ಪುತ್ತೂರು-ಕಾಞಂಗಾಡ್ ರೈಲು ಮಾರ್ಗ ರಚನೆಗೆ ಆದ್ಯತೆ – ಪುತ್ತೂರು ಸಿಟಿಜನ್ಸ್ ಫಾರಮ್‌ನಿಂದ ಶಾಸಕರು,ಸರಕಾರಕ್ಕೆ ಮನವಿ

*ಪುತ್ತೂರು ವಿಧಾನಸಭಾ ಕ್ಷೇತ್ರಕ್ಕೆ ಹೆಚ್ಚು ಪ್ರಯೋಜನಕಾರಿ
*ಕಡಿಮೆ ವೆಚ್ಚದಾಯಕ, ಪುತ್ತೂರು ಜಂಕ್ಷನ್ ಆಗಬೇಕೆಂಬ ಬೇಡಿಕೆ
*ಕಾಣಿಯೂರು-ಕಾಞಂಗಾಡ್ ರೈಲು ಮಾರ್ಗ ನಿರ್ಮಾಣ ಹೆಚ್ಚುವೆಚ್ಚದಾಯಕ

ಪುತ್ತೂರು: ದಶಕಗಳಿಂದ ನೆನೆಗುದಿಗೆ ಬಿದ್ದಿದ್ದ ಸುಮಾರು 91 ಕಿ.ಮೀ ಉದ್ದದ, ಕಾಣಿಯೂರು-ಕಾಞಂಗಾಡು ನಡುವಣ ಹೊಸ ರೈಲು ಮಾರ್ಗ ನಿರ್ಮಾಣ ವಿಚಾರ ಮತ್ತೆ ಮುನ್ನಲೆಗೆ ಬಂದ ಬೆನ್ನಲ್ಲೇ ಇದೀಗ, ಪುತ್ತೂರು ವಿಧಾನಸಭಾ ಕ್ಷೇತ್ರದ ಪ್ರಮುಖ ನಗರದಲ್ಲಿ ಹಾದು ಹೋಗುವ ಪುತ್ತೂರು-ಕಾಂಞಂಗಾಡ್ ನಡುವಿನ 100 ಕಿ.ಮೀ.ಉದ್ದದ ರೈಲ್ವೇ ಮಾರ್ಗದ ಪ್ರಸ್ತಾಪವೂ ಮತ್ತೆ ಚಿಗುರೊಡೆದಿದೆ. ಪುತ್ತೂರು ವಿವೇಕಾನಂದ ಇಂಜಿನಿಯರಿಂಗ್ ಕಾಲೇಜು ಈ ಕುರಿತು ರಚಿಸಿರುವ ನೀಲನಕಾಶೆಯೊಂದಿಗೆ ಪುತ್ತೂರು ಸಿಟಿಜನ್ಸ್ ಫಾರಮ್ ಮೂಲಕ ಶಾಸಕರಿಗೆ ಮತ್ತು ಸರಕಾರಕ್ಕೆ ಮನವಿ ಸಲ್ಲಿಸಲಾಗಿದೆ.

ಕಾಣಿಯೂರು-ಕಾಞಂಗಾಡ್ ರೈಲು ಮಾರ್ಗ 91 ಕಿ.ಮೀ ಆಗಿದೆ. ಇದರಲ್ಲಿ ಕಾಞಂಗಾಡಿನಿಂದ ಮೀತ್, ಕೊಟ್ಟೋಡಿ, ಬಳಾಂತೋಡು, ಪಾಣತ್ತೂರು, ಕಲ್ಲಪಳ್ಳಿ, ಆಲೆಟ್ಟಿ, ಬೆಳ್ಳಾರೆ ಸುಳ್ಯದ ಮೂಲಕ ಕಾಣಿಯೂರಿನಲ್ಲಿ ಮಂಗಳೂರು-ಬೆಂಗಳೂರು ಹಳಿಯನ್ನು ಸಂಪರ್ಕಿಸಿ ರೈಲ್ವೆ ಸಂಪರ್ಕ ಸಾಧಿಸಲು ಯೋಜನೆ ರೂಪಿಸಲಾಗಿದೆ. ಆದರೆ ಪುತ್ತೂರು ವಿಧಾನಸಭಾ ಕ್ಷೇತ್ರ ವ್ಯಾಪ್ತಿಯಲ್ಲಿ ಈ ರೈಲು ಮಾರ್ಗ ಕಡಿಮೆ ಭಾಗವನ್ನು ಸಂಪರ್ಕಿಸುತ್ತದೆ. ಜೊತೆಗೆ ರೈಲು ಮಾರ್ಗದ ಸಂದರ್ಭದಲ್ಲಿ ಹಲವು ಪರಿಸೂಕ್ಷ್ಮಪ್ರದೇಶಕ್ಕೆ ಹಾನಿಯಾಗಲಿದೆ ಎಂಬ ಮಾಹಿತಿ ಇದೆ. ಪುತ್ತೂರು- ಕಾಞಂಗಾಡ್ ರೈಲು ಮಾರ್ಗ ಪುತ್ತೂರಿನಿಂದ ಪೂರ್ವಕ್ಕೆ ಬೆಂಗಳೂರಿಗೆ ಮತ್ತು ಪಶ್ಚಿಮಕ್ಕೆ ಮಂಗಳೂರಿಗೆ ಸಂಪರ್ಕ ಕಲ್ಪಿಸುತ್ತದೆ. ಪರಿಸರ, ಸಮಾಜದ ದೃಷ್ಟಿಯಿಂದ ಈ ಮಾರ್ಗವು ಆದ್ಯತೆಯಾಗಿದೆ ಮತ್ತು ಇದು ವ್ಯಾಪಾರ ಮಾರ್ಗವಾಗಿ ಬದಲಾಗುತ್ತದೆ. ಈ ಮಾರ್ಗದ ಉದ್ದ 103 ಕಿ.ಮೀ.,ಗರಿಷ್ಠ ಜನಸಂಖ್ಯೆ, ಪರಿಸರದ ಮೇಲೆ ಕಡಿಮೆ ಪರಿಣಾಮ,ನಿರ್ಮಾಣ ಸಾಮಗ್ರಿಗಳ ಸುಲಭ ಲಭ್ಯತೆ, ಕನಿಷ್ಠ ಏರಿಳಿತಗಳು, ವೆಚ್ಚ-ಪರಿಣಾಮಕಾರಿ ಆಗಿದೆ ಎಂದು ಮನವಿಯಲ್ಲಿ ತಿಳಿಸಿದ್ದಾರೆ.

ದೂರು ಹೆಚ್ಚಾದರೂ ನಿರ್ಮಾಣ ವೆಚ್ಚ ಕಡಿಮೆ: ಪುತ್ತೂರು ವಿಧಾನಸಭಾ ಕ್ಷೇತ್ರಕ್ಕೆ ಹೆಚ್ಚು ಪ್ರಯೋಜನ ಮತ್ತು ಆರ್ಥಿಕವಾಗಿ ಫಲಪ್ರದವಾಗಿರುವ ಈ ರೈಲು ಕೇರಳದಿಂದ ಕಾಸರಗೋಡು, ಚಳ್ಳಿಕೆರೆ, ಕೊಟ್ಟಿಕೋಲ್, ಬನ್ನಾರಕ್ಯಾ, ಬಾಲಕ್ಕ ಅಡ್ಕತೊಡಿ ಆಗಿ ಕರ್ನಾಟಕ ಗಡಿಗೆ ಬರುವಾಗ ಮುಳ್ಳೇರಿಯ, ನಾಟೆಕಲ್, ಏತಡ್ಕ, ಪೆರ್ಲ, ಅಡ್ಯನಡ್ಕ, ವಿಟ್ಲ, ಕಬಕ ಆಗಿ ಪುತ್ತೂರಿಗೆ ಸಂಪರ್ಕ ಆಗುತ್ತದೆ. ಜೊತೆಗೆ ಕಾಣಿಯೂರು – ಕಾಞಂಗಾಡು ರೈಲು ಮಾರ್ಗ ಮಾಡಲು ದಟ್ಟ ಮೀಸಲು ಕಾಡುಗಳು, ನದಿಗಳು ಮತ್ತು ಹೊಳೆಗಳ ಮೂಲ ಬಿಂದುಗಳು, ಕಡಿದಾದ ಇಳಿಜಾರಿನ ಬೆಟ್ಟಗಳು, ಬಂಡೆಗಳ ಹೊರ ಹರಿವುಗಳು, ಅಲೆಗಳಿರುವ ಭೂ ಪ್ರದೇಶವನ್ನೇ ಬಳಸಬೇಕಾಗುತ್ತದೆ ಮತ್ತು ನಿರ್ಮಾಣ ವೆಚ್ಚ ಹೆಚ್ಚು, ಆದರೆ ಪುತ್ತೂರು-ಕಾಞಂಗಾಡು ನಡುವಿನ ರೈಲು ಮಾರ್ಗ ನಿರ್ಮಾಣ ಕಡಿಮೆ ವೆಚ್ಚದಾಯಕ ಎಂದೂ ಪುತ್ತೂರು ಸಿಟಿಜನ್ಸ್ ಫಾರಮ್‌ನ ಹಿರಿಯ ವಕೀಲರಾದ ರಾಮ್‌ಮೋಹನ್ ರಾವ್ ಮತ್ತು ಪಿ.ಕೆ.ಸತೀಶನ್ ಅವರು ತಿಳಿಸಿದ್ದಾರೆ.

ಕಾಞಂಗಾಡ್ ಕೇರಳದ ಪಶ್ಚಿಮ ಕರಾವಳಿಯಲ್ಲಿದೆ. ಕೊಂಕಣ ರೈಲ್ವೆ ಈ ನಗರದ ಮೂಲಕ ಹಾದುಹೋಗುತ್ತದೆ. ಈ ಪ್ರದೇಶದ ಪ್ರಮುಖ ಬೆಳೆಗಳು ತೆಂಗಿನಕಾಯಿ, ರಬ್ಬರ್ ಮತ್ತು ಅಡಿಕೆ. ಸ್ಥಳಾಕೃತಿಯ ಅಧ್ಯಯನದ ಪ್ರಕಾರ ಪ್ರಸ್ತಾವಿತ ರೈಲು ಮಾರ್ಗ ಪ್ರದೇಶವು ಸೌಮ್ಯವಾದ ಇಳಿಜಾರಿನ ಬೆಟ್ಟಗಳನ್ನು ಹೊಂದಿದ್ದು, ಎರಡೂ ಬದಿಗಳಲ್ಲಿ ದಟ್ಟವಾದ ಸಸ್ಯವರ್ಗವನ್ನು ಹೊಂದಿದೆ. ಈ ಪ್ರದೇಶದಲ್ಲಿ ಚಂದ್ರಗಿರಿ ನದಿ ಬರಿದಾಗುತ್ತಿದೆ. ನದಿಯ ದಡದಲ್ಲಿ ಎತ್ತರವು ತುಲನಾತ್ಮಕವಾಗಿ ಕಡಿಮೆಯಾಗಿದೆ ಮತ್ತು ಕೆಲವು ಸ್ಥಳಗಳಲ್ಲಿ ಇದು ಲ್ಯಾಟರೈಟ್ ಮಣ್ಣು ಮತ್ತು ಬಂಡೆಗಳನ್ನು ಒಳಗೊಂಡಿದೆ.ಈ ಪ್ರದೇಶವನ್ನು(ಆಗ್ನೇಯ ಜಿಲ್ಲೆಗಳ ಕಡೆಗೆ) ರೈಲು ಮಾರ್ಗಕ್ಕಾಗಿ ಆಯ್ಕೆ ಮಾಡಬಹುದು
-ಪಿ.ಕೆ.ಸತೀಶನ್, ಹಿರಿಯ ವಕೀಲ

ಸ್ಥಳಾಕೃತಿಯ ವೈಶಿಷ್ಟ್ಯಗಳ ಆಧಾರದ ಮೇಲೆ ಪ್ರಸ್ತಾವನೆ 4, ಪ್ರಸ್ತಾವನೆ-3, ಪ್ರಸ್ತಾವನೆ-2 ನಿರ್ಮಾಣಕ್ಕೆ ತಾಂತ್ರಿಕವಾಗಿ ಸವಾಲಿನವು ಎಂದು ಗಮನಿಸಲಾಗಿದೆ. ಈ ಪ್ರದೇಶಗಳಲ್ಲಿ ಹಲವಾರು ಹೊಳೆಗಳು, ಕಡಿದಾದ ಇಳಿಜಾರು ಬೆಟ್ಟಗಳು ಮತ್ತು ದಟ್ಟ ಕಾಡುಗಳಿವೆ. ಈ ವಲಯಗಳಲ್ಲಿ ರೈಲು ಮಾರ್ಗಗಳನ್ನು ನಿರ್ಮಿಸಲು ವಿಶಾಲವಾದ ಅರಣ್ಯದ ನಷ್ಟವಾಗಬಹುದು ಮತ್ತು ಕಾಡು ಪ್ರಭೇದಗಳ ವಲಸೆಗೆ ಕಾರಣವಾಗಬಹುದು ಮತ್ತು ಪರಿಸರ ವ್ಯವಸ್ಥೆಯನ್ನು ಅಸಮತೋಲನಗೊಳಿಸುವ ಮೂಲಕ ಅಲ್ಲಿಗೆ ಹೋಗಬಹುದು.
-ರಾಮ್‌ಮೋಹನ್ ರಾವ್,
ಪಿ.ಕೆ.ಸತೀಶನ್

ನಾಲ್ಕು ಪ್ರಸ್ತಾವನೆ ಸಲ್ಲಿಕೆ
ಪುತ್ತೂರು ವಿವೇಕಾನಂದ ಇಂಜಿನಿಯರಿಂಗ್ ಕಾಲೇಜಿನಿಂದ, ಪುತ್ತೂರು-ಕಾಞಂಗಾಡು ರೈಲು ಮಾರ್ಗದ ಸರ್ವೆ ಮಾಡಿ ಮೂರು ನೀಲನಕಾಶೆ ಸಿದ್ದಪಡಿಸಿ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಕಾಣಿಯೂರು-ಕಾಞಂಗಾಡ್ ರೈಲು ಮಾರ್ಗದ ಕುರಿತು ಸರ್ವೆ ಮಾಡಿ ಸರಕಾರದಿಂದ ಪ್ರಸ್ತಾವನೆ ಸಲ್ಲಿಸಲಾಗಿದೆ. ಪ್ರಸ್ತಾವನೆ-1ರಲ್ಲಿ ಪುತ್ತೂರು-ಕಾಞಂಗಾಡು ರೈಲು 103 ಕಿ.ಮೀ ದೂರವನ್ನು ಒಳಗೊಂಡಿದ್ದರೂ, ಗರಿಷ್ಠ ಜನಸಂಖ್ಯೆ, ನಗರ ಒಟ್ಟುಗೂಡಿಸುವಿಕೆಗಳ ಅಭಿವೃದ್ಧಿ ಮತ್ತು ಬೆಳವಣಿಗೆಗೆ ಸೇವೆ ಸಲ್ಲಿಸುತ್ತದೆ ಮತ್ತು ಪರಿಸರದ ಮೇಲೆ ಪರಿಣಾಮವು ಕನಿಷ್ಠವಾಗಿರುತ್ತದೆ.ಆದ್ದರಿಂದ ಇದು ರೈಲು ಮಾರ್ಗ ನಿರ್ಮಾಣಕ್ಕೆ ಸೂಕ್ತವಾಗಿರುತ್ತದೆ.

ಪ್ರಸ್ತಾವನೆ-2ರಲ್ಲಿ ರೈಲು ಮಾರ್ಗ 85 ಕಿ.ಮೀ ಒಳಗೊಂಡಿದ್ದು, ಒಳನಾಡಿನ ಹಳ್ಳಿಗಳನ್ನು ಒಳಗೊಂಡಿದೆ, ಚದುರಿದ ಜನಸಂಖ್ಯೆಗೆ ಸೇವೆ ಸಲ್ಲಿಸುತ್ತದೆ, ಮೀಸಲು ಅರಣ್ಯ ಪ್ರದೇಶಗಳ ಮೂಲಕ ಮಾರ್ಗ ಹಾದುಹೋಗುತ್ತದೆ, ಒರಟಾದ ಸ್ಥಳಾಕೃತಿಯಿಂದಾಗಿ ನಿರ್ಮಾಣ ವೆಚ್ಚ ಹೆಚ್ಚು.
ಪ್ರಸ್ತಾವನೆ-3ರಲ್ಲಿ ರೈಲು ಮಾರ್ಗದ ಒಟ್ಟು ಉದ್ದ 71 ಕಿ.ಮೀ. (ಅಸ್ತಿತ್ವದಲ್ಲಿರುವ 16 ಕಿ.ಮೀ.), ಕೈಗಾರಿಕಾ ಪ್ರದೇಶ, ಪ್ರವಾಸಿ ತಾಣ, ಗಿರಿಧಾಮಗಳು, ದಟ್ಟವಾದ ಸಸ್ಯವರ್ಗ, ಪ್ರಮುಖ ಜೀವವೈವಿಧ್ಯ ಪ್ರದೇಶವನ್ನು ಒಳಗೊಂಡಿದೆ.
ಪ್ರಸ್ತಾವನೆ-4(ಕಾಣಿಯೂರು-ಕಾಞಂಗಾಡ್ ನಡುವಿನ ರೈಲು ಮಾರ್ಗ ರಚನೆಗೆ ಸರ್ಕಾರದ ಪ್ರಸ್ತಾವನೆ)ಯಂತೆ ದಟ್ಟ ಮೀಸಲು ಕಾಡುಗಳು, ನದಿಗಳು ಮತ್ತು ಹೊಳೆಗಳ ಮೂಲ ಬಿಂದುಗಳು, ಕಡಿದಾದ ಇಳಿಜಾರಿನ ಬೆಟ್ಟಗಳು, ಬಂಡೆಗಳ ಹೊರಹರಿವುಗಳು, ಅಲೆಗಳಿರುವ ಭೂಪ್ರದೇಶ, ನಿರ್ಮಾಣ ವೆಚ್ಚ ಹೆಚ್ಚು.