ಪುತ್ತೂರು: ನಗರಸಭೆ ವ್ಯಾಪ್ತಿಯಲ್ಲಿ ರಸ್ತೆ ಬದಿ,ಇತರ ಸಾರ್ವಜನಿಕ ಸ್ಥಳಗಳಲ್ಲಿ ಅಳವಡಿಸಲಾಗಿರುವ ಜಾಹೀರಾತು ಬ್ಯಾನರ್ ಮತ್ತು ಕಟೌಟ್ ಅನಧಿಕೃತವಾಗಿದ್ದಲ್ಲಿ ಅದನ್ನು ತೆರವು ಮಾಡಬೇಕು.ತಪ್ಪಿದಲ್ಲಿ ನಗರಸಭೆ ವತಿಯಿಂದಲೇ ತೆರವು ಕಾರ್ಯಾಚರಣೆ ಫೆ.19ರಂದು ನಡೆಯಲಿದೆ ಎಂದು ನಗರಸಭೆ ಅಧ್ಯಕ್ಷೆ ಲೀಲಾವತಿ ಅಣ್ಣು ನಾಯ್ಕ ಅವರು ತಿಳಿಸಿರುವುದಾಗಿ ನಗರಸಭೆ ಪ್ರಕಟಣೆ ಹೊರಡಿಸಿದೆ.
ಯಾವುದೇ ಜಾಹಿರಾತು ಫ್ಲೆಕ್ಸ್, ಬ್ಯಾನರ್, ಹೋರ್ಡಿಂಗ್, ಬಂಟಿಂಗ್ಸ್, ಪೋಸ್ಟರ್‌ಗಳನ್ನು ನಗರಸಭೆ ಅನುಮತಿ ಇಲ್ಲದೇ, ಶುಲ್ಕ ಪಾವತಿಸದೇ ಪ್ರದರ್ಶನ ಮಾಡುವುದು ಕಾನೂನು ಬಾಹಿರವಾಗಿದೆ.ಅದರಲ್ಲೂ ಅರ್ಜಿ ನೀಡಿ ಶುಲ್ಕ ಪಾವತಿಸದೇ ವಂಚಿಸುವುದು ಅಪರಾಧವಾಗಿದೆ.ಅರ್ಜಿ ನೀಡಿ, ಪರಿಶೀಲನೆ ನಡೆಸದೆ ಫಲಕ ಅಳವಡಿಸುತ್ತಿದ್ದು, ಕೆಲವು ವಿದ್ಯುತ್ ಕಂಬ, ಆಕ್ಸಿಡೆಂಟ್ ಝೋನ್, ಪಾದಚಾರಿಗಳು ನಡೆದಾಡುವ ರಸ್ತೆಯಲ್ಲಿ, ಇನ್ನಿತರ ನಿಷೇಧಿತ ಸ್ಥಳಗಳಲ್ಲಿಯೂ ಅಳವಡಿಸಿರುವುದರಿಂದ ಸಾರ್ವಜನಿಕರಿಗೆ, ವಾಹನಕ್ಕೆ ತೊಂದರೆಯಾಗುತ್ತಿದೆ.ಈ ನಿಟ್ಟಿನಲ್ಲಿ ಈಗಾಗಲೇ ಎಲ್ಲಾ ಜಾಹೀರಾತುದಾರರಿಗೆ ಸೂಚನೆ ನೀಡಿದ್ದರೂ, ಕಾನೂನನ್ನು ಲೆಕ್ಕಿಸದೆ ಶುಲ್ಕ ವಂಚನೆ ಮಾಡಿ ಅನಧಿಕೃತ ಫಲಕ ಅಳವಡಿಸುತ್ತಿದ್ದಾರೆ.ಈ ನಿಟ್ಟಿನಲ್ಲಿ ಫೆ.19ರಂದು ಬೆಳಗ್ಗೆಯಿಂದ ಅನಧಿಕೃತ ಮತ್ತು ಅವಧಿ ಮುಕ್ತಾಯಗೊಂಡ ಜಾಹೀರಾತು ಬ್ಯಾನರ್,ಫಲಕಗಳನ್ನು ತೆರವುಗೊಳಿಸಲು ಕ್ರಮ ಕೈಗೊಳ್ಳಲಾಗುವುದು.ಎಲ್ಲ ಜಾಹೀರಾತುದಾರರು ತಮ್ಮ ಫಲಕಗಳನ್ನು ಶುಲ್ಕ ಪಾವತಿಸಿ ಅನುಮತಿ ಪಡಕೊಳ್ಳುವುದು. ಹಾಗೂ ಶುಲ್ಕ ಪಾವತಿಸದಿರುವ ಜಾಹೀರಾತುಗಳ ಫಲಕಗಳಿಗೆ ಸಂಬಂಧಿಸಿ ಸೂಕ್ತ ಕಾನೂನು ಕ್ರಮ ವಹಿಸಲಾಗುವುದು.ಕೆಲವರು ಅನಧಿಕೃತ ಜಾಹೀರಾತು ಫಲಕ,ಬ್ಯಾನರ್‌ಗಳನ್ನು ರಾತ್ರಿ ವೇಳೆ ಅಳವಡಿಸುತ್ತಿದ್ದು ನಗರಸಭೆಗೆ ಅರ್ಜಿ ನೀಡಿ, ಶುಲ್ಕ ಪಾವತಿ ಮಾಡದೇ ವಂಚಿಸುತ್ತಿರುವುದು ಕಂಡು ಬಂದಿರುತ್ತದೆ.ರಸ್ತೆ ಮಾರ್ಜಿನ್‌ನಲ್ಲಿ, ವಿದ್ಯುತ್ ಕಂಬಗಳಿಗೆ, ಸರಕಾರಿ ಖಾಸಗಿ ಕಟ್ಟಡದಲ್ಲಿ ಡಿವೈಡರ್, ಇತ್ಯಾದಿ ಎಲ್ಲ ಕಡೆಗಳಲ್ಲಿ ಬೃಹತ್ ಗಾತ್ರದ ಜಾಹೀರಾತುಗಳು ರಾರಾಜಿಸುತ್ತಿದೆ.ಇವನ್ನೆಲ್ಲ ಫೆ.19ರಂದು ತೆರವು ಮಾಡಲಾಗುವುದು.ಇನ್ನು ಮುಂದೆ ಕಚೇರಿಯಿಂದ ತೆರವುಗೊಳಿಸಿದ ಯಾವುದೇ ಫ್ಲೆಕ್ಸ್ ಜಾಹಿರಾತು ಫಲಕ,ಬ್ಯಾನರ್ ಮರು ನೀಡಲಾಗುವುದಿಲ್ಲ.ಈ ಬಗ್ಗೆ ಕರ್ನಾಟಕ ಪುರಸಭೆಗಳ ಅಧಿನಿಯಮ 1964ರ ನಿಯಮ 133ರಿಂದ 136 ಹಾಗೂ ಕರ್ನಾಟಕ ತೆರೆದ ಪ್ರದೇಶಗಳ ವಿರೂಪ ತಡೆಗಟ್ಟುವ ಕಾಯಿದೆ 1981 (Karnataka open places prevention of disfigurement act 1981ಯಡಿ ಕ್ರಮ ಕೈಗೊಳ್ಳಲಾಗುವುದೆಂದು ನಗರಸಭಾ ಪ್ರಕಟಣೆ ತಿಳಿಸಿದೆ.
