ಪುತ್ತೂರು: ಪರ್ಪುಂಜ ಹಾಲು ಉತ್ಪಾದಕರ ಸಹಕಾರ ಸಂಘದಲ್ಲಿ ಕಳೆದ 13 ವರ್ಷಗಳಿಂದ ಹಾಲು ಪರೀಕ್ಷಕಿಯಾಗಿ ಕೆಲಸ ನಿರ್ವಹಿಸುತ್ತಿದ್ದು ವಿದೇಶಕ್ಕೆ ಹೋಗಲಿರುವ ಕಾರಣ ತಮ್ಮ ಹುದ್ದೆಗೆ ರಾಜೀನಾಮೆ ನೀಡಿದ ಬೇಬಿ ಪರ್ಪುಂಜ ಇವರನ್ನು ಸಂಘದ ಕಾರ್ಯಕಾರಿ ಮಂಡಳಿ ಸಭೆಯಲ್ಲಿ ಹಾರ,ಶಾಲು,ಫಲಪುಷ್ಪ ಹಾಗೂ ನಗದು ಪುರಸ್ಕಾರ ನೀಡಿ ಸನ್ಮಾನಿಸಲಾಯಿತು. ಸಂಘದ ಅಧ್ಯಕ್ಷರಾದ ಬೂಡಿಯಾರು ರಾಧಾಕೃಷ್ಣ ರೈ ಅವರು ಬೇಬಿ ಅವರಿಗೆ ಸಂಘದಲ್ಲಿ ಉತ್ತಮ ಸೇವೆ ಸಲ್ಲಿಸಿದಕ್ಕಾಗಿ ಶುಭ ಹಾರೈಸಿದರು.
ಸಂಘದ ನಿರ್ದೇಶಕರಾದ ಕಸ್ತೂರಿ ಟಿ ಶೆಟ್ಟಿ ಇವರ ಪತಿ ತಾರನಾಥ ಶೆಟ್ಟಿ ಇವರು ಸೆ.30ರಂದು ನಿಧನರಾಗಿದ್ದು, ಇವರಿಗೆ ಸಭೆಯಲ್ಲಿ ಶ್ರದ್ಧಾಂಜಲಿಯನ್ನು ಅರ್ಪಿಸಲಾಯಿತು. ಸಂಘದ ಉಪಾಧ್ಯಕ್ಷರಾದ ಸುಧಾಕರ ಆಳ್ವ ಕಲ್ಲಡ್ಕ, ಸ್ಥಾಪಕ ಅಧ್ಯಕ್ಷರಾದ ಬಾರಿಕೆ ನಾರಾಯಣ ರೈ, ನಿರ್ದೇಶಕರುಗಳಾದ ನೋಣಾಲು ಜೈ ರಾಜ್ ಭಂಡಾರಿ, ಡೆಕ್ಕಳ ಮಿತ್ರದಾಸ ರೈ, ಪ್ರೇಮ ರಾಜ್ ರೈ ಪರ್ಪುಂಜ, ರಾಮಣ್ಣಗೌಡ ಪರನೀರು, ವೀರಪ್ಪ ಮೂಲ್ಯ ಬೈರ ಮೂಲೆ ಉಪಸ್ಥಿತರಿದ್ದರು . ಸಂಘದ ಮಾಜಿ ಅಧ್ಯಕ್ಷರಾದ ಶ್ಯಾಮಸುಂದರ ರೈ ಕೊಪ್ಪಳ ಸ್ವಾಗತಿಸಿದರು. ಸಂಘದ ಕಾರ್ಯದರ್ಶಿ ಸರೋಜಾ ಹಾಗೂ ಶ್ರೀಮತಿ ಸಹಕರಿಸಿದರು.
