ಪುತ್ತೂರು: ಶ್ರೀರಾಮಕುಂಜೇಶ್ವರ ಪದವಿ ಪೂರ್ವ ಕಾಲೇಜಿನಲ್ಲಿ 77 ನೇ ಸ್ವಾತಂತ್ರ್ಯ ದಿನಾಚರಣೆ ನಡೆಯಿತು. ಸಂಸ್ಥೆಯ ಕಾರ್ಯದರ್ಶಿ ರಾಧಾಕೃಷ್ಣ ಕೆ ಎಸ್ ಧ್ವಜಾರೋಹಣಗೈದರು. ನಂತರ ನಡೆದ ಸಭಾ ಕಾರ್ಯಕ್ರಮದಲ್ಲಿ ಪ್ರಧಾನ ಭಾಷಣಕಾರರಾಗಿ ಆಗಮಿಸಿದ ವಿವೇಕಾನಂದ ಕಾಲೇಜಿನ ವಿಶ್ರಾಂತ ಪ್ರಾಂಶುಪಾಲ ಡಾ. ಎಚ್ ಮಾಧವ್ ಭಟ್ ‘ಸ್ವತಂತ್ರ ಭಾರತ-ಭವಿಷ್ಯ ಮತ್ತು ಸವಾಲುಗಳು’ ಎಂಬ ವಿಷಯವಾಗಿ ಮಾತನಾಡುತ್ತಾ ” ಭಾರತದ ಸ್ವಾತಂತ್ರ್ಯಕ್ಕಾಗಿ ಅನೇಕ ಜನರು ತಮ್ಮನ್ನು ತಾವು ಸಮರ್ಪಣೆಮಾಡಿದ್ದಾರೆ. ಇಂದಿನ ದಿವಸ ಇದು ಏಕೆ ಪ್ರಸ್ತುತ ಅಂತ ಕೇಳಿದರೆ, ಇಂಥವರ ಸಮರ್ಪಣೆಯನ್ನು ನೆನೆಯುವುದಕ್ಕಾಗಿ. ನಮ್ಮ ರಾಷ್ಟ್ರ ಅಂದಿನಿಂದ ಇಂದಿನವರೆಗೂ ಸಾಕಷ್ಟು ಸಾಧನೆಗೈಯ್ಯುವ ತಾಕತ್ತು ಇರುವಂತಹ ರಾಷ್ಟ್ರ. ನಮ್ಮ ರಾಷ್ಟ್ರದ ಜನರ ಕೊಡುಗೆ ವಿಶ್ವಮಟ್ಟದಲ್ಲಿ ಖಂಡಿತವಾಗಿಯೂ ಇದೆ. ಬಹಳಷ್ಟು ಸಾಮರ್ಥ್ಯವನ್ನು ಹುದುಗಿಸಿ ಇಟ್ಟುಕೊಂಡಿರುವಂತಹ ಭಾರತ,ವಾಸ್ತವದಲ್ಲಿ ಅದನ್ನ ಪ್ರಕಟಗೊಳಿಸುವಲ್ಲಿ ವಿಫಲವಾಗುತ್ತಾ ಇದೆ. ಇದು ನಮಗೆ ಸವಾಲೇ ಸರಿ. ಇದನ್ಪು ನಾವು ಮೀರಿ ನಿಲ್ಲಬೇಕಾಗಿದೆ. ಸ್ವಾಮಿ ವಿವೇಕಾನಂದರು ಹೇಳಿದಂತೆ ನಮ್ಮ ಯುವಕರಲ್ಲಿ ರಾಷ್ಟ್ರಕ್ಕಾಗಿ ಪುಟಿದೇಳುವ ಮನಸ್ಥಿತಿ ಜಾಗೃತವಾಗಬೇಕಾಗಿದೆ. ಯಾವಾಗ ರಾಷ್ಟ್ರದ ಯುವ ಜನತೆ ಸ್ವಯಂ ಜಾಗೃತಿಯಿಂದ ಕಾರ್ಯ ತತ್ಪರರಾಗುತ್ತಾರೋ ಆಗ ಆ ರಾಷ್ಟ್ರದ ಭವಿಷ್ಯ ಉಜ್ವಲವಾಗಿ ಬೆಳಗುತ್ತದೆ. ಒಂದು ಹೂದೋಟದಲ್ಲಿ ಅನೇಕ ಹೂವುಗಳಿದ್ದಾಗ ಎಷ್ಟು ಚೆನ್ನಾಗಿ ಕಾಣಿಸುತ್ತದೆಯೋ ಈ ರಾಷ್ಟ್ರದಲ್ಲಿ ವೈವಿಧ್ಯತೆ ಇರುವಂತಹ ಸತ್ಪ್ರಜೆಗಳು, ರಾಷ್ಟ್ರೀಯತೆಯನ್ನ ಮೈಗೂಡಿಸಿಕೊಂಡು ಕಾರ್ಯಯೋನ್ಮುಖರಾದಾಗ ಸುಂದರವಾದ ರಾಷ್ಟ್ರದ ನಿರ್ಮಾಣ ಖಂಡಿತವಾಗಿಯೂ ಆಗುತ್ತದೆ. ಈ ನಿಟ್ಟಿನಲ್ಲಿ ನಮ್ಮ ಯುವಕರು ಕೆಲಸ ಮಾಡಬೇಕಾಗಿದೆ” ಎಂದು ಕರೆಯನ್ನು ಕೊಟ್ಟರು.
ಸಮಾರಂಭದ ವಿಶೇಷ ಅತಿಥಿಯಾದ ಸಂಸ್ಥೆಯ ಹಿರಿಯ ವಿದ್ಯಾರ್ಥಿ, ಕಾಮಿಡಿ ಕಿಲಾಡಿಗಳು ಖ್ಯಾತಿಯ ದೀಕ್ಷಿತ್ ಬೀರಂತಡ್ಕ ಇವರು ಮಾತನಾಡಿ” ಯುವ ಜನತೆ ರಾಷ್ಟ್ರಭಕ್ತಿಯನ್ನು, ಹಿರಿಯರಿಗೆ ಗೌರವವನ್ನು ಕೊಡುವ ಮೌಲ್ಯಗಳನ್ನು ಅನುಸರಿಸಬೇಕು. ಗುರುಗಳಿಗೆ ಗೌರವವನ್ನು ಕೊಡುತ್ತಾ ಅವರು ಹೇಳಿಕೊಟ್ಟ ಪಾಠವನ್ನು, ಮೌಲ್ಯಗಳನ್ನು ಅನುಷ್ಠಾನಕ್ಕೆ ತಂದಾಗ ನಾವು ಈ ರಾಷ್ಟ್ರದ ಆಸ್ತಿಯಾಗುತ್ತೇವೆ. ಇದು ರಾಷ್ಟ್ರದ ಬೆಳವಣಿಗೆಗೆ ತುಂಬಾ ಸಹಕಾರಿಯಾಗಿದೆ” ಎಂದು ಸಂದೇಶವನ್ನು ನೀಡಿದರು.
ಸ್ವಾತಂತ್ರ್ಯೋತ್ಸವದ ಪ್ರಯುಕ್ತ ನಡೆದಿದ್ದ ವಿವಿಧ ಸಾಂಸ್ಕೃತಿಕ ಮತ್ತು ಆಟೋಟ ಸ್ಪರ್ಧೆಗಳ ವಿಜೇತರಿಗೆ ಬಹುಮಾನ ವಿತರಿಸಲಾಯಿತು.
ಸಮಾರಂಭದ ಅಧ್ಯಕ್ಷತೆಯನ್ನು ಆಡಳಿತ ಮಂಡಳಿಯ ಕಾರ್ಯದರ್ಶಿ ರಾಧಾಕೃಷ್ಣ ಕೆ ಎಸ್ ವಹಿಸಿದ್ದರು.
ಈ ಸಂದರ್ಭದಲ್ಲಿ ವೇದಿಕೆಯಲ್ಲಿ ರಕ್ಷಕ ಶಿಕ್ಷಕ ಸಂಘದ ಅಧ್ಯಕ್ಷ ಮಾಧವ್ ಭಟ್, ಹಿರಿಯ ವಿದ್ಯಾರ್ಥಿ ಸಂಘದ ಅಧ್ಯಕ್ಷ ಅಶೋಕ್ ಕುಮಾರ್ ಕೊಯ್ಲ ಪ್ರಾಂಶುಪಾಲ ಚಂದ್ರಶೇಖರ್ ಕೆ, ಮುಖ್ಯೋಪಾಧ್ಯಾಯ ಸತೀಶ್ ಭಟ್ ಉಪಸ್ಥಿತರಿದ್ದರು. ಸಂಸ್ಥೆಯ ಪರವಾಗಿ ಅತಿಥಿಗಳನ್ನು ಸನ್ಮಾನಿಸಲಾಯಿತು.
ಕಾಲೇಜಿನ ಪ್ರಾಂಶುಪಾಲ ಚಂದ್ರಶೇಖರ್ ಕೆ ಇವರು ಸ್ವಾಗತಿಸಿದರು. ಮುಖ್ಯ ಗುರುಗಳಾದ ಸತೀಶ್ ಭಟ್ ವಂದಿಸಿ, ಉಪನ್ಯಾಸಕ ಚೇತನ್ ಎಂ ಕಾರ್ಯಕ್ರಮ ನಿರೂಪಿಸಿದರು. ವಿದ್ಯಾರ್ಥಿನಿಯರಾದ ಹರ್ಷ ಮತ್ತು ಬಳಗ ಪ್ರಾರ್ಥಿಸಿದರು. ಉಪನ್ಯಾಸಕಿ ಮಲ್ಲಿಕಾ ಸಹಕರಿಸಿದರು. ಸಭಾ ಕಾರ್ಯ್ರಮದ ಬಳಿಕ ಸ್ವಾತಂತ್ರೋತ್ಸವದ ಪ್ರಯುಕ್ತ ಸಾಂಸ್ಕೃತಿಕ ಕಾರ್ಯಕ್ರಮ ಜರುಗಿತು.
