ಪುತ್ತೂರು : ಅಡಿಕೆ ಬೆಳೆಯುವ ಕರ್ನಾಟಕದ ರೈತರಿಗೆ ಆತಂಕಕಾರಿ ಸುದ್ದಿ. ಅಡಿಕೆಯಲ್ಲಿ ಇದುವರೆಗೆ ಕಂಡುಬರದಿದ್ದ ಹೊಸ ಎಲೆ ತಿನ್ನುವ ಕೀಟವೊಂದು ಕಾಣಿಸಿಕೊಂಡಿದ್ದು, ಭಾರತೀಯ ತೋಟದ ಬೆಳೆಗಳ ಸಂಶೋಧನಾ ಸಂಸ್ಥೆ ICAR-CPCRI, ಕಾಸರಗೋಡು ಅಧಿಕೃತವಾಗಿ Pest Alert ಹೊರಡಿಸಿದೆ.ಕೀಟವನ್ನು ತಾತ್ಕಾಲಿಕವಾಗಿ Acria sp. (Lepidoptera: Depressariidae) ಎಂದು ಗುರುತಿಸಲಾಗಿದೆ.
ಹಾವಳಿ ಪತ್ತೆಯಾದ ಸ್ಥಳಗಳು:
ಈ ಕೀಟದ ಹಾವಳಿ ಮೊದಲು ವಿಟ್ಲದಲ್ಲಿರುವ ICAR-CPCRI ಪ್ರಾದೇಶಿಕ ಸಂಶೋಧನಾ ಕೇಂದ್ರದ ಅಡಿಕೆ ನರ್ಸರಿಯಲ್ಲೇ ಕಂಡುಬಂದಿತ್ತು. ಇದನ್ನು CPCRIಯ 2025ರ ವಾರ್ಷಿಕ ವರದಿಯಲ್ಲಿ ದಾಖಲಿಸಲಾಗಿದೆ.ನಂತರ ಸೆಪ್ಟೆಂಬರ್ 2026ರಲ್ಲಿ ಉತ್ತರ ಕನ್ನಡ ಜಿಲ್ಲೆ, ಸಿದ್ದಾಪುರ ತಾಲೂಕಿನ ಮುಗದೂರು ಗ್ರಾಮದಲ್ಲಿ,ಅಕ್ಟೋಬರ್ 2026ರಂದು ಬೆಂಗಳೂರು ದಕ್ಷಿಣ ಜಿಲ್ಲೆ, ಕನಕಪುರ ತಾಲೂಕಿನ ಕನಕಪುರದಲ್ಲಿ ಪತ್ತೆಯಾಗಿದೆ.ಬೇರೆ ಬೇರೆ ಜಿಲ್ಲೆಗಳಲ್ಲಿ ಒಂದೇ ಸಮಯದಲ್ಲಿ ಕಾಣಿಸಿಕೊಂಡಿರುವುದು ಈ ಕೀಟ ರಾಜ್ಯದಾದ್ಯಂತ ಹರಡುವ ಸಾಧ್ಯತೆ ಇದೆ ಎಂದು ವಿಜ್ಞಾನಿಗಳು ಎಚ್ಚರಿಸಿದ್ದಾರೆ.
ಹಾನಿಯ ಲಕ್ಷಣ ಹೇಗೆ ಗುರುತಿಸುವುದು?
- ಸಣ್ಣ ಮರಿಹುಳುಗಳು (ಹಸಿರು-ಕಂದು ಬಣ್ಣ) ಅಡಿಕೆ ಎಲೆಗಳ ಮೇಲೆ ರೇಷ್ಮೆಯಂತಹ ತೆಳುವಾದ ಬಲೆ ಕಟ್ಟಿಕೊಳ್ಳುತ್ತವೆ.
- ಆ ಬಲೆಯೊಳಗೆ ಇದ್ದುಕೊಂಡೇ ಎಲೆಯ ಹಸಿರು ಭಾಗವನ್ನು ಕೆರೆದು ತಿನ್ನುತ್ತವೆ.
- ತಿಂದ ಜಾಗದಲ್ಲಿ ಎಲೆಗಳು ಬಿಳಿಚಿಕೊಂಡು, ನಂತರ ಒಣಗುತ್ತವೆ.
- ಹಾವಳಿ ಜಾಸ್ತಿಯಾದರೆ ಇಡೀ ಗರಿ (leaflet) ಬೋಳಾಗುತ್ತದೆ, ಮರವೇ ಬೋಳಾದಂತೆ ಕಾಣುತ್ತದೆ.ಸಣ್ಣ ನರ್ಸರಿ ಸಸಿಗಳು ಸಂಪೂರ್ಣ ಒಣಗಿ ಹೋಗುತ್ತವೆ.
ವಿಜ್ಞಾನಿಗಳ ಪ್ರಕಾರ, ಜಗತ್ತಿನಲ್ಲೇ ಅಡಿಕೆ ಬೆಳೆಯ ಮೇಲೆ Acria sp. ಕಾಣಿಸಿಕೊಂಡಿರುವುದು ಇದೇ ಮೊದಲು. ಆದ್ದರಿಂದ ಇದನ್ನು ಅಡಿಕೆಗೆ ಹೊಸ ಕೀಟ ಎಂದು ಪರಿಗಣಿಸಲಾಗಿದೆ. ಸದ್ಯ ಕುಲ (Genus) ಮಟ್ಟದಲ್ಲಿ ಗುರುತಿಸಿದ್ದು, ನಿಖರ ಪ್ರಭೇದ ಯಾವುದೆಂದು ಕಾಸರಗೋಡಿನ ಪ್ರಯೋಗಾಲಯದಲ್ಲಿ DNA ಪರೀಕ್ಷೆ ನಡೆಯುತ್ತಿದೆ.
ರೈತರು ಏನು ಮಾಡಬೇಕು? – CPCRI ಶಿಫಾರಸು
- ಪ್ರತಿದಿನ ತೋಟಕ್ಕೆ ಹೋಗುವಾಗ ಎಲೆಗಳ ಕೆಳಭಾಗ, ಸುಳಿ ಭಾಗವನ್ನು ಸೂಕ್ಷ್ಮವಾಗಿ ಗಮನಿಸಿ. ಬಲೆ ಅಥವಾ ಹುಳು ಕಂಡರೆ ನಿರ್ಲಕ್ಷಿಸಬೇಡಿ.
- ಕಂಡ ತಕ್ಷಣ ಆ ಎಲೆಯನ್ನು ಕಿತ್ತು ಪ್ಲಾಸ್ಟಿಕ್ ಚೀಲದಲ್ಲಿ ಹಾಕಿ ನಾಶ ಮಾಡಿ ಅಥವಾ ಸುಟ್ಟುಬಿಡಿ. ಆರಂಭದಲ್ಲೇ ತಡೆದರೆ ಹರಡುವುದಿಲ್ಲ.
- ತೀವ್ರ ಹಾವಳಿ ಇರುವ ಮರಗಳಿಗೆ ತಾತ್ಕಾಲಿಕವಾಗಿ Chlorantraniliprole 18.5% SC – ಪ್ರತಿ ಲೀಟರ್ ನೀರಿಗೆ 0.3 ಮಿ.ಲಿ. ಬೆರೆಸಿ ಸಂಜೆ ವೇಳೆ ಸಿಂಪಡಿಸಿ. ಇದು ಮರಿಹುಳುಗಳನ್ನು ನಿಯಂತ್ರಿಸುತ್ತದೆ.
- ಯಾವುದೇ ಕೀಟನಾಶಕ ಸಿಂಪಡಿಸುವ ಮೊದಲು ಕೃಷಿ ಅಧಿಕಾರಿಗಳನ್ನು ಸಂಪರ್ಕಿಸಿ.
ನಿಮ್ಮ ತೋಟದಲ್ಲಿ ಇಂತಹ ಲಕ್ಷಣ ಕಂಡರೆ ದಯವಿಟ್ಟು ಫೋಟೋ ತೆಗೆದು, ಸ್ಥಳದ ವಿವರದೊಂದಿಗೆ ಕೆಳಗಿನ ವಿಜ್ಞಾನಿಗಳಿಗೆ ವಾಟ್ಸಾಪ್ ಮಾಡಿ:Dr. ಮಹೇಂದ್ರನ್ ಬಿ. – 8277624573 ICAR-CPCRI, ಕಾಸರಗೋಡು ಈ ಮಾಹಿತಿ ಸಂಗ್ರಹಿಸಿ ಕೀಟದ ಮೂಲ ಮತ್ತು ಶಾಶ್ವತ ನಿಯಂತ್ರಣ ಕ್ರಮಗಳನ್ನು ಕಂಡುಹಿಡಿಯಲು ಇದು ಸಹಾಯವಾಗುತ್ತದೆ.
ಈ ಫೋಟೋದಲ್ಲಿ ಇರುವ ಅಂಕೆಗಳು
a) ರಿಂದ i) ವರೆಗೆ – ಅವು ಕೀಟದ ಹಾವಳಿಯ ಬೇರೆ ಬೇರೆ ಹಂತಗಳನ್ನು ತೋರಿಸಲು ಹಾಕಿರುವ ಲೇಬಲ್‌ಗಳು.
a) – ಬೋಳಾದ ಎಲೆ (Skeltonized leaf)
ಎಲೆಯ ಹಸಿರು ಭಾಗವನ್ನು ಹುಳು ತಿಂದಿದ್ದು, ಸಣ್ಣ ಸಣ್ಣ ತೂತುಗಳು ಬಿದ್ದಿದೆ.
b) – ಮೇಲಿನಿಂದ ನೋಡಿದಾಗ ಬೋಳಾದ ಮರದ ಸುಳಿ
ಮರದ ಮೇಲಿನ ಹೊಸ ಗರಿಗಳು ತೂತು ಬಿದ್ದು ಕಾಣುತ್ತಿದೆ.
c) – ತೀವ್ರವಾಗಿ ಬಾಧಿತ ಮರ (Severely affected palm)
ಇಡೀ ಮರದ ಎಲ್ಲ ಗರಿಗಳು ಬೋಳಾಗಿ ಒಣಗಿ ಹೋದ ಸ್ಥಿತಿ.
d) – Close-up – ಬಲೆ ಮತ್ತು ತೂತುಗಳು
ಎಲೆಯ ಮೇಲೆ ಬಿಳಿ ಬಣ್ಣದ ರೇಷ್ಮೆ ಬಲೆ, ಅದರೊಳಗೆ ಹುಳುವಿನ ಹಿಕ್ಕೆ ಮತ್ತು ದೊಡ್ಡ ತೂತುಗಳು. ಇದು ಈ ಕೀಟದ ಖಚಿತ ಗುರುತು.
e) – ಬಾಧಿತ ನರ್ಸರಿ ಸಸಿಗಳು
ನರ್ಸರಿಯಲ್ಲಿರುವ ಸಣ್ಣ ಅಡಿಕೆ ಸಸಿಗಳು ನೆಲಕ್ಕೆ ಬಿದ್ದು ಒಣಗಿರುವುದು.
f) & g) – ಮರಿಹುಳು (Larva)
ಎಲೆಯ ಒಳಗೆ ಬಲೆ ಕಟ್ಟಿಕೊಂಡು ತಿನ್ನುತ್ತಿರುವ ಹಸಿರು-ಹಳದಿ ಬಣ್ಣದ ಹುಳು.
h) – ಕೋಶಾವಸ್ಥೆ (Pupa)
ಹುಳು ಚಿಟ್ಟೆಯಾಗುವ ಮೊದಲು ಬಲೆಯೊಳಗೆ ಮಾಡಿಕೊಂಡ ಗೂಡು. ಸಣ್ಣ ಹಳದಿ ಬಣ್ಣದ್ದು.
i) – ವಯಸ್ಕ ಚಿಟ್ಟೆ (Adult moth) – Acria sp.
ಕಂದು ಬಣ್ಣದ ಸಣ್ಣ ಚಿಟ್ಟೆ, ಎಲೆಯ ಮೇಲೆ ಕೂತಿದೆ. ಇದೇ ತಾಯಿ ಚಿಟ್ಟೆ ಮೊಟ್ಟೆ ಇಡುವುದು.
ವಿಶೇಷ ವರದಿ:ಪ್ರವೀಣ್‌ ಚೆನ್ನಾವರ
