ಪುತ್ತೂರು:ನೆಟ್ಲಮುಡ್ನೂರು ಹಾಗೂ ಅದರ ಸುತ್ತಮುತ್ತಲಿನ ಗ್ರಾಮಗಳ ಜನತೆಯ ಬಹುಕಾಲದ ಬೇಡಿಕೆಯಾಗಿದ್ದ ಪ್ಯಾಸೆಂಜರ್ ರೈಲು ನಿಲುಗಡೆ ಬೇಡಿಕೆ ಇದೀಗ ಈಡೇರಿದೆ.ತಮ್ಮ ಕನಸು ನನಸಾದ ಸಂತಸ ಈ ಭಾಗದ ಜನತೆಯದ್ದಾಗಿದೆ.ದಿನನಿತ್ಯ ಉದ್ಯೋಗ, ಶಿಕ್ಷಣ, ಆರೋಗ್ಯ ಹಾಗೂ ವ್ಯಾಪಾರ ಉದ್ದೇಶಕ್ಕಾಗಿ ರೈಲನ್ನು ಅವಲಂಬಿಸಿದ್ದ ಸಾವಿರಾರು ಪ್ರಯಾಣಿಕರ ಮನವಿಗೆ ಸ್ಪಂದಿಸಿ ರೈಲು ನಿಲುಗಡೆಗೆ ಇದೀಗ ವ್ಯವಸ್ಥೆ ಕಲ್ಪಿಸಲಾಗಿದೆ.
ಈ ಮಹತ್ವದ ಬೇಡಿಕೆ ಕುರಿತು ದ.ಕ.ಸಂಸದ ಕ್ಯಾ|ಬ್ರಿಜೇಶ್ ಚೌಟ ಅವರು ಗಂಭೀರವಾಗಿ ಪರಿಗಣಿಸಿ ರೈಲ್ವೇ ಇಲಾಖೆ,ಸಚಿವರೊಂದಿಗೆ ನಿರಂತರ ಸಂಯೋಜನೆ ನಡೆಸಿದ್ದರು.ಕೇಂದ್ರ ರೈಲ್ವೇ ಖಾತೆ ರಾಜ್ಯ ಸಚಿವ ವಿ.ಸೋಮಣ್ಣ ಸಕಾರಾತ್ಮಕವಾಗಿ ಸ್ಪಂದಿಸಿದ್ದರು.ಇದರಿಂದಾಗಿ ಈ ಪ್ರದೇಶಕ್ಕೆ ಹೊಸ ಆಶಾಕಿರಣ ಮೂಡಿದೆ.ಗ್ರಾಮೀಣ ಪ್ರದೇಶದ ಜನರ ಧ್ವನಿಯನ್ನು ಕೇಂದ್ರದ ಮಟ್ಟಕ್ಕೆ ತಲುಪಿಸಿದ ಜನಪ್ರತಿನಿಧಿಗಳ ಕಾರ್ಯಕ್ಕೆ ನಾಗರಿಕರಿಂದ ಶ್ಲಾಘನೆ ವ್ಯಕ್ತವಾಗಿದೆ.ನೈರುತ್ಯ ರೈಲ್ವೆ ಇಲಾಖೆ ಅಧಿಕಾರಿಗಳ ತಾಂತ್ರಿಕ ಸಹಕಾರವೂ ಮಹತ್ವದ ಪಾತ್ರ ವಹಿಸಿದೆ.ರೈಲು ನಿಲುಗಡೆಗೆ ಅಗತ್ಯವಿರುವ ಸಮಯ ನಿಗದಿ,ಭದ್ರತೆ ಹಾಗೂ ಕಾರ್ಯಾಚರಣಾ ವ್ಯವಸ್ಥೆಗಳನ್ನು ಸಮರ್ಪಕವಾಗಿ ರೂಪಿಸುವ ಮೂಲಕ ಇಲಾಖೆ ಜನರ ವಿಶ್ವಾಸವನ್ನುಗಳಿಸಿದೆ.
ಈ ಹೋರಾಟಕ್ಕೆ ತಳಮಟ್ಟದಲ್ಲಿ ಶಕ್ತಿ ತುಂಬಿದವರು ನೆಟ್ಲಮುಡ್ನೂರು ಗ್ರಾಮಪಂಚಾಯತ್ ಸದಸ್ಯ ಅಶೋಕ್ ರೈ ಎಲ್ಕಾಜೆಯವರು.ಜನರ ಅಗತ್ಯವನ್ನು ಅರಿತು, ಪ್ರಯಾಣಿಕರ ಸಮಸ್ಯೆಗಳನ್ನು ಸಂಗ್ರಹಿಸಿ, ಸಂಬಂಧಪಟ್ಟ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳ ಗಮನಕ್ಕೆ ತರುವಲ್ಲಿ ಅವರು ತೋರಿದ ಬದ್ಧತೆ ಮತ್ತು ಶ್ರಮ ವಿಶೇಷವಾಗಿ ಅಭಿನಂದನಾರ್ಹವಾಗಿದೆ.ಇವರಿಗೆ ಶಕ್ತಿ ತುಂಬಿದವರು ರೈಲ್ವೇ ಇಲಾಖೆಯಲ್ಲಿ ಮುಖ್ಯ ಟಿಕೆಟ್ ನಿರೀಕ್ಷಣ ಅಧಿಕಾರಿಯಾಗಿ ಕಾರ್ಯ ನಿರ್ವಹಿಸುತ್ತಿರುವ ಸ್ಥಳೀಯರೇ ಆಗಿರುವ ವಿಠಲ್ ನಾಯ್ಕರವರು.ಇವರಿಬ್ಬರ ನಿರಂತರ ಪ್ರಯತ್ನದಿಂದ ನೇರಳಕಟ್ಟೆ ನಿಲ್ದಾಣದಲ್ಲಿ ರೈಲು ನಿಲುಗಡೆಯಾಗುವಂತಾಗಿದೆ ಎಂದು ಪ್ರಯಾಣಿಕರು ತಿಳಿಸಿದ್ದಾರೆ.
