ನೆಲ್ಯಾಡಿ: ಆಟೋ ರಿಕ್ಷಾ ಹಾಗೂ ಬೈಕ್ ನಡುವೆ ಡಿಕ್ಕಿ ಸಂಭವಿಸಿ ಬೈಕ್ ಸವಾರ ಗಾಯಗೊಂಡು ಆಸ್ಪತ್ರೆಗೆ ದಾಖಲಾಗಿರುವ ಘಟನೆ ಮೇ.19ರಂದು ಸಂಜೆ ಪೆರಿಯಡ್ಕ-ಕಾಂಚನ ರಸ್ತೆಯ ಬಜತ್ತೂರು ಗ್ರಾಮದ ಮಣಿಪುರ ಎಂಬಲ್ಲಿ ನಡೆದಿದೆ.
ಕೌಕ್ರಾಡಿ ಗ್ರಾಮದ ಮುಂಡ್ರೇಲ್ ನಿವಾಸಿ ಡೀಕಯ್ಯ ಗೌಡ(63ವ.)ಗಾಯಗೊಂಡವರು. ಇವರು ಹಿರೆಬಂಡಾಡಿ ಕಡೆಯಿಂದ ಕೊಕ್ಕಡಕ್ಕೆ ಪೆರಿಯಡ್ಕ-ಕಾಂಚನ ರಸ್ತೆ ಮೂಲಕ ಬೈಕ್(ಕೆಎ 21, ಎಸ್ 0900)ನಲ್ಲಿ ತೆರಳುತ್ತಿದ್ದ ವೇಳೆ ವಿರುದ್ಧ ದಿಕ್ಕಿನಲ್ಲಿ ಇಸ್ಮಾಯಿಲ್ ಎಂಬವರು ಚಲಾಯಿಸಿಕೊಂಡು ಬರುತ್ತಿದ್ದ ಆಟೋ ರಿಕ್ಷಾ (ಕೆಎ 21, ಸಿ 0566) ಮಣಿಪುರ ಎಂಬಲ್ಲಿ ಡಿಕ್ಕಿಯಾಗಿದೆ. ಘಟನೆಯಲ್ಲಿ ಬೈಕ್ ಸವಾರ ಡೀಕಯ್ಯ ಗೌಡ ಅವರು ಬೈಕ್ ಸಮೇತ ರಸ್ತೆಗೆ ಬಿದ್ದು ಗಾಯಗೊಂಡಿದ್ದು ಅವರಿಗೆ ನೆಲ್ಯಾಡಿ ಅಶ್ವಿನಿ ಆಸ್ಪತ್ರೆಯಲ್ಲಿ ಪ್ರಥಮ ಚಿಕಿತ್ಸೆ ನೀಡಿ ಬಳಿಕ ಹೆಚ್ಚಿನ ಚಿಕಿತ್ಸೆಗಾಗಿ ಪುತ್ತೂರು ಸರಕಾರಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ರಿಕ್ಷಾ ಚಾಲಕ ಅಜಾಗರೂಕತೆಯಿಂದ ರಿಕ್ಷಾ ಚಲಾಯಿಸಿದ ಪರಿಣಾಮ ಅಪಘಾತ ನಡೆದಿದೆ ಎಂದು ಗಾಯಾಳು ಡೀಕಯ್ಯ ಗೌಡ ಅವರು ನೀಡಿದ ದೂರಿನಂತೆ ಪುತ್ತೂರು ಸಂಚಾರ ಠಾಣೆಯಲ್ಲಿ ಕೇಸು ದಾಖಲಾಗಿದೆ.
