ಮಾನವನ ದೇಹದ ಅತ್ಯಂತ ಪ್ರಮುಖ ಮತ್ತು ಸೂಕ್ಷ್ಮ ಅಂಗಗಳಲ್ಲಿ ಶ್ವಾಸಕೋಶವೂ ಒಂದು. ಪ್ರತಿಯೊಂದು ಉಸಿರೂ ನಮಗೆ ಜೀವಚೈತನ್ಯವನ್ನು ನೀಡುತ್ತದೆ. ಆದರೆ, ಬದಲಾಗುತ್ತಿರುವ ಜೀವನಶೈಲಿ, ಮಾಲಿನ್ಯ ಮತ್ತು ದುರಭ್ಯಾಸಗಳಿಂದಾಗಿ ಇಂದು ಶ್ವಾಸಕೋಶಕ್ಕೆ ಸಂಬಂಧಿಸಿದ ಗಂಭೀರ ಕಾಯಿಲೆಗಳು ಹೆಚ್ಚಾಗುತ್ತಿದ್ದು, ಅದರಲ್ಲಿ ಅತ್ಯಂತ ಮಾರಕವಾದುದು ಶ್ವಾಸಕೋಶದ ಕ್ಯಾನ್ಸರ್. ಈ ಕುರಿತು ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸಲು, ರೋಗ ತಡೆಗಟ್ಟುವಿಕೆ ಮತ್ತು ಆರಂಭಿಕ ಪತ್ತೆಯ ಮಹತ್ವವನ್ನು ತಿಳಿಸಲು ಪ್ರತಿ ವರ್ಷ ಆಗಸ್ಟ್ 1 ರಂದು “ವಿಶ್ವ ಶ್ವಾಸಕೋಶ ಕ್ಯಾನ್ಸರ್ ದಿನ” ವನ್ನು ಆಚರಿಸಲಾಗುತ್ತದೆ.
ಕೇವಲ ಧೂಮಪಾನಿಗಳಿಗೆ ಮಾತ್ರವೇ? – ವೈಚಾರಿಕ ದೃಷ್ಟಿಕೋನ
ಅನೇಕರಲ್ಲಿ ಇರುವ ದೊಡ್ಡ ತಪ್ಪು ಕಲ್ಪನೆಯೆಂದರ ಶ್ವಾಸಕೋಶದ ಕ್ಯಾನ್ಸರ್ ಬರುವುದು ಧೂಮಪಾನ ಮಾಡುವವರಿಗೆ ಮಾತ್ರ ಎಂಬುದು. ಧೂಮಪಾನವೇ ಇದಕ್ಕೆ ಪ್ರಮುಖ ಕಾರಣ ಎಂಬುದು ನಿಜವಾದರೂ, ಧೂಮಪಾನ ಮಾಡದವರೂ ಸಹ ಈ ರೋಗಕ್ಕೆ ತುತ್ತಾಗುತ್ತಿದ್ದಾರೆ ಎಂಬುದು ಕಹಿ ಸತ್ಯ.
ಪರೋಕ್ಷ ಧೂಮಪಾನ : ಬೇರೆಯವರು ಬಿಡುವ ಸಿಗರೇಟ್ ಹೊಗೆಯನ್ನು ಸೇವಿಸುವುದರಿಂದಲೂ ಆಪ್ತರು ಮತ್ತು ಕುಟುಂಬಸ್ಥರು ಈ ಅಪಾಯಕ್ಕೆ ಒಳಗಾಗುತ್ತಿದ್ದಾರೆ.
ವಾಯು ಮಾಲಿನ್ಯ: ನಗರಗಳಲ್ಲಿ ಹೆಚ್ಚುತ್ತಿರುವ ವಾಹನಗಳ ಹೊಗೆ, ಕೈಗಾರಿಕಾ ಮಾಲಿನ್ಯ ಹಾಗೂ ವಿಷಕಾರಿ ರಾಸಾಯನಿಕಗಳ ಗಾಳಿಯನ್ನು ಉಸಿರಾಡುವುದು ಶ್ವಾಸಕೋಶಕ್ಕೆ ನಿರಂತರವಾಗಿ ಹಾನಿ ಮಾಡುತ್ತಿದೆ.
ಜೀವನಶೈಲಿ ಮತ್ತು ತಳಿವಿಜ್ಞಾನ: ವಂಶಪಾರಂಪರ್ಯ ಕಾರಣಗಳು ಮತ್ತು ಕೆಲಸದ ಸ್ಥಳಗಳಲ್ಲಿನ ಧೂಳು/ರಾಸಾಯನಿಕ ಸಂಪರ್ಕವೂ ಈ ಕ್ಯಾನ್ಸರ್‌ಗೆ ಕಾರಣವಾಗಬಹುದು.
ಚಿಂತನೀಯ ವಿಚಾರ:
ಪ್ರಕೃತಿ ನಮಗೆ ಶುದ್ಧ ಗಾಳಿಯನ್ನು ನೀಡಿದೆ, ಆದರೆ ಮಾನವ ತನ್ನ ಆಸೆ ಮತ್ತು ನಿರ್ಲಕ್ಷ್ಯದಿಂದ ಅದನ್ನು ಕಲುಷಿತಗೊಳಿಸಿ, ತಾನೇ ಕೃತಕವಾಗಿ ರೋಗಗಳನ್ನು ಆಹ್ವಾನಿಸಿಕೊಳ್ಳುತ್ತಿದ್ದಾನೆ. ಉಸಿರಾಡುವ ಗಾಳಿ ಶುದ್ಧವಾಗಿರಬೇಕಾದರೆ, ನಮ್ಮ ಪರಿಸರವೂ ಸ್ವಚ್ಛವಾಗಿರಬೇಕು.
ರೋಗಲಕ್ಷಣಗಳು ಮತ್ತು ಜಾಗೃತಿ
ಶ್ವಾಸಕೋಶದ ಕ್ಯಾನ್ಸರ್ ಆರಂಭಿಕ ಹಂತದಲ್ಲಿ ಗುರುತಿಸಲ್ಪಡದಿರುವುದು ಈ ಕಾಯಿಲೆಯ ಸವಾಲನ್ನು ಹೆಚ್ಚಿಸುತ್ತದೆ. ಆದ್ದರಿಂದ ಈ ಕೆಳಗಿನ ಲಕ್ಷಣಗಳನ್ನು ನಿರ್ಲಕ್ಷಿಸಬಾರದು.
ಮೂರು ವಾರಗಳಿಗಿಂತ ಹೆಚ್ಚು ಕಾಲ ನೀಡುವ ನಿರಂತರ ಕೆಮ್ಮು.ಕೆಮ್ಮುವಾಗ ರಕ್ತ ಬೀಳುವುದು.ಉಸಿರಾಟದ ತೊಂದರೆ ಅಥವಾ ಎದೆ ನೋವು. ಗಂಟಲಿನ ಶಬ್ದ ಬದಲಾಗುವುದು ಅಥವಾ ಸತತವಾಗಿ ಧ್ವನಿ ಗಾರೆಯಾಗುವುದು. ಕಾರಣವಿಲ್ಲದೆ ತೂಕ ಇಳಿಕೆಯಾಗುವುದು ಮತ್ತು ವಿಪರೀತ ಆಯಾಸ. ಇದಕ್ಕೆ ಮುನ್ನೆಚ್ಚರಿಕೆ ಮತ್ತು ಪರಿಹಾರ ನಮ್ಮ ಕೈಯಲ್ಲಿಯೇ ಇದೆ.
ಧೂಮಪಾನಕ್ಕೆ ಗುಡ್‌ಬೈ ಹೇಳಿ:
ಧೂಮಪಾನವನ್ನು ಸಂಪೂರ್ಣವಾಗಿ ತ್ಯಜಿಸುವುದು ನಿಮ್ಮ ಮತ್ತು ನಿಮ್ಮ ಕುಟುಂಬದ ಶ್ವಾಸಕೋಶದ ಆರೋಗ್ಯಕ್ಕೆ ಅತ್ಯುತ್ತಮ ಕೊಡುಗೆ.ಆಂಟಿ-ಆಕ್ಸಿಡೆಂಟ್‌ಗಳು ಸಮೃದ್ಧವಾಗಿರುವ ಹಣ್ಣು, ತರಕಾರಿಗಳನ್ನು ಸೇವಿಸುವುದು ಮತ್ತು ಪ್ರಾಣಾಯಾಮ, ಉಸಿರಾಟದ ವ್ಯಾಯಾಮಗಳನ್ನು ಅಭ್ಯಾಸ ಮಾಡುವುದು ಶ್ವಾಸಕೋಶದ ಸಾಮರ್ಥ್ಯವನ್ನು ಹೆಚ್ಚಿಸುತ್ತದೆ. ಅಪಾಯದ ಲಕ್ಷಣಗಳಿದ್ದಲ್ಲಿ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸಿ ಸೂಕ್ತ ತಪಾಸಣೆ ಮಾಡಿಸಿಕೊಳ್ಳುವುದರಿಂದ ಜೀವ ಉಳಿಸಬಹುದು.
ಗಿಡಮರಗಳನ್ನು ಬೆಳೆಸುವ ಮೂಲಕ ನಮ್ಮ ಸುತ್ತಮುತ್ತಲಿನ ಗಾಳಿಯ ಗುಣಮಟ್ಟವನ್ನು ಸುಧಾರಿಸಲು ಶ್ರಮಿಸೋಣ.ಉಸಿರು ನಿಂತರೆ ಜೀವನವೇ ನಿಲ್ಲುತ್ತದೆ. ಶ್ವಾಸಕೋಶದ ಆರೋಗ್ಯ ಕಾಪಾಡಿಕೊಳ್ಳುವುದು ಎಂದರೆ ನಮ್ಮ ಜೀವನವನ್ನು ಗೌರವಿಸುವುದು. ಈ ವಿಶ್ವ ಶ್ವಾಸಕೋಶ ಕ್ಯಾನ್ಸರ್ ದಿನದಂದು ದುರಭ್ಯಾಸಗಳಿಂದ ದೂರವಿದ್ದು, ಆರೋಗ್ಯಕರ ಜೀವನಶೈಲಿಯನ್ನು ಅಳವಡಿಸಿಕೊಳ್ಳುವ ಹಾಗೂ ಪ್ರಕೃತಿಯನ್ನು ರಕ್ಷಿಸುವ ಪ್ರತಿಜ್ಞೆ ಮಾಡೋಣ.
