ಒಬ್ಬ ಚಲನಚಿತ್ರ ನಿರ್ಮಾಪಕ ಆರಂಭದಲ್ಲೇ ತನ್ನೆಲ್ಲಾ ಕಾರ್ಡ್ಗಳನ್ನು ತೆರೆದಿಟ್ಟಾಗ ಪ್ರೇಕ್ಷಕರು ಏನನ್ನು ನಿರೀಕ್ಷಿಸಬಹುದು? ಸರಣಿ ಹಂತಕನ ಬೆನ್ನು ಹತ್ತುವ ಪೊಲೀಸ್ ಪ್ರೊಸೀಜರಲ್ ಚಿತ್ರವಾದ ‘ಕಳಂಗಾವಲ್’ ನಲ್ಲಿ ಹಂತಕ ಯಾರು ಎಂಬ ‘ಕುತೂಹಲ’ ಪ್ರೇಕ್ಷಕರಿಗಿಂತ ಹೆಚ್ಚಾಗಿ ತನಿಖಾಧಿಕಾರಿಗಳಿಗೆ ಮಾತ್ರ ಸೀಮಿತವಾಗಿರುತ್ತದೆ. ಈ ಚಿತ್ರವು ಕುಖ್ಯಾತ ಸರಣಿ ಹಂತಕ ‘ಸಯನೈಡ್ ಮೋಹನ್’ನ ನೈಜ ಜೀವನದ ಕಥೆಯಿಂದ ಪ್ರೇರಿತವಾಗಿದೆ ಮತ್ತು ಇದರಲ್ಲಿ ಮಮ್ಮುಟ್ಟಿ ಖಳನಾಯಕನಾಗಿ ನಟಿಸಿದ್ದಾರೆ ಎಂಬ ವಿಷಯ ಎಲ್ಲರಿಗೂ ತಿಳಿದಿದೆ.
ಆದರೆ, ಕೇವಲ ಒಂದರ ಮೇಲೊಂದು ಟ್ವಿಸ್ಟ್ಗಳನ್ನು ನೀಡುವುದು ಮಾತ್ರ ಚಿತ್ರದ ಉದ್ದೇಶವಲ್ಲದಿದ್ದಾಗ, ಆರಂಭದಲ್ಲೇ ಎಲ್ಲಾ ಗುಟ್ಟುಗಳನ್ನು ಬಿಟ್ಟುಕೊಡುವುದು ನಿರೀಕ್ಷೆಗಳನ್ನು ಮೀರಿ ಬೆಳೆಯಲು ಸಹಕಾರಿ. ಆ ನಿಟ್ಟಿನಲ್ಲಿ, ‘ಕಳಂಗಾವಲ್’ ಚಿತ್ರದ ಮಧ್ಯಭಾಗದಲ್ಲಿ ಬರುವ ಒಂದು ಕುತೂಹಲಕಾರಿ ತಿರುವು ಹೊಸ ಸಾಧ್ಯತೆಗಳನ್ನು ಪ್ರೇಕ್ಷಕರಿಗೆ ತೆರೆದಿಡುತ್ತದೆ. ನೈಜ ಕಥೆಯಿಂದ ಚಿತ್ರವು ಪಡೆದುಕೊಳ್ಳುವ ಪ್ರಮುಖ ಬದಲಾವಣೆ ಇದೊಂದೇ. ಈ ಸಿನಿಮಾವು ಕ್ರೂರ ಹಂತಕನ ಮಾನಸಿಕ ಸ್ಥಿತಿ ಮತ್ತು ಅವನನ್ನು ಬೆನ್ನಟ್ಟುವ ಚುರುಕುಬುದ್ಧಿಯ ಪೊಲೀಸ್ ಅಧಿಕಾರಿಯ ಆಲೋಚನಾ ಕ್ರಮ, ಎರಡಕ್ಕೂ ಸಮಾನ ಪ್ರಾಮುಖ್ಯತೆ ನೀಡುತ್ತದೆ.
ಮಮ್ಮುಟ್ಟಿ ಅವರ ಖಳನಾಯಕನ ಪಾತ್ರವೇ ಈ ಚಿತ್ರದ ಮುಖ್ಯ ಆಕರ್ಷಣೆ. ಆದರೂ, ದುಲ್ಕರ್ ಸಲ್ಮಾನ್ ಅಭಿನಯದ ‘ಕುರುಪ್’ ಚಿತ್ರಕ್ಕೆ ಕಥೆ ಬರೆದಿದ್ದ ಚೊಚ್ಚಲ ನಿರ್ದೇಶಕ ಜಿತಿನ್ ಕೆ. ಜೋಸ್, ಇಲ್ಲಿ ಕಮರ್ಷಿಯಲ್ ಹಾದಿಯನ್ನು ಹಿಡಿಯದೆ ವಿಭಿನ್ನವಾಗಿ ಪ್ರಯತ್ನಿಸಿದ್ದಾರೆ. ಒಬ್ಬ ದೊಡ್ಡ ಸ್ಟಾರ್ ನಟನಿದ್ದರೂ ಹಂತಕನ ಪಾತ್ರವನ್ನು ಎಲ್ಲಿಯೂ ವೈಭವೀಕರಿಸುವ ಅಥವಾ ಹೀರೋಗಿರಿಯಂತೆ ತೋರಿಸುವ ಸಾಹಸಕ್ಕೆ ನಿರ್ದೇಶಕರು ಕೈಹಾಕಿಲ್ಲ. ಸಿಗರೇಟ್ ಅಗಿಯುವುದು ಮತ್ತು ಹಂತಕನ ಬೆನ್ನುಮೂಳೆ ನಡುಗಿಸುವ ಕೃತ್ಯಗಳಿಗೆ ಪೂರಕವಾಗಿ ಬರುವ 80ರ ದಶಕದ ತಮಿಳು ಹಾಡುಗಳು, ಪಾತ್ರದ ವಿವರಗಳಂತೆ ಕಾಣುತ್ತವೆಯೇ ಹೊರತು ಆ ಪಾತ್ರದ ಆರಾಧನೆಗೆ ಬಳಸಿದಂತೆ ತೋರುವುದಿಲ್ಲ.
- ಹೋಟೆಲ್ ರೂಮಿನಲ್ಲಿ ನಡೆಯುವ ಸಂಭಾಷಣೆಯ ದೃಶ್ಯವೊಂದು ಹಂತಕನ ಮನೋವಿಕೃತಿಯನ್ನು ಅದ್ಭುತವಾಗಿ ಚಿತ್ರಿಸುತ್ತದೆ. ಒಂದು ಸಾಮಾನ್ಯ ಸುದ್ದಿಯ ಚರ್ಚೆಯಿಂದ ಶುರುವಾಗುವ ಈ ದೃಶ್ಯ, ಪ್ರತಿಯೊಂದು ಸಾಲಿನಲ್ಲೂ ಉದ್ವೇಗವನ್ನು ಹೆಚ್ಚಿಸುತ್ತಾ ಅನಿವಾರ್ಯ ಅಂತ್ಯದತ್ತ ಸಾಗುತ್ತದೆ. ಹಂತಕನ ಕಾರ್ಯವೈಖರಿ ಮತ್ತು ಬಲಿಪಶುಗಳ ಸಂಖ್ಯೆಯನ್ನು ತೋರಿಸುವ ದೃಶ್ಯದಲ್ಲಿ, ಪ್ರತಿ ಹಂತದಲ್ಲೂ ಬೇರೆ ಬೇರೆ ನಟಿಯರನ್ನು ಬಳಸಿರುವ ಕ್ರಮ ಬುದ್ಧಿವಂತಿಕೆಯಿಂದ ಕೂಡಿದೆ.
- ಚಿತ್ರದ ದ್ವಿತೀಯಾರ್ಧದಲ್ಲಿ ಬರಹ ಮತ್ತು ಮೇಕಿಂಗ್ಗಿಂತ ಹೆಚ್ಚಾಗಿ ಮಮ್ಮುಟ್ಟಿ ಮತ್ತು ವಿನಾಯಕನ್ ಅವರ ಅಭಿನಯವೇ ಚಿತ್ರವನ್ನು ಮುನ್ನಡೆಸುತ್ತದೆ.
ತಮಿಳುನಾಡು ಮತ್ತು ಕೇರಳದ ನಡುವೆ ಸಾಗುವ ಈ ಕಥೆಯಲ್ಲಿ, ಮಮ್ಮುಟ್ಟಿ ತಮ್ಮ ಭಾಷೆ ಮತ್ತು ವರ್ತನೆಯಲ್ಲಿ ಸರಾಗವಾದ ಬದಲಾವಣೆಗಳನ್ನು ತಂದಿದ್ದಾರೆ. ಇಲ್ಲಿ ‘ನನ್ಪಕಲ್ ನೇರತ್ತು ಮಯಕ್ಕಂ’ ಚಿತ್ರದ ಛಾಯೆ ಎಲ್ಲಿಯೂ ಸುಳಿಯುವುದಿಲ್ಲ. ವಿನಾಯಕನ್ ಅವರು ತಮ್ಮ ಸಂಯಮದ ನಟನೆಯ ಮೂಲಕ ಮಮ್ಮುಟ್ಟಿಯವರಿಗೆ ಸಮನಾಗಿ ನಿಲ್ಲುತ್ತಾರೆ. ಅವರಿಗೆ ‘ನತ್ತು’ ಎಂಬ ಅಡ್ಡಹೆಸರು ನೀಡಿರುವುದು, ಮಮ್ಮುಟ್ಟಿಯವರ ‘ಕನಲ್ಕಟ್ಟು’ (1991) ಚಿತ್ರದ ಪಾತ್ರಕ್ಕೆ ನೀಡಿದ ಗೌರವದಂತೆ ಕಾಣುತ್ತದೆ. ಆ ಹೆಸರಿನ ಹಿಂದಿನ ಹಿನ್ನೆಲೆಯನ್ನು ಕ್ಲೈಮ್ಯಾಕ್ಸ್ನಲ್ಲಿ ಬಿಚ್ಚಿಟ್ಟ ರೀತಿ ಆಕರ್ಷಕವಾಗಿದೆ. ಕೆಲವು ಸ್ವತಂತ್ರ ಆಲೋಚನೆಗಳಿದ್ದರೂ ‘ಕಳಂಗಾವಲ್’ ಮತ್ತೊಂದು ಸಾಧಾರಣ ಸರಣಿ ಹಂತಕನ ಕಥೆಯಾಗುವ ಸಾಧ್ಯತೆ ಇತ್ತು. ಆದರೆ ಮಮ್ಮುಟ್ಟಿ ಮತ್ತು ವಿನಾಯಕನ್ ತಮ್ಮ ಅಭಿನಯದ ಶಕ್ತಿಯಿಂದ ಇದನ್ನು ಮುಂದಿನ ಹಂತಕ್ಕೆ ಕೊಂಡೊಯ್ದಿದ್ದಾರೆ.
ಚಿತ್ರವು ಕೇವಲ ನಟನೆಯಿಂದ ಮಾತ್ರವಲ್ಲದೆ, ತನ್ನ ಮೇಕಿಂಗ್ ಶೈಲಿಯಿಂದಲೂ ಗಮನ ಸೆಳೆಯುತ್ತದೆ. ಚೊಚ್ಚಲ ನಿರ್ದೇಶಕ ಜಿತಿನ್ ಕೆ. ಜೋಸ್ ಅವರು ಸಸ್ಪೆನ್ಸ್ ಉಳಿಸಿಕೊಳ್ಳುವುದಕ್ಕಿಂತ ಹೆಚ್ಚಾಗಿ, ಪ್ರೇಕ್ಷಕರನ್ನು ಪಾತ್ರಗಳ ಮನಸ್ಥಿತಿಯೊಳಗೆ ಕರೆದೊಯ್ಯುವಲ್ಲಿ ಯಶಸ್ವಿಯಾಗಿದ್ದಾರೆ. ವಾಣಿಜ್ಯ ಸಿನಿಮಾಗಳ ಅಬ್ಬರವಿಲ್ಲದ ನವ್ಯ-ಸಿನಿಕತೆಯನ್ನು ಅವರು ಅಳವಡಿಸಿಕೊಂಡಿದ್ದಾರೆ.
ಚಿತ್ರದ ದೃಶ್ಯ ವೈಭವವು ಕಥೆಯ ಗಾಂಭೀರ್ಯಕ್ಕೆ ಪೂರಕವಾಗಿದೆ. ಕೇರಳದ ಹಸಿರು ಮತ್ತು ತಮಿಳುನಾಡಿನ ಶುಷ್ಕ ಭೂಪ್ರದೇಶಗಳ ನಡುವಿನ ವ್ಯತ್ಯಾಸವನ್ನು ಕ್ಯಾಮೆರಾ ಕಣ್ಣಿನಲ್ಲಿ ಅತ್ಯಂತ ನೈಜವಾಗಿ ಸೆರೆಹಿಡಿಯಲಾಗಿದೆ. ಕತ್ತಲೆಯ ದೃಶ್ಯಗಳಲ್ಲಿನ ಬೆಳಕಿನ ವಿನ್ಯಾಸವು ಭಯ ಮತ್ತು ಆತಂಕವನ್ನು ಹೆಚ್ಚಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ.
ಮುಜೀಬ್ ಮಜೀದ್ ಅವರ ಸಂಗೀತ ಈ ಚಿತ್ರದ ದೊಡ್ಡ ಶಕ್ತಿ. ಹಂತಕನ ಕ್ರೌರ್ಯವನ್ನು ತೋರಿಸುವಾಗ ಹಳೆಯ ತಮಿಳು ಹಾಡುಗಳ ಧಾಟಿಯ ಸಂಗೀತವನ್ನು ಬಳಸಿರುವುದು ವಿಶಿಷ್ಟವಾಗಿದೆ. ಇದು ಹಂತಕನ ಪಾತ್ರಕ್ಕೆ ಒಂದು ರೀತಿಯ ವಿಚಿತ್ರ ಮತ್ತು ಭಯಾನಕ ವ್ಯಕ್ತಿತ್ವವನ್ನು ನೀಡುತ್ತದೆ. ಚಿತ್ರದ ವೇಗವು ‘ಸ್ಲೋ-ಬರ್ನ್’ ಮಾದರಿಯಲ್ಲಿದೆ. ಅಂದರೆ ಕಥೆ ನಿಧಾನವಾಗಿ ಬಿಚ್ಚಿಕೊಳ್ಳುತ್ತಾ ಹೋಗುತ್ತದೆ. ಸಂಕಲನಕಾರರು ಅನಗತ್ಯ ದೃಶ್ಯಗಳಿಗೆ ಕತ್ತರಿ ಹಾಕಿ, ಕೇವಲ ಪಾತ್ರಗಳ ನಡುವಿನ ಸಂಘರ್ಷಕ್ಕೆ ಹೆಚ್ಚು ಒತ್ತು ನೀಡಿದ್ದಾರೆ. ವಿಶೇಷವಾಗಿ, ಹಂತಕನ ಸರಣಿ ಕೊಲೆಗಳನ್ನು ವಿವರಿಸುವ ದೃಶ್ಯಗಳಲ್ಲಿನ ಎಡಿಟಿಂಗ್ ಕೌಶಲ ಮೆಚ್ಚುವಂತಿದೆ. ಪೊಲೀಸ್ ಪ್ರೊಸೀಜರಲ್ ಚಿತ್ರಗಳಲ್ಲಿ ಧ್ವನಿ ಬಹಳ ಮುಖ್ಯ. ಪ್ರತಿ ಸಣ್ಣ ಸದ್ದೂ ಕೂಡ ಪ್ರೇಕ್ಷಕರಲ್ಲಿ ಕುತೂಹಲ ಮೂಡಿಸುವಂತೆ ಮಾಡಲಾಗಿದೆ. ಮಮ್ಮುಟ್ಟಿಯವರ ಸಂಭಾಷಣೆಯ ಶೈಲಿ ಮತ್ತು ವಿನಾಯಕನ್ ಅವರ ಮೌನವನ್ನು ಧ್ವನಿ ವಿನ್ಯಾಸದ ಮೂಲಕ ಅಚ್ಚುಕಟ್ಟಾಗಿ ಬಳಸಿಕೊಳ್ಳಲಾಗಿದೆ.
ಒಟ್ಟಾರೆಯಾಗಿ, ಕಳಂಗಾವಲ್ ತಾಂತ್ರಿಕವಾಗಿ ಒಂದು ಸದಭಿರುಚಿಯ ಸಿನಿಮಾ ಎನ್ನಬಹುದು.
ಸಯನೈಡ್ ಮೋಹನ್ ಯಾರು?
ಸಯನೈಡ್ ಮೋಹನ್ ಎಂಬುದು ಕರ್ನಾಟಕದ ಅತ್ಯಂತ ಭಯಾನಕ ಸರಣಿ ಹಂತಕರಲ್ಲಿ ಒಬ್ಬನಾದ ಮೋಹನ್ ಕುಮಾರ್ ಗೆ ನೀಡಲಾದ ಹೆಸರು.ಆತನ ಕ್ರೌರ್ಯ ಮತ್ತು ಕಾರ್ಯವೈಖರಿ ಕೇಳಿದರೆ ಇಂದಿಗೂ ಮೈ ಜುಂ ಎನ್ನುತ್ತದೆ. ಮೋಹನ್ ಕುಮಾರ್ ಮೂಲತಃ ದಕ್ಷಿಣ ಕನ್ನಡ ಜಿಲ್ಲೆಯ ಬಂಟ್ವಾಳದವನು. ಆತ ವೃತ್ತಿಯಲ್ಲಿ ಒಬ್ಬ ಪ್ರಾಥಮಿಕ ಶಾಲೆಯ ದೈಹಿಕ ಶಿಕ್ಷಣ ಶಿಕ್ಷಕನಾಗಿದ್ದ. ಇದೇ ಕಾರಣಕ್ಕೆ ಆತನನ್ನು ‘ಮೋಹನ್ ಮಾಸ್ಟರ್’ ಎಂದೂ ಕರೆಯುತ್ತಿದ್ದರು. ಆತನ ಕೊಲೆ ಮಾಡುವ ವಿಧಾನ ಬಹಳ ವಿಚಿತ್ರ ಮತ್ತು ತುಂಬಾ ಕೂಲ್ ಆಗಿ ತನ್ನ ಕೆಲಸ ಮಾಡಿ ಮುಗಿಸುತ್ತಿದ್ದ. ಆತ ಹೆಚ್ಚಾಗಿ ಮದುವೆಯಾಗದ, ಬಡ ಕುಟುಂಬದ ಯುವತಿಯರನ್ನು ಗುರಿ ಮಾಡುತ್ತಿದ್ದ. ಸರ್ಕಾರಿ ಕೆಲಸ ಕೊಡಿಸುವುದಾಗಿ ಅಥವಾ ಮದುವೆಯಾಗುವುದಾಗಿ ನಂಬಿಸಿ ಅವರನ್ನು ದೇವಸ್ಥಾನಗಳಿಗೆ ಅಥವಾ ದೂರದ ಊರುಗಳಿಗೆ ಕರೆದೊಯ್ಯುತ್ತಿದ್ದ.
ಯುವತಿಯರ ಜೊತೆ ರಾತ್ರಿ ಕಳೆದ ನಂತರ, ಮಾರನೆಯ ದಿನ ಬೆಳಿಗ್ಗೆ ಬಸ್ ನಿಲ್ದಾಣಕ್ಕೆ ಕರೆತರುತ್ತಿದ್ದ. ಗರ್ಭಧಾರಣೆಯನ್ನು ತಡೆಯುವ ಮಾತ್ರೆ ಎಂದು ಸುಳ್ಳು ಹೇಳಿ ಅವರಿಗೆ ಸಯನೈಡ್ ಮಾತ್ರೆಯನ್ನು ನುಂಗಲು ಕೊಡುತ್ತಿದ್ದ. ಬಸ್ ನಿಲ್ದಾಣದ ಸಾರ್ವಜನಿಕ ಶೌಚಾಲಯಕ್ಕೆ ಹೋಗಿ, ವಾಂತಿ ಬಂದರೆ ಬಟ್ಟೆ ಕೊಳೆಯಾಗಬಾರದು ಎಂಬ ನೆಪ ಹೇಳಿ ಮಾತ್ರೆ ನುಂಗುವಂತೆ ಹೇಳುತ್ತಿದ್ದ. ಅವರು ಶೌಚಾಲಯದಲ್ಲಿ ಸತ್ತ ನಂತರ, ಮೈಮೇಲಿದ್ದ ಚಿನ್ನಾಭರಣಗಳೊಂದಿಗೆ ಆತ ಪರಾರಿಯಾಗುತ್ತಿದ್ದ. ಅಧಿಕೃತ ದಾಖಲೆಗಳ ಪ್ರಕಾರ, ಮೋಹನ್ ಕುಮಾರ್ 20ಕ್ಕೂ ಹೆಚ್ಚು ಮಹಿಳೆ/ಯುವತಿಯರನ್ನು ಇದೇ ರೀತಿ ಸಯನೈಡ್ ನೀಡಿ ಕೊಂದಿದ್ದಾನೆ. 2003 ರಿಂದ 2009 ರ ಅವಧಿಯಲ್ಲಿ ಈ ಸರಣಿ ಕೊಲೆಗಳು ನಡೆದಿದ್ದವು. 2009 ರಲ್ಲಿ ಬಂಟ್ವಾಳದ ಅನಿತಾ ಎಂಬ ಯುವತಿಯ ನಾಪತ್ತೆ ಪ್ರಕರಣವನ್ನು ಬೆನ್ನಟ್ಟಿದ ಪೊಲೀಸರಿಗೆ ಈತನ ಸುಳಿವು ಸಿಕ್ಕಿತ್ತು. ಅಕ್ಟೋಬರ್ 2009ರಲ್ಲಿ ಈತನನ್ನು ಬಂಧಿಸಲಾಯಿತು. ಈತನ ವಿರುದ್ಧ ಅನೇಕ ಪ್ರಕರಣದಲ್ಲಿ ನ್ಯಾಯಾಲಯ ಮರಣದಂಡನೆ ವಿಧಿಸಿದೆ. ನಂತರ ಕೆಲವು ಪ್ರಕರಣಗಳಲ್ಲಿ ಅದನ್ನು ಜೀವಾವಧಿ ಶಿಕ್ಷೆಗೆ ಬದಲಾಯಿಸಲಾಯಿತು. ಪ್ರಸ್ತುತ ಈತ ಜೈಲಿನಲ್ಲಿದ್ದಾನೆ.
‘ಕಳಂಗಾವಲ್’ ಸಿನಿಮಾ ಈತನ ಕಥೆಯಿಂದ ಸ್ಫೂರ್ತಿ ಪಡೆದಿದ್ದರೂ, ಚಿತ್ರದಲ್ಲಿ ಸಿನಿಮಾಟಿಕಾ ಆಗಿ ಕೆಲವು ಬದಲಾವಣೆಗಳನ್ನು ಮಾಡಿಕೊಳ್ಳಲಾಗಿದೆ. ಮಮ್ಮುಟ್ಟಿ ಪಾತ್ರವು ಈ ಕ್ರೂರ ವ್ಯಕ್ತಿಯ ಮನಸ್ಥಿತಿಯನ್ನು ಮತ್ತು ಆತ ಹೇಗೆ ಸಮಾಜದಲ್ಲಿ ಸಾಮಾನ್ಯ ಮನುಷ್ಯನಂತೆ ಬದುಕುತ್ತಿದ್ದ ಎಂಬುದನ್ನು ಪ್ರತಿಬಿಂಬಿಸುತ್ತದೆ. ಈ ಪ್ರಕರಣವನ್ನು ಭೇದಿಸುವುದು ಪೊಲೀಸರಿಗೆ ಬಹಳ ಸವಾಲಾಗಿತ್ತು, ಏಕೆಂದರೆ ಮೋಹನ್ ಯಾವುದೇ ಸುಳಿವು ಬಿಡುತ್ತಿರಲಿಲ್ಲ. ಶೌಚಾಲಯಗಳಲ್ಲಿ ಹೆಣಗಳು ಸಿಕ್ಕಾಗ ಪೊಲೀಸರು ಅದನ್ನು ‘ಆತ್ಮಹತ್ಯೆ’ ಎಂದು ಭಾವಿಸಿ ಫೈಲ್ ಕ್ಲೋಸ್ ಮಾಡುತ್ತಿದ್ದರು.
- 2009ರಲ್ಲಿ ಬಂಟ್ವಾಳದ ಅನಿತಾ ಎಂಬ ಯುವತಿ ನಾಪತ್ತೆಯಾದಾಗ ತನಿಖೆ ಚುರುಕುಗೊಂಡಿತು. ಆಕೆಯ ಫೋನ್ ಕರೆಗಳನ್ನು ಪರಿಶೀಲಿಸಿದಾಗ ‘ಧನುಷ್’ ಎಂಬ ವ್ಯಕ್ತಿಯ ಪರಿಚಯವಾಯಿತು. ಈ ಧನುಷ್ ಬೇರೆ ಯಾರೂ ಅಲ್ಲ, ಮೋಹನ್ ಕುಮಾರ್ ಆಗಿದ್ದ. ಪೊಲೀಸರು ಮೋಹನ್ನನ್ನು ಹಿಡಿದಾಗ ಆತನ ಬ್ಯಾಗ್ನಲ್ಲಿ ಸೈನೈಡ್ ಮಾತ್ರೆಗಳು ಮತ್ತು ಅನೇಕ ಯುವತಿಯರ ಆಭರಣಗಳು ಪತ್ತೆಯಾಗಿದ್ದವು.ವಿಚಾರಣೆಯ ಸಮಯದಲ್ಲಿ ಆತ ಕಿಂಚಿತ್ತೂ ಭಯಪಡದೆ, ತಾನು ಮಾಡಿದ ಕೊಲೆಗಳನ್ನು ಬಹಳ ವಿವರವಾಗಿ ವಿವರಿಸಿದ್ದ. ಆತನಿಗೆ ಕಾನೂನಿನ ಬಗ್ಗೆ ಅಪಾರ ಜ್ಞಾನವಿತ್ತು. ಹಾಗಾಗಿ ಕೋರ್ಟ್ನಲ್ಲಿ ತನ್ನ ಪರವಾಗಿ ತಾನೇ ವಾದ ಮಾಡಿದ್ದ.
‘ಕಳಂಗಾವಲ್’ ಸಿನಿಮಾ ಸಯನೈಡ್ ಮೋಹನ್ನಿಂದ ಸ್ಫೂರ್ತಿ ಪಡೆದಿದ್ದರೂ, ನಿರ್ದೇಶಕ ಜಿತಿನ್ ಕೆ. ಜೋಸ್ ಕೆಲವು ಪ್ರಮುಖ ಬದಲಾವಣೆಗಳನ್ನು ಮಾಡಿದ್ದಾರೆ. ನೈಜ ಘಟನೆಗಳು ಹೆಚ್ಚಾಗಿ ದಕ್ಷಿಣ ಕನ್ನಡ ಮತ್ತು ಕರ್ನಾಟಕದ ಸುತ್ತಮುತ್ತ ನಡೆದಿದ್ದವು. ಆದರೆ ಸಿನಿಮಾದಲ್ಲಿ ಕಥೆಯು ಕೇರಳ ಮತ್ತು ತಮಿಳುನಾಡು ಗಡಿ ಭಾಗಗಳಲ್ಲಿ ನಡೆದಿರುವಂತೆ ತೋರಿಸಲಾಗಿದೆ. ಸಮಾಜದಲ್ಲಿ ಮೋಹನ್ ಒಬ್ಬ ಸಾಧಾರಣ ಶಿಕ್ಷಕನಾಗಿದ್ದ. ಸಿನಿಮಾದಲ್ಲಿ ಮಮ್ಮುಟ್ಟಿಯಂತ ಸೂಪರ್ಸ್ಟಾರ್ ನಟಿಸಿರುವುದರಿಂದ, ಪಾತ್ರಕ್ಕೆ ಒಂದು ರೀತಿಯ ‘ಗಾಂಭೀರ್ಯ’ ಮತ್ತು ‘ಇಂಟೆನ್ಸಿಟಿ’ ನೀಡಲಾಗಿದೆ. ಆದರೆ ಆತನ ಕ್ರೌರ್ಯವನ್ನು ಎಲ್ಲಿಯೂ ಕಡಿಮೆ ಮಾಡಿಲ್ಲ. ಸಿನಿಮಾದ ಮಧ್ಯಭಾಗದಲ್ಲಿ ಬರುವ ಒಂದು ಟ್ವಿಸ್ಟ್ ನೈಜ ಕಥೆಗಿಂತ ಭಿನ್ನವಾಗಿದೆ. ಇದು ಕೇವಲ ಕ್ರೈಮ್ ರಿಪೋರ್ಟ್ ಆಗದೆ, ಒಂದು ‘ಸೈಕಲಾಜಿಕಲ್ ಥ್ರಿಲ್ಲರ್’ ಆಗಿ ಮೂಡಿಬರಲು ಸಹಾಯ ಮಾಡಿದೆ. ನೈಜ ಜೀವನದಲ್ಲಿ ಅನೇಕ ಅಧಿಕಾರಿಗಳು ಈ ಕೇಸ್ ಮೇಲೆ ಕೆಲಸ ಮಾಡಿದ್ದರು. ಆದರೆ ಸಿನಿಮಾದಲ್ಲಿ ವಿನಾಯಕನ್ ಅವರ ಪಾತ್ರದ ಮೂಲಕ ತನಿಖೆಯ ಸಂಪೂರ್ಣ ಜವಾಬ್ದಾರಿಯನ್ನು ಒಬ್ಬ ಚುರುಕುಬುದ್ಧಿಯ ಅಧಿಕಾರಿಯ ಮೇಲೆ ಕೇಂದ್ರೀಕರಿಸಲಾಗಿದೆ.
ಪ್ರಸ್ತುತ ಚಿತ್ರವೂ ಪುತ್ತೂರಿನ ಭಾರತ್ ಸಿನಿಮಾಸ್ ನಲ್ಲಿ ತೆರೆ ಕಾಣುತ್ತಿದ್ದು ಎಲ್ಲರೂ ವೀಕ್ಷಿಸಬಹುದಾಗಿದೆ.
