ಉಪ್ಪಿನಂಗಡಿ: ಇಲ್ಲಿನ ಗ್ರಾ.ಪಂ. ವ್ಯಾಪ್ತಿಯ ಉಪ್ಪಿನಂಗಡಿ – ಹಿರೇಬಂಡಾಡಿ ರಸ್ತೆಯ ಇಕ್ಕೆಲಗಳಲ್ಲಿದ್ದ ಗಿಡ-ಗಂಟಿಗಳನ್ನು ಉಪ್ಪಿನಂಗಡಿ ಗ್ರಾ.ಪಂ.ತೆರವುಗೊಳಿಸಿದೆ.
ಇಲ್ಲಿ ರಸ್ತೆಗೆ ತಾಗಿಕೊಂಡು ಗಿಡಗಂಟಿಗಳು ಬೆಳೆದಿದ್ದು, ವಾಹನ ಸವಾರರಿಗೆ ಹಾಗೂ ಪಾದಚಾರಿಗಳಿಗೆ ಇದರಿಂದ ಸಮಸ್ಯೆಯಾಗುತ್ತಿತ್ತು. ಇದನ್ನು ಮನಗಂಡ ಉಪ್ಪಿನಂಗಡಿ ಎರಡನೇ ವಾರ್ಡ್‌ನ ಬೂತ್ ಕಾಂಗ್ರೆಸ್ ಅಧ್ಯಕ್ಷ ಲತೀಫ್ ಡ್ರೈಫಿಶ್ ಅವರು ಈ ಬಗ್ಗೆ ಗ್ರಾ.ಪಂ.ಗೆ ಮನವಿ ನೀಡಿದ್ದರು. ಮನವಿಗೆ ಎರಡೇ ದಿನದಲ್ಲಿ ಗ್ರಾ.ಪಂ. ಸ್ಪಂದಿಸಿದ್ದು, ಗ್ರಾ.ಪಂ. ಸದಸ್ಯ ಯು.ಟಿ. ತೌಸೀಫ್ ಅವರ ಸಹಕಾರದೊಂದಿಗೆ ಗಿಡಗಂಟಿಗಳ ತೆರವು ಕಾರ್ಯ ನಡೆಯಿತು. ಈ ಸಂದರ್ಭ ಲತೀಫ್ ಡ್ರೈಫಿಶ್ ಕೂಡಾ ಸ್ಥಳದಲ್ಲಿದ್ದು, ಕೆಲಸಗಾರರಿಗೆ ಸೂಕ್ತ ಮಾರ್ಗದರ್ಶನ ನೀಡಿದರು.
