ ಮಾಡಲಾಗಿದೆ ಎಂದು ಹೇಳಿ,ಕಾಣೆಯಾದ ಎಂಡೋ ಬ್ಯಾರೆಲ್‌ಗಳನ್ನು ಪತ್ತೆಹಚ್ಚುವಂತೆ ರಾಷ್ಟ್ರೀಯ ಹಸಿರು ನ್ಯಾಯ ಮಂಡಳಿಗೆ ಆಗ್ರಹಿಸಿದ್ದರು. ಭೂಗರ್ಭ ಜಲ ಮೇಲ್ವಿಚಾರಣೆಯ ಕೊರತೆ ಹಾಗೂ ಕಾಸರಗೋಡು ಜಿಲ್ಲೆಯ 45 ಸ್ಥಳೀಯಾಡಳಿತ ಪ್ರದೇಶದಲ್ಲಿ 6,6೦೦ ಎಂಡೋಸಲಾನ್ ಬಾಧಿತರಿರುವುದು ಪತ್ತೆಯಾಗಿದೆ.
ಹಲವು ಬಾವಿಯಲ್ಲಿ ವಿಲೇವಾರಿ: ಕೇರಳದ ಮಿಂಚಿಪದವು ಗೇರುತೋಟ 141.70 ಹೆಕ್ಟೇರ್ ಭಾಗದಲ್ಲಿ ಹರಡಿಕೊಂಡಿದ್ದು, ಅಲ್ಲಲ್ಲಿ ಬಾವಿ ನಿರ್ಮಾಣ ಮಾಡಲಾಗಿತ್ತು.ಎಂಡೋಸಲ್ಫಾನ್ ಬಳಕೆ ನಿಷೇಧ ಮಾಡುತ್ತಿದ್ದಂತೆ ದಾಸ್ತಾನು ಇರಿಸಿದ್ದ ಎಂಡೋಸಲ್ಫಾನ್ ನ್ನು ಈ ಬಾವಿಗಳಲ್ಲಿ ವಿಲೇವಾರಿ ಮಾಡಲಾಗಿದೆ.ಒಂದು ಬಾವಿ ಪತ್ತೆಯಾಗಿದೆಯಾದರೂ ತೋಟದಲ್ಲಿ ಹಲವು ಬಾವಿಗಳಲ್ಲಿ ವಿಲೇವಾರಿ ಮಾಡಿ ಮುಚ್ಚಿರುವ ಆರೋಪ ಕೇಳಿಬಂದಿತ್ತು.
ಬಾವಿ ಪರಿಶೀಲನೆ, ಮಣ್ಣು, ನೀರಿನ ಸ್ಯಾಂಪಲ್ ಸಂಗ್ರಹ: ಕೇಂದ್ರ ಮಾಲಿನ್ಯ ನಿಯಂತ್ರಣ ಮಂಡಳಿ ಬೆಂಗಳೂರು ಇದರ ಅಧಿಕಾರಿಗಳ ತಂಡ ಮಿಂಚಿಪದವುಗೆ ಕಳೆದ ವರ್ಷ ಭೇಟಿ ನೀಡಿತ್ತು. ಕೇರಳ ಪ್ಲಾಂಟೇಶನ್ ಕಾರ್ಪೊರೇಶನ್ ಕಛೇರಿಗೆ ತೆರಳಿ ಮಾಹಿತಿ ಪಡೆದು ಬಳಿಕ ಕಚೇರಿ ಪರಿಸರದ ಬಾವಿ, ಅಲ್ಲಿನ ಗೋದಾಮಿನಲ್ಲಿದ್ದ ಎಂಡೋಸಲ್ಪಾನ್ ಡಬ್ಬಗಳಿಂದ ಮಾದರಿ ಸಂಗ್ರಹ, ಇಲ್ಲಿಂದ ಒಂದುವರೆ ಕಿ.ಮೀ. ದೂರದಲ್ಲಿ, ಎಂಡೋಸಲ್ಪಾನ್ ಹಾಕಲಾಗಿದೆ ಎನ್ನುವ ಬಾವಿಯ ಪರಿಶೀಲನೆ ನಡೆಸಿ ಬಾವಿಯಿಂದ ನೀರಿನ ಸ್ಯಾಂಪಲ್, ಮೇಲ್ಪದರದ ಒಂದು ಅಡಿ ಆಳದಿಂದ ಮಣ್ಣನ್ನು ಸಂಗ್ರಹಿಸಿತ್ತು.ಅಲ್ಲದೆ ಈಶ್ವರಮಂಗಲದ ನೆಟ್ಟಣಿಗೆ ಮುಡ್ನೂರು ಪಂಚಾಯತ್ ಕಚೇರಿ ಸಮೀಪದ ಬಾವಿ ನೀರನ್ನು ಕೂಡ ಪರೀಕ್ಷೆಗೆ ಒಳಪಡಿಸಲಾಗಿತ್ತು ಹಾಗೂ ಮಣ್ಣನ್ನು ಕೂಡ ಪರಿಶೀಲಿಸಲಾಗಿತ್ತು. ಬಳಿಕ ಪರೀಕ್ಷೆಯಲ್ಲಿ ಎಂಡೋಸಲಾನ್ ಅಂಶ ಪತ್ತೆಯಾಗಿಲ್ಲ ಎಂದು ವರದಿ ನೀಡಿತ್ತು.
