ಉಪ್ಪಿನಂಗಡಿ: ಜಿಲ್ಲೆಯ ಜೀವನದಿಗಳಾದ ನೇತ್ರಾವತಿ ಹಾಗೂ ಕುಮಾರಧಾರಾ ನದಿಗಳ ನೀರಿನ ಮಟ್ಟದಲ್ಲಿ ಗುರುವಾರ ಮಧ್ಯಾಹ್ನದಿಂದ ಏರಿಕೆ ಕಂಡಿದ್ದು, 28.05 ಮೀಟರ್ ಮಟ್ಟದಲ್ಲಿ ನದಿಗಳು ಹರಿಯುತ್ತಿದೆ.
![](https://puttur.suddinews.com/wp-content/uploads/2024/07/nadi-3.jpg)
ಪಶ್ಚಿಮ ಘಟ್ಟ ಪ್ರದೇಶಗಳಲ್ಲಿ ಮಳೆಯ ಪ್ರಮಾಣ ಜಾಸ್ತಿಯಾದ ಕಾರಣದಿಂದಾಗಿ ಜು.24ರಂದು 27.01 ಇದ್ದ ನದಿಗಳ ನೀರಿನ ಮಟ್ಟ ಗುರುವಾರ ಮಧ್ಯಾಹ್ನದ ಬಳಿಕ 28.05 ಮೀಟರ್ಗೆ ಏರಿಕೆಯಾಗಿತ್ತು. ಇಲ್ಲಿನ ಅಪಾಯದ ಮಟ್ಟ 31.05 ಆಗಿದೆ. ಶ್ರೀ ಸಹಸ್ರಲಿಂಗೇಶ್ವರ- ಮಹಾಕಾಳಿ ದೇವಾಲಯದ ಸ್ನಾನ ಘಟ್ಟದ ಬಳಿ ನೇತ್ರಾವತಿ ನದಿಗಿಳಿಯಲು ಇರುವ 36 ಮೆಟ್ಟಿಲುಗಳಲ್ಲಿ ಗುರುವಾರ ಮಧ್ಯಾಹ್ನದ ಬಳಿಕ 10 ಮೆಟ್ಟಿಲುಗಳಷ್ಟೇ ಕಾಣುತ್ತಿತ್ತು. ಉಪ್ಪಿನಂಗಡಿಯಲ್ಲಿ ನಿರಂತರ ಮಳೆಯಿಲ್ಲದಿದ್ದರೂ, ಆಗಾಗ ಜೋರಾಗಿ ಗಾಳಿ- ಮಳೆಯಾಗುತ್ತಿದೆ. ನೇತ್ರಾವತಿ ನದಿಗಿಂತ ಕುಮಾರಧಾರ ನದಿಯಲ್ಲಿ ನೀರ ಹರಿವು ನಿನ್ನೆ ಹೆಚ್ಚಿದೆ.
1974ರ ನೆರೆಗೆ 50 ವರ್ಷ:
ಲಭ್ಯ ಮಾಹಿತಿಯ ಪ್ರಕಾರ 1923ರಲ್ಲಿ ಉಪ್ಪಿನಂಗಡಿಯಲ್ಲಿ ಅತೀ ದೊಡ್ಡ ಪ್ರವಾಹ ಬಂದಿತ್ತು. ಆ ಬಳಿಕ ಅತೀ ದೊಡ್ಡ ಪ್ರವಾಹ 26-07-1974ರದ್ದಾಗಿದೆ. ಈ ಪ್ರವಾಹ ಬಂದು ಇಂದಿಗೆ 50 ವರ್ಷವಾಯಿತು. ಅಂದಿನಂತೆ ಈ ಬಾರಿಯೂ 26ನೇ ತಾರೀಕು ಶುಕ್ರವಾರ ಬಂದಿರುವುದು ವಿಶೇಷವಾಗಿದೆ.