ಹರೀಶ್ ಪೂಂಜರೇ… ಒಂದು ವರ್ಷ ‘ಸುದ್ದಿ ಉದಯ’ ಪತ್ರಿಕೆ ನಡೆಸಿದ್ದಕ್ಕೆ ಅಭಿನಂದನೆಗಳು-ಪೂಂಜರೇ ಸುದ್ದಿ ಬಿಡುಗಡೆ ಪತ್ರಿಕೆ ಯಾರ ವಿರೋಧಿಯೂ ಅಲ್ಲ, ಯಾರ ಪರವೂ ಅಲ್ಲ. ನಿಷ್ಪಕ್ಷಪಾತ ಪತ್ರಿಕೆ ಎಂಬ ಬಗ್ಗೆ ನಿಮ್ಮನ್ನೂ ಸೇರಿಸಿ ಬಹಿರಂಗ ಚರ್ಚೆ ಇರಿಸೋಣವೇ?.

*ನಮ್ಮಲ್ಲಿದ್ದ 15 ಜನರಲ್ಲಿ 11 ಜನರನ್ನು ನೀವು ಹೈಜಾಕ್ ಮಾಡಿದ್ದರೂ ಸುದ್ದಿಬಿಡುಗಡೆ ಪತ್ರಿಕೆ ಮುಚ್ಚಲಿಲ್ಲ. ನಿಮ್ಮ ಪ್ರಯತ್ನ ಸಫಲವಾಗಲಿಲ್ಲ.
* ಮೊದಲಿಗಿಂತಲೂ ಹೆಚ್ಚು ಜನಪ್ರಿಯವಾಗಿ ಬೆಳೆದು ಬಂದಿದೆ. ಅದಕ್ಕಾಗಿ ಸಿಬ್ಬಂದಿಗಳಿಗೆ, ಜಾಹೀರಾತುದಾರರಿಗೆ, ಓದುಗರಿಗೆ, ಹಿತೈಷಿಗಳಿಗೆ ಕೃತಜ್ಞತೆಗಳು.
* ಪೂಂಜರೇ ಬೆಳ್ತಂಗಡಿ ಜನತೆಗೆ ನಿಮ್ಮ ಸುದ್ದಿ ಉದಯ ಪತ್ರಿಕೆ ಬೇಕೇ?, ಸುದ್ದಿ ಬಿಡುಗಡೆ ಬೇಕೇ? ಎಂಬ ಪ್ರಶ್ನೆಗೆ ಜನರಿಂದ ಉತ್ತರ ತಿಳಿಯುತ್ತೀರಾ?.
* ನಿಮ್ಮ ಪತ್ರಿಕೆಗಿಂತ ನಮ್ಮ ಸುದ್ದಿಬಿಡುಗಡೆ ಪತ್ರಿಕೆ 5-10 ಪಟ್ಟು ಹೆಚ್ಚು ಪ್ರಸಾರ ಹೊಂದಿರದಿದ್ದರೆ ಸುದ್ದಿ ಬಿಡುಗಡೆ ಪತ್ರಿಕೆ ನಿಲ್ಲಿಸಿ ಬಿಡುತ್ತೇನೆ.ಅದು ಹೌದಾದರೆ ನೀವು ಏನು ಮಾಡುತ್ತೀರಿ?.
* ನೀವು ಪತ್ರಿಕೆ ನಿಲ್ಲಿಸಬೇಕಾಗಿಲ್ಲ. ಸುದ್ದಿ ಬಿಡುಗಡೆ ಪತ್ರಿಕೆಗೆ ತೊಂದರೆ ಕೊಡುವುದನ್ನು ನಿಲ್ಲಿಸಬೇಕು ಮತ್ತು ಸುದ್ದಿ ಬಿಡುಗಡೆ ಪತ್ರಿಕೆ ಸರಿ ದಾರಿಯಲ್ಲಿದೆ ಎಂದು ಒಪ್ಪಿಕೊಂಡರೆ ಸಾಕು. ಈ ಮೇಲಿನ ಪಂಥಾಹ್ವಾನವನ್ನು ಸ್ವೀಕರಿಸುತ್ತೀರಾ?
* ಪೂಂಜರೇ… ಸುದ್ದಿ ಉದಯದ ಸಿಬಂದಿಗಳು ನಮ್ಮವರೆ.. ಉತ್ತಮ ಕೆಲಸಗಾರರು. ಅವರಿಗೆ ನಿಮ್ಮ ತಪ್ಪುಗಳನ್ನು, ನಿಮ್ಮ ವಿರೋಽಗಳ ಒಳಿತನ್ನು ಬರೆಯುವ ಪೂರ್ಣ ಅವಕಾಶ ನೀಡಿದ್ದರೆ ಸುದ್ದಿ ಉದಯ ಪತ್ರಿಕೆಯು ಸುದ್ದಿ ಬಿಡುಗಡೆಯನ್ನೂ ಮೀರಿ ಬೆಳೆಯುತ್ತಿತ್ತು.
* ಪಂಚಾಯತ್‌ನವರೇ ನಿಮ್ಮ ಪಂಚಾಯತ್ ವ್ಯಾಪ್ತಿಯಲ್ಲಿ, ಬೆಳ್ತಂಗಡಿ ತಾಲೂಕಿನಲ್ಲಿ ಅತೀ ಹೆಚ್ಚು ಜನರನ್ನು ತಲುಪುವ ಪತ್ರಿಕೆ ಸುದ್ದಿ ಬಿಡುಗಡೆಯಾಗಿದ್ದರೂ ಅದಕ್ಕೆ ಜಾಹೀರಾತು ಪ್ರಕಟಣೆಗೆ ನಿರಾಕರಣೆ ಮಾಡುವುದು, ಪೂಂಜರಿಗೆಂದೇ ಅವರ ಪತ್ರಿಕೆಗೆ ನೀಡುವುದು ಜನತೆಗೆ ಮಾಡುವ ಅನ್ಯಾಯವಲ್ಲವೇ? ಅದರ ವಿರುದ್ದ ಪ್ರತಿಭಟಿಸಿಯೇ ನ್ಯಾಯ ಪಡೆಯಬೇಕೇ?.

ಸುದ್ದಿಬಿಡುಗಡೆ ಪತ್ರಿಕೆ ಬೆಳ್ತಂಗಡಿಯಲ್ಲಿ 38 ವರ್ಷಗಳಿಂದ ನಡೆದುಬರುತ್ತಿದೆ. ಪೂಂಜರು ರಾಜಕೀಯಕ್ಕೆ ಬರುತ್ತಾರೆ ಎಂದು ಅವರಿಗಾಗಿ ಮಾಡಿದ ಪತ್ರಿಕೆ ಇದಲ್ಲ. ಬೆಳ್ತಂಗಡಿಯ ಜನತೆಗಾಗಿ ಮಾಡಿರುವ ಪತ್ರಿಕೆ ಇದು. ಪತ್ರಿಕೆ ತನ್ನ ಪರವಾಗಿ ಬರೆಯಬೇಕು, ತನ್ನ ವಿರೋಧಿಗಳ ಜಾಹೀರಾತು, ವರದಿ ಹಾಕಬಾರದು ಎಂದು ಪೂಂಜರು ಮಾಡಿರುವ ಒತ್ತಡಕ್ಕೆ ನಾವು ಮಣಿಯಲಿಲ್ಲ. ಅದಕ್ಕಾಗಿ ಸುದ್ದಿ ಬಿಡುಗಡೆಯನ್ನು ಶಾಶ್ವತವಾಗಿ ನಿಲ್ಲಿಸಲು ನಮ್ಮ 15 ಜನರಲ್ಲಿಯ 11 ಪ್ರಮುಖರನ್ನು ಹೈಜಾಕ್ ಮಾಡಿ ಪೂಂಜರು ತಮಗೆ ಬೇಕಾದಂತೆ ಬರೆಯುವ ಉದ್ದೇಶಕ್ಕಾಗಿ ಸುದ್ದಿ ಉದಯ ಪತ್ರಿಕೆ ಮಾಡಿದರು. ಆ ಘಟನೆ ನಡೆದು 1 ವರ್ಷ ಆಗುತ್ತಾ ಬಂದಿದೆ. ಪೂಂಜರು ನಮ್ಮ ಹಳೇಯ ತಂಡವನ್ನು ಕಟ್ಟಿಕೊಂಡು ಪತ್ರಿಕೆಯನ್ನು ನಡೆಸುತ್ತಿದ್ದಾರೆ. ಅವರ ಪತ್ರಿಕೋದ್ಯಮದ ಸಾಹಸಕ್ಕೆ ಅಭಿನಂದನೆ ಸಲ್ಲಲೇ ಬೇಕು.

ನಾವು ಕೇವಲ 4 ಜನರನ್ನು ಕಟ್ಟಿಕೊಂಡು ಹೊಸಬರನ್ನು ಸೇರಿಸಿಕೊಂಡು ಸುದ್ದಿಬಿಡುಗಡೆ ಪತ್ರಿಕೆಯನ್ನು ಮುಚ್ಚದೆ ಉಳಿಸಿಕೊಂಡಿದ್ದೇವೆ. ಪ್ರತೀ ವಾರ ನಡೆಸುತ್ತಾ ಬಂದಿದ್ದೇವೆ. ಓದುಗರಿಗೆ ಹಿಂದಿಗಿಂತ ಹೆಚ್ಚು ಸುಂದರವಾಗಿ, ನಿಷ್ಪಕ್ಷಪಾತವಾಗಿ ಪತ್ರಿಕೆ ನಡೆಸುತ್ತಿದ್ದೇವೆ. ಈ ಸಾಧನೆಗೆ ಸುದ್ದಿ ಹಳೇ ತಂಡಕ್ಕೆ, ಹೊಸಬರಿಗೆ, ಏಜೆಂಟರಿಗೆ, ಓದುಗರಿಗೆ, ಜಾಹೀರಾತುದಾರರಿಗೆ ಹೃದಯಾಂತರಾಳದ ಕೃತಜ್ಞತೆಯನ್ನು ಅರ್ಪಿಸುತ್ತಿದ್ದೇನೆ.

‘ಸುದ್ದಿ ಉದಯ’ದ ಪ್ರಾರಂಭದ ದಿವಸ ಪೂಂಜರು ಮಾಡಿದ ಭಾಷಣವನ್ನು ಇನ್ನೊಮ್ಮೆ ಬೆಳ್ತಂಗಡಿಯ ಜನತೆ ಕೇಳಬೇಕು. ಅಂದು ಅವರು ಜನರ ಪರವಾದ ಪತ್ರಿಕೆ ಬೆಳ್ತಂಗಡಿಗೆ ಅವಶ್ಯಕತೆ ಇದೆ ಎಂದು ಹೇಳಿದ್ದರು. ಅದರ ಅರ್ಥ ಅವರ ಪರ ಬರೆಯಬೇಕೆಂದೇ ಆಗಿತ್ತು. ಅದರ ನಂತರ ಪತ್ರಿಕಾ ದಿನಾಚರಣೆಯಂದು ‘ಸುದ್ದಿ ಬಿಡುಗಡೆ ಪತ್ರಿಕೆ ದಾರಿ ತಪ್ಪಿದೆ ಜನರು ನೋಡಿಕೊಳ್ಳುತ್ತಾರೆ’ ಎಂಬ ಬೆದರಿಕೆಯನ್ನೂ ನೀಡಿದ್ದರು. ಆ ವಿಷಯವನ್ನು ಮುಂದಿಟ್ಟು ಜನರ ಬಳಿ ಪೂಂಜರ ಪರವಾಗಿ ಬರೆಯುವ ಪತ್ರಿಕೆ ಬೇಕೇ?, ಜನರ ಪರವಾಗಿ ಬರೆಯುವ ಪತ್ರಿಕೆ ಬೇಕೇ? ಎಂಬ ಪ್ರಶ್ನೆಯನ್ನು ಜನರ ಮುಂದಿಟ್ಟು ಕೇಳಿದ್ದೆವು. ಅದಕ್ಕೆ ಜನರು ನಿಷ್ಪಕ್ಷಪಾತವಾಗಿ ಬರೆಯುವ ಪತ್ರಿಕೆ ಬೆಳ್ತಂಗಡಿಗೆ ಬೇಕು, ಯಾರ ಪರವಾಗಿಯೂ ಬರೆಯುವ ಪತ್ರಿಕೆ ಬೇಡ, ನಿಮ್ಮೊಂದಿಗೆ ನಾವಿದ್ದೇವೆ ಎಂದು ಹೇಳಿ ಪ್ರೋತ್ಸಾಹ ನೀಡಿದ್ದರು. ಆ ಪ್ರಶ್ನೆಯನ್ನು ಈಗಲೂ ಪೂಂಜರ ಮುಂದೆ ಇಡಲು ಬಯಸುತ್ತೇನೆ.

ತುಂಬಾ ಜನರಿಗೆ ಸುದ್ದಿ ಬಿಡುಗಡೆ ಪತ್ರಿಕೆ ಪ್ರಸಾರದ ಬಗ್ಗೆ ಅಪಪ್ರಚಾರದಿಂದಾಗಿ ಸರಿಯಾದ ಮಾಹಿತಿ ಇಲ್ಲ. ಸುದ್ದಿ ಬಿಡುಗಡೆ ಪತ್ರಿಕೆ ತಾಲೂಕಿನ ಎಲ್ಲಾ ಪತ್ರಿಕೆಗಳಿಗಿಂತ ಹೆಚ್ಚು ಪ್ರಸಾರ ಹೊಂದಿದೆ. ಸುದ್ದಿ ಉದಯ ಪತ್ರಿಕೆಗಿಂತ 5-10 ಪಟ್ಟು ಹೆಚ್ಚು ಪ್ರಸಾರವನ್ನು ಹೊಂದಿದೆ ಎಂದು ತಿಳಿಸಲು ಇಚ್ಚಿಸುತ್ತೇನೆ. ಅದು ಸುಳ್ಳಾಗಿದ್ದರೆ ಪತ್ರಿಕೆಯನ್ನೇ ನಿಲ್ಲಿಸಿಬಿಡುತ್ತೇನೆ ಎಂಬ ಪಂಥಾಹ್ವಾನವನ್ನು ಪೂಂಜರಿಗೆ ನೀಡುತ್ತಿದ್ದೇನೆ. ಅದು ಹೌದಾಗಿದ್ದರೆ ಪೂಂಜರು ಪತ್ರಿಕೆ ನಿಲ್ಲಿಸಬೇಕಾಗಿಲ್ಲ. ಸುದ್ದಿ ಬಿಡುಗಡೆ ಪತ್ರಿಕೆಯ ಬಗ್ಗೆ ಹೇಳಿದ ಮಾತನ್ನು ಹಿಂದಕ್ಕೆ ಪಡೆದುಕೊಂಡು ‘ಸುದ್ದಿ ಬಿಡುಗಡೆ ಪತ್ರಿಕೆ ಸರಿ ದಾರಿಯಲ್ಲಿದೆ’ ಎಂದು ಒಪ್ಪಿಕೊಂಡು ಸುದ್ದಿ ಬಿಡುಗಡೆಗೆ ನೀಡುತ್ತಿರುವ ತೊಂದರೆಗಳನ್ನು ನಿಲ್ಲಿಸಬೇಕೆಂದು ಅವರಲ್ಲಿ ವಿನಂತಿ ಮಾಡಿಕೊಳ್ಳುತ್ತಿದ್ದೇನೆ.

ಹರೀಶ್ ಪೂಂಜರ ಪ್ರಭಾವವಿರುವ ಕೆಲವು ಪಂಚಾಯತ್‌ಗಳು ತಮ್ಮ ವ್ಯಾಪ್ತಿಯಲ್ಲಿ ಅತೀ ಹೆಚ್ಚು ಪ್ರಸಾರದಲ್ಲಿರುವ ಸುದ್ದಿ ಬಿಡುಗಡೆ ಪತ್ರಿಕೆಗೆ ಜಾಹೀರಾತು ನೀಡದೆ ಪೂಂಜರ ಪತ್ರಿಕೆಗೆ ನೀಡುತ್ತಿದ್ದಾರೆ. ಅವರ ಪತ್ರಿಕೆಗೆ ನೀಡಲಿ ಆದರೆ ಅತೀ ಹೆಚ್ಚು ಪ್ರಸಾರವಿರುವ ನಮ್ಮ ಪತ್ರಿಕೆಗೆ ನೀಡದಿರುವುದು ಜನತೆಗೆ ಮಾಡಿದ ಅನ್ಯಾಯವಲ್ಲವೇ?. ಅದಕ್ಕಾಗಿ ಪಂಚಾಯತ್‌ನ ಎದುರು ಪ್ರತಿಭಟನೆ ಮಾಡಿಯೇ ನ್ಯಾಯವನ್ನು ಪಡೆಯಬೇಕೇ?. ಜನತೆಯಲ್ಲಿ ಕೇಳಲಿದ್ದೇವೆ.

ಸುದ್ದಿ ಬಿಡುಗಡೆ ಪತ್ರಿಕೆ ನಿಷ್ಪಕ್ಷಪಾತ ಪತ್ರಿಕೆಯಲ್ಲ, ಪೂಂಜರ ವಿರುದ್ಧ ಬರೆಯುವ ಪತ್ರಿಕೆ ಎಂಬ ಅಭಿಪ್ರಾಯ ಯಾರಲ್ಲಾದರು ಇದ್ದರೆ ಇಷ್ಟು ವರ್ಷಗಳ ಸುದ್ದಿ ಬಿಡುಗಡೆ ಪತ್ರಿಕೆಯನ್ನು ಅವರ ಸುದ್ದಿ ಉದಯ ಪತ್ರಿಕೆಯನ್ನು ಇಟ್ಟುಕೊಂಡು ಜನರ ಮುಂದೆ ವಿಮರ್ಶೆಗೆ ಇಡಲಿದ್ದೇವೆ. ಜನತೆ ನಮ್ಮ ತಪ್ಪುಗಳನ್ನು ತೋರಿಸಿಕೊಟ್ಟರೆ ಒಪ್ಪಿಕೊಂಡು ತಿದ್ದಿಕೊಳ್ಳುತ್ತೇವೆ ಎಂದು ತಿಳಿಸುತ್ತಾ ಪೂಂಜರು ಅಥವಾ ಯಾರೇ ಆದರೂ ನಮಗೆ ಎಷ್ಟೇ ತೊಂದರೆಗಳನ್ನು ಕೊಟ್ಟರೂ ವರದಿಯ ವಿಷಯಕ್ಕೆ ಬಂದಾಗ ನಾವು ಸತ್ಯ ವರದಿಯನ್ನೇ ಬರೆಯುತ್ತೇವೆ ಹೊರತು ದ್ವೇಷದಿಂದ ವರದಿ ಮಾಡುವುದಿಲ್ಲ ಎಂದು ಎಲ್ಲರಿಗೂ ತಿಳಿಸಲು ಇಚ್ಚಿಸುತ್ತೇನೆ.

ಪೂಂಜರೇ…ಕಳೆಂಜದಲ್ಲಿ ಪತ್ರಿಕೆಯ ಬಗ್ಗೆ ಚರ್ಚೆಗೆ ಆಹ್ವಾನ ನೀಡಿದ್ದೀರಿ. ಅದಕ್ಕೆ ಸ್ವಾಗತ ರಾಜಕೀಯ ನಿಮಗಿರಲಿ. ಪತ್ರಿಕೆ ನಮಗಿರಲಿ.
ಹರೀಶ್ ಪೂಂಜರೇ… ಕಳೆಂಜದಲ್ಲಿ ನಿಯಂತ್ರಣ ತಪ್ಪಿದ ವೀರೋಚಿತ ಎಂದು ತಾವು ಭಾವಿಸುವ ಭಾಷಣ ಮಾಡಿದ್ದೀರಿ. ಅಂತಹ ಮಾತುಗಳೇ ನಿಮ್ಮನ್ನು ಲಗಾಡಿ ತೆಗೆಯುತ್ತಿದೆ ಎಂದು ಹೇಳಿದರೂ ಅದರಲ್ಲಿರುವ ಒಳ್ಳೆಯ ವಿಷಯಗಳನ್ನು ಜನಪರ ಪತ್ರಿಕೆಯಾಗಿ ಸ್ವೀಕರಿಸುತ್ತೇವೆ.
ಸುದ್ದಿ ಬಿಡುಗಡೆಯ ವರದಿ ಉದ್ದೇಶದ ಬಗ್ಗೆ ದುರುದ್ದೇಶದ ಪ್ರಶ್ನೆಗಳನ್ನು ಕೇಳಿದ್ದೀರಿ. ಅದಕ್ಕೆ ಉತ್ತರಿಸುತ್ತೇವೆ. ಸುದ್ದಿಬಿಡುಗಡೆಯ ಮೇಲೆ ಆಪಾದನೆಗಳನ್ನು ಮಾಡಿದ್ದೀರಿ. ಅದನ್ನು ಸುಳ್ಳೆಂದು ಸಾಭೀತುಪಡಿಸುತ್ತೇವೆ. ನಮ್ಮ ತಪ್ಪಿದ್ದರೆ ಖಂಡಿತಾ ಕ್ಷಮೆಯಾಚಿಸುತ್ತೇವೆ.
ಜನತೆಯ ತೀರ್ಮಾನವೇ ನಮಗೆ ಅಂತಿಮ ಚರ್ಚೆಗೆ ದಿನಾಂಕ ಸಮಯ, ಸ್ಥಳ ನಿಗದಿಪಡಿಸಿರಿ. ಈ ಹಿಂದೆ ಹಲವು ಬಾರಿ ನಿಮ್ಮನ್ನು ಬಹಿರಂಗ ಚರ್ಚೆಗೆ ಕರೆದಾಗ ನಿರಾಕರಿಸಿದ್ದೀರಿ. ಈ ಸಲ ಒಪ್ಪಿಕೊಳ್ಳುವ ಧರ್ಯ ನಿಮಗೆ ಬಂದಿದೆ ಎಂದು ನಂಬಿದ್ದೇವೆ.
—-ಸುದ್ದಿ ಬಳಗ, ಬೆಳ್ತಂಗಡಿ