ನಿಡ್ಪಳ್ಳಿ; ಬೀದಿ ನಾಯಿಗಳ ಹಾವಳಿಯಿಂದ ಶಾಲೆಗೆ ಹೋಗಲು ಭಯವಾಗುತ್ತಿದೆ. ಅಲ್ಲದೆ ಶಾಲಾ ಆವರಣ ಸ್ವಚ್ಛಗೊಳಿಸುವುದೇ ಒಂದು ಸವಾಲಾಗಿದ್ದು ಬೀದಿ ನಾಯಿಗಳ ನಿಯಂತ್ರಣಕ್ಕೆ ಪಂಚಾಯತ್ ಸೂಕ್ತ ಕ್ರಮ ಕೈಗೊಳ್ಳುವಂತೆ ನಿಡ್ಪಳ್ಳಿ ಗ್ರಾಮ ಮಕ್ಕಳ ಗ್ರಾಮ ಸಭೆಯಲ್ಲಿ ಮಕ್ಕಳು ಆಗ್ರಹಿಸಿದ ಘಟನೆ ನ.28ರಂದು ನಡೆಯಿತು.
ಗ್ರಾಮದ ಮುಂಡೂರು ಮತ್ತು ಚೂರಿಪದವು ಹಿರಿಯ ಪ್ರಾಥಮಿಕ ಶಾಲಾ ಮಕ್ಕಳು ತಮ್ಮ ಬೇಡಿಕೆಯನ್ನು ಸಭೆಯಲ್ಲಿ ಮಂಡಿಸುವ ಸಮಯದಲ್ಲಿ ಮಾತನಾಡಿ ಹಾದಿ ಬೀದಿಗಳಲ್ಲಿ ನಾಯಿಗಳು ತಿರುಗಾಡುತ್ತಿದ್ದು, ಮಕ್ಕಳಿಗೆ ಶಾಲೆಗೆ ಹೋಗಲು ಮತ್ತು ವಾಹನ ಸವಾರರಿಗೆ ಬಹಳ ತೊಂದರೆ ಆಗುತ್ತಿದೆ. ಸಾರ್ವಜನಿಕರು ತಮ್ಮ ನಾಯಿಗಳನ್ನು ಕಟ್ಟಿ ಹಾಕಿ ಸಾಕುವಂತೆ ಪಂಚಾಯತ್ ತಿಳುವಳಿಕೆ ನೀಡಿ ನಿಯಂತ್ರಣಕ್ಕೆ ಕ್ರಮ ಕೈಗೊಳ್ಳ ಬೇಕು ಎಂದು ಹೇಳಿದರು. ಅದಕ್ಕೆ ಉತ್ತರಿಸಿದ ಪಂಚಾಯತ್ ಅಧ್ಯಕ್ಷ ವೆಂಕಟ್ರಮಣ ಬೋರ್ಕರ್ ಪ್ರತಿ ಮನೆಯವರು ತಮ್ಮ ನಾಯಿಗಳನ್ನು ಹೊರಗೆ ಬಿಟ್ಟರೆ ತೊಂದರೆ ಆಗಬಹುದು ಎಂಬುದನ್ನು ಅರಿತು ಕೊಳ್ಳಬೇಕು. ಈ ಬಗ್ಗೆ ಸುಪ್ರೀಂಕೋರ್ಟ್ ಒಂದು ಕಾನೂನು ತರುವ ಮೂಲಕ ನಾಯಿಗಳನ್ನು ಬೀದಿಗೆ ಬೀಡುವವರಿಗೆ ಶಿಕ್ಷೆ ವಿಧಿಸುವ ಪ್ರಕ್ರಿಯೆ ನಡೆಯುವ ಆಶಾಭಾವನೆ ಇದೆ ಎಂದರು.
ಪ್ರಾಸ್ತಾವಿಕವಾಗಿ ಮಾತನಾಡಿದ ಪಿಡಿಒ ಜಯಪ್ರಕಾಶ್. ಎಂ ಮಕ್ಕಳ ಹಕ್ಕುಗಳ ರಕ್ಷಣೆ ಮತ್ತು ಅವರ ಕುಂದುಕೊರತೆಗಳನ್ನು ಸರಿಪಡಿಸುವ ನಿಟ್ಟಿನಲ್ಲಿ ಮಕ್ಕಳ ಗ್ರಾಮ ಸಭೆಯನ್ನು ನಡೆಸಲಾಗುತ್ತದೆ.ಮಕ್ಕಳು ತಮ್ಮ ಶಿಕ್ಷಣ ಪಡೆಯುವ ಒಟ್ಟಿಗೆ ಸ್ವಚ್ಚತೆ ಮುಂತಾದ ಕೆಲಸ ಕಾರ್ಯಗಳಲ್ಲಿ ತಮ್ಮ ಸಹಕಾರ ನೀಡುವುದು.ಪಂಚಾಯತ್ ನೀರನ್ನು ಕುಡಿಯಲು ಬಳಸುವುದಿದ್ದರೆ ಬಳಕೆ ಸರಿಯಾಗಿ ನಿರ್ವಹಿಸಲು ಸಹಕರಿಸುವುದು ಅಲ್ಲದೆ ನೀರಿನ ಮೀಟರ್ ಸರಿ ಇರುವ ಹಾಗೆ ನೋಡಿ ಕೊಳ್ಳಬೇಕು.ಸಮಸ್ಯೆಗಳಿದ್ದರೆ ಅದನ್ನು ಶಿಕ್ಷಕರಲ್ಲಿ ಅಥವಾ ಹೆತ್ತವರಲ್ಲಿ ತಿಳಿಸಿ ಪಂಚಾಯತ್ ಗೆ ತಿಳಿಸುವ ಮೂಲಕ ಸಮಸ್ಯೆಗಳ ಪರಿಹಾರವನ್ನು ಕಂಡುಕೊಳ್ಳಬಹುದು ಎಂದರು.
ಬೆಟ್ಟಂಪಾಡಿ ಕ್ಲಸ್ಟರ್ ಸಿ.ಅರ್.ಪಿ ನಾರಾಯಣ ಪುಣಚ ಮಾತನಾಡಿ 6 ರಿಂದ 14 ವರ್ಷದ ಒಳಗಿನ ಮಕ್ಕಳು ಕಡ್ಡಾಯವಾಗಿ ಶಾಲೆಗೆ ಹಾಜರಾಗಿ ಶಿಕ್ಷಣ ಪಡೆಯುವುದು.ಶಾಲೆಗೆ ಹೋಗದೆ ಉಳಿದ ಮಕ್ಕಳ ಬಗ್ಗೆ ಮಾಹಿತಿ ಸಂಗ್ರಹಿಸಿ ಅವರನ್ನು ಶಾಲೆಗೆ ಸೇರಿಸುವ ಮೂಲಕ ಶಿಕ್ಷಣ ಕೊಡಿಸುವ ಕಾಯಿದೆ ಇದೆ.ಸರಕಾರದಿಂದ ಸಿಗುವ ಉಚಿತ ಸೌಲಭ್ಯಗಳ ಬಗ್ಗೆ ತಿಳಿಸಿದ ಅವರು ಶಾಲೆಗಳಲ್ಲಿ ಮೂಲಭೂತ ಸೌಕರ್ಯಗಳ ಕೊರತೆ ಇದ್ದರೆ ಅದನ್ನು ಗ್ರಾಮ ಪಂಚಾಯತ್, ತಾ.ಪಂ ಮತ್ತು ಜಿಲ್ಲಾ ಪಂಚಾಯತ್ ಗೆ ತಿಳಿಸುವ ಮೂಲಕ ಅದನ್ನು ಸರಿಪಡಿಸಿಕೊಳ್ಳಬಹುದು ಎಂದು ಹೇಳಿದರು.
ತಾಲೂಕು ಶಿಕ್ಷಣ ಸಮೂಹ ಸಂಪನ್ಮೂಲ ವ್ಯಕ್ತಿ ಮಹಮ್ಮದ್ ರಫೀಕ್ ದರ್ಬೆ ಮಾಹಿತಿ ನೀಡಿ ಹಿಂದೆ ಮಕ್ಕಳ ರಕ್ಷಣೆ ಮತ್ತು ಹಕ್ಕುಗಳ ಚಲಾವಣೆಗೆ ವ್ಯವಸ್ಥೆ ಇರಲಿಲ್ಲ. ಅದನ್ನು ಮನಗಂಡ ವಿಶ್ವಸಂಸ್ಥೆ 1989 ರಲ್ಲಿ ಮಕ್ಕಳ ಹಕ್ಕುಗಳ ರಕ್ಷಣೆ ಎಂಬ ಕಾನೂನು ತರುತ್ತದೆ.1992 ರಲ್ಲಿ ಸರಕಾರ ಇದನ್ನು ಅಧಿಕೃತವಾಗಿ ಜಾರಿಗೆ ತರಲಾಗಿದೆ.ಮಕ್ಕಳಿಗೆ ಕಡ್ಡಾಯ ಶಿಕ್ಷಣದ ಹಕ್ಕು, ಬದುಕುವ ಹಕ್ಕು, ರಕ್ಷಣೆ ಹಕ್ಕು ಮತ್ತು ಭಾಗವಹಿಸುವ ಹಕ್ಕು ಎಂಬ ನಾಲ್ಕು ಹಕ್ಕುಗಳನ್ನು ನೀಡಲಾಗಿದೆ. ಮಕ್ಕಳು ಮಾದಕ ದ್ರವ್ಯ ವ್ಯಸನಿಗಳಾಗದೆ ಶಕ್ತಿ, ಧೈರ್ಯದಿಂದ ಎಲ್ಲಾ ವ್ಯವಸ್ಥೆಗಳಲ್ಲಿ ತಮ್ಮನ್ನು ತೊಡಗಿಸಿ ಸದೃಢ , ಸುಸಂಸ್ಕೃತ ದೇಶ ಕಟ್ಟಲು ಪ್ರಯತ್ನಿಸಿ ಎಂದು ಉತ್ತಮ ಮಾಹಿತಿ ನೀಡಿದರು.
ಬೆಟ್ಟಂಪಾಡಿ ಸಮುದಾಯ ಆರೋಗ್ಯ ಅಧಿಕಾರಿ ಯಶೋಧ ಆರೋಗ್ಯದ ರಕ್ಷಣೆ ಮತ್ತು ಪೌಷ್ಟಿಕ ಆಹಾರ ಬಳಕೆ ಬಗ್ಗೆ ಮಾಹಿತಿ ನೀಡಿದರು.
ಪಂಚಾಯತ್ ಅಧ್ಯಕ್ಷ ವೆಂಕಟ್ರಮಣ ಬೋರ್ಕರ್ ಮಾತನಾಡಿ ಮಕ್ಕಳ ಬೇಡಿಕೆಯನ್ನು ಪಂಚಾಯತ್ ಮಟ್ಟದಲ್ಲಿ ಸಾಧ್ಯವಾಗುವುದನ್ನು ಮಾಡಲು ಪ್ರಯತ್ನಿಸಲಾಗುವುದು. ಆಗದೆ ಇರುವುದನ್ನು ಮೇಲಿನ ಇಲಾಖೆಗೆ ಮನವಿ ಸಲ್ಲಿಸಿ ಶಾಲೆಗಳಲ್ಲಿ ಇರುವ ಕುಂದು ಕೊರತೆಗಳನ್ನು ನೀಗಸಲು ಪ್ರಾಮಾಣಿಕ ಪ್ರಯತ್ನ ಮಾಡಲಾಗುವುದು ಎಂದರು.
ಸರಕಾರಿ ಪ್ರೌಢಶಾಲೆ ಬೆಟ್ಟಂಪಾಡಿ ಇಲ್ಲಿಯ ವಿದ್ಯಾರ್ಥಿನಿ ಮರಿಯಮ್ಮ ಆಪ್ನಾ ಸಭೆಯ ಅಧ್ಯಕ್ಷತೆ ವಹಿಸಿದ್ದರು. ಮಕ್ಕಳಿಗೆ ಏರ್ಪಡಿಸಿದ ಸ್ಪರ್ಧೆಗಳಲ್ಲಿ ವಿಜೇತರಾದ ಮಕ್ಕಳಿಗೆ ಪಂಚಾಯತ್ ವತಿಯಿಂದ ಒದಗಿಸಿದ ಬಹುಮಾನಗಳನ್ನು ಅತಿಥಿಗಳು ವಿತರಿಸಿದರು. ಪಂಚಾಯತ್ ಸದಸ್ಯರಾದ ಸತೀಶ್ ಶೆಟ್ಟಿ, ನಂದಿನಿ ಆರ್.ರೈ, ಗೀತಾ.ಡಿ, ಪಂಚಾಯತ್ ಕಾರ್ಯದರ್ಶಿ ಶಿವರಾಮ ಮೂಲ್ಯ.ಎಂ ವೇದಿಕೆಯಲ್ಲಿ ಉಪಸ್ಥಿತರಿದ್ದರು.
ಚೂರಿಪದವು ಶಾಲಾ ವಿದ್ಯಾರ್ಥಿಗಳು ಪ್ರಾರ್ಥಿಸಿದರು.ಪ್ರೌಢಶಾಲಾ ವಿದ್ಯಾರ್ಥಿನಿ ತೃಷಾ ಸ್ವಾಗತಿಸಿದರು.ನಿಡ್ಪಳ್ಳಿ ಶಾಲಾ ವಿದ್ಯಾರ್ಥಿನಿ ಭವ್ಯಶ್ರೀ ವಂದಿಸಿದರು. ಮುಂಡೂರು ಶಾಲಾ ವಿದ್ಯಾರ್ಥಿನಿಯರಾದ ತನುಶ್ರೀ, ಶ್ರಾವಣಿ ಕಾರ್ಯಕ್ರಮ ನಿರೂಪಿಸಿದರು.ನಿಡ್ಪಳ್ಳಿ ಶಾಲಾ ಅತಿಥಿ ಶಿಕ್ಷಕಿ ಸುಜಾತ, ಪ್ರೌಢಶಾಲಾ ಶಿಕ್ಷಕಿ ಉಮಾ, ಮುಂಡೂರು ಶಾಲಾ ಅತಿಥಿ ಶಿಕ್ಷಕಿ ಭಾರತಿ, ಚೂರಿಪದವು ಶಾಲಾ ಮುಖ್ಯ ಶಿಕ್ಷಕಿ ಲಕ್ಷ್ಮೀ ಬಹುಮಾನದ ಪಟ್ಟಿ ವಾಚಿಸಿದರು. ಪಂಚಾಯತ್ ಸಿಬ್ಬಂದಿಗಳಾದ ಸಂಶೀನಾ, ರೇವತಿ,ವಿನೀತ್ ಕುಮಾರ್, ಜಯ ಕುಮಾರಿ, ಗ್ರಂಥ ಪಾಲಕಿ ಪವಿತ್ರ. ಜಿ ಸಹಕರಿಸಿದರು. ಶಾಲಾ ಶಿಕ್ಷಕರು, ಅಂಗನವಾಡಿ ಕಾರ್ಯಕರ್ತೆಯರು, ಅಶಾ ಕಾರ್ಯಕರ್ತೆಯರು, ಸಂಜೀವಿನಿ ಒಕ್ಕೂಟದ ಸದಸ್ಯರು, ಸ್ವಚ್ಚತಾ ಘಟಕದ ಸಿಬ್ಬಂದಿಗಳು ಮೊದಲಾದವರು ಪಾಲ್ಗೊಂಡರು.
ಪಂಚಾಯತ್ ವ್ಯಾಪ್ತಿಯಲ್ಲಿ ಇರುವ 3 ಹಿರಿಯ ಪ್ರಾಥಮಿಕ ಶಾಲೆ ಮತ್ತು ಒಂದು ಪ್ರೌಡಶಾಲೆಯಿಂದ ಬಂದ ಬೇಡಿಕೆಗಳ ವಿವರ;
* ಪ್ರೌಢಶಾಲೆಗೆ ನೂತನ ಶೌಚಾಲಯ ರಚನೆ,ಶಾಲೆ ಸಂಪರ್ಕ ರಸ್ತೆ ಕಾಂಕ್ರಿಟೀಕರಣ, ಸುಸಜ್ಜಿತ ಆಟದ ಮೈದಾನ ಮತ್ತು ಬೆಳಿಗ್ಗೆ ಮತ್ತು ಸಂಜೆ ಶಾಲಾ ಸಮಯಕ್ಕನುಗುಣವಾಗಿ ಸರಕಾರಿ ಬಸ್ಸು ವ್ಯವಸ್ಥೆ.
* ನಿಡ್ಪಳ್ಳಿ ಹಿರಿಯ ಪ್ರಾಥಮಿಕ ಶಾಲೆಗೆ ತರಗತಿ ಕೋಣೆಯ ಗುಂಡಿ ಬಿದ್ದ ನೆಲ ದುರಸ್ತಿ, ಜರಿದು ಬಿದ್ದ ಕಾಂಪೌಂಡ್ ದುರಸ್ತಿ,ನೂತನ ಶೌಚಾಲಯ ರಚನೆ.
* ಮುಂಡೂರು ಹಿರಿಯ ಪ್ರಾಥಮಿಕ ಶಾಲೆಗೆ ಪ್ರಯೋಗಾಲಯ ವ್ಯವಸ್ಥೆ, ಸುಸಜ್ಜಿತ ಶೌಚಾಲಯ, ವಿಜಯನಗರದಲ್ಲಿ ಮುಂಡೂರು ಶಾಲೆಗೆ ಹೋಗುವ ದಾರಿಯ ನಾಮಫಲಕ ಅಳವಡಿಸುವುದು, ಕೆಳಗಿನ ನುಳಿಯಾಲಿನಿಂದ ಶಾಲೆಗೆ ಬರುವ ಕಾಲುದಾರಿಯಲ್ಲಿ ಇರುವ ಹುಲ್ಲು ತೆಗೆಯುವುದು, ಕಂಪ್ಯೂಟರ್ ಕೊಠಡಿ ಮತ್ತು ಶಿಕ್ಷಕಿ ನೇಮಕ, ಕಲಾ ಶಿಕ್ಷಕರ ನೇಮಕ.
* ಚೂರಿಪದವು ಹಿರಿಯ ಪ್ರಾಥಮಿಕ ಶಾಲೆಗೆ ಹೋಗುವ ರಸ್ತೆ ಬದಿ ಇರುವ ಹುಲ್ಲು ತೆಗೆಯುವುದು, ಕುಡಿಯುವ ನೀರಿಗೆ ನೂತನ ಕೊಳವೆ ಬಾವಿ ರಚನೆ, ಆಟವಾಡಲು ಜಾರು ಬಂಡಿ, ಉಯ್ಯಾಲೆ ನಿರ್ಮಾಣ, ರಂಗ ಮಂದಿರ ನಿರ್ಮಾಣ, ಅಪೂರ್ಣವಾದ ಆವರಣ ಗೋಡೆ ಪೂರ್ಣ ಗೊಳಿಸುವುದು. ಇದು ನಾಲ್ಕು ಶಾಲೆಗಳಿಂದ ಸಭೆಯಲ್ಲಿ ಬಂದ ಬೇಡಿಕೆಗಳು.
