ಪುತ್ತೂರು:ಕೆಯ್ಯೂರಿನಲ್ಲಿ ಸವಣೂರಿನ ಆಟೋ ರಿಕ್ಷಾ ಚಾಲಕನಿಗೆ ಮಾರುತಿ ಓಮ್ನಿಯಲ್ಲಿ ಬಂದ ವ್ಯಕ್ತಿಯೊಬ್ಬರು ಬಿಯರ್ ಬಾಟಲಿಯಿಂದ ಹಲ್ಲೆ ನಡೆಸಿರುವ ಕುರಿತು ಸಂಪ್ಯ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಸವಣೂರು ಗ್ರಾಮದ ಪೆರಿಯಡ್ಕ ನಿವಾಸಿಯಾಗಿರುವ ರಿಕ್ಷಾ ಚಾಲಕ ಕುಸುಮಾಧರ ಗೌಡ(33ವ.)ರವರು ಹಲ್ಲೆಗೊಳಗಾದವರು.ತಾನು ಕೆಯ್ಯೂರಿಗೆ ಬಾಡಿಗೆಗೆ ಬಂದು ವಾಪಸಾಗುತ್ತಿದ್ದ ಸಂದರ್ಭ ಫೋನ್ ಕರೆ ಬಂತೆಂದು ರಿಕ್ಷಾವನ್ನು ರಸ್ತೆ ಬದಿಯಲ್ಲಿ ನಿಲ್ಲಿಸಿದಾಗ ಹಿಂಬದಿಯಿಂದ ಬರುತ್ತಿದ್ದ ಮಾರುತಿ ಓಮ್ನಿ(ಕೆಎ19:ಈ 3067)ಯಲ್ಲಿದ್ದ ವ್ಯಕ್ತಿಯೊಬ್ಬರು ಅವಾಚ್ಯವಾಗಿ ಬೈದಾಗ,ತಾನು ರಿಕ್ಷಾದಿಂದ ಇಳಿದು ಯಾಕೆ ಬೈಯುತ್ತೀರಿ ಎಂದು ಹೇಳುತ್ತಾ ಮುಂದೆ ಬಂದಾಗ ನನ್ನನ್ನು ತಡೆದು ರಸ್ತೆ ಬದಿಯಲ್ಲಿದ್ದ ಬಿಯರ್ ಬಾಟಲಿಯಂದ ಹಲ್ಲೆ ನಡೆಸಿದ್ದಾರೆ ಎಂದು ಗಾಯಾಳು ಕುಸುಮಾಧರ ಗೌಡ ಆರೋಪಿಸಿದ್ದಾರೆ.
ಘಟನೆ ಸಂದರ್ಭ ಅಲ್ಲೇ ಇದ್ದ ಸಾರ್ವಜನಿಕರು ಹಲ್ಲೆ ನಡೆಸಿದ ಆರೋಪಿಯನ್ನು ಹಿಡಿದುಕೊಂಡಿದ್ದು, ಗಾಯಾಳುವನ್ನು ಪರಿಚಯದ ಮೇಘರಾಜ ಎಂಬವರು ಪುತ್ತೂರು ಸರಕಾರಿ ಆಸ್ಪತ್ರೆಗೆ ಕರೆದೊಯ್ದು ದಾಖಲಿಸಿದ್ದರು.ಘಟನೆ ಕುರಿತು ರಿಕ್ಷಾ ಚಾಲಕ ಕುಸುಮಾಧರ ಗೌಡರ ದೂರಿನ ಮೇರೆಗೆ ಪುತ್ತೂರು ಗ್ರಾಮಾಂತರ ಪೊಲೀಸರು ಕಲಂ 126(2),118(1), 352 ಬಿಎನ್‌ಎಸ್‌ನಂತೆ ಪ್ರಕರಣ(ಅ.ಕ್ರ.127/2024) ದಾಖಲಿಸಿಕೊಂಡಿದ್ದಾರೆ.ಆರೋಪಿಯನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ.
