ಪುತ್ತೂರು: ದ್ವಾರಕಾ ಕಾರ್ಪೋರೇಷನ್ ಪ್ರೈವೆಟ್ ಲಿಮಿಟೆಡ್ ಕಂಪೆನಿಯ ಅಂಗ ಸಂಸ್ಥೆಯಾದ ದ್ವಾರಕಾ ಪ್ರತಿಷ್ಠಾನದ ವತಿಯಿಂದ ಫೆ.16ರಂದು ಮುಕ್ರಂಪಾಡಿಯ ಗೋಕುಲ ಬಡಾವಣೆಯಲ್ಲಿ ನಡೆದ 5ನೇ ವರ್ಷದ ‘ದ್ವಾರಕೋತ್ಸವ’-2025 ಸನ್ಮಾನ, ಪ್ರತಿಭಾ ಪುರಸ್ಕಾರ, ದ್ವಾರಕಾ ಪ್ರಕಾಶನದಿಂದ ಹೊಸ ಪುಸ್ತಕಗಳ ಬಿಡುಗಡೆ, ವಿಚಾರಗೋಷ್ಠಿ, ಸಾಂಸ್ಕೃತಿಕ ಕಾರ್ಯಕ್ರಮಗಳೊಂದಿಗೆ ಮೇಳೈಸಿತು.
ಕಾರ್ಯಕ್ರಮವನ್ನ ದೀಪ ಬೆಳಗಿಸಿ ಉದ್ಘಾಟಿಸಿದ ಹಿರಿಯ ಆರ್ಥಿಕ ತಜ್ಞ ವಿಶ್ವೇಶ್ವರ ಭಟ್ ಬಂಗಾರಡ್ಕ ಮಾತನಾಡಿ, ಅರ್ಥಶಾಸ್ತ್ರದ ಪ್ರಕಾರ ಶ್ರೀಮಂತರು ದೇಶಕ್ಕೆ ದೊಡ್ಡ ಕೊಡುಗೆ ನೀಡಿದಂತೆ. ಕೋಟ್ಯಾಂತರ ರೂಪಾಯಿ ವ್ಯವಹಾರ ಮಾಡಿ ಉದ್ಯೋಗ ಸೃಷ್ಟಿಸಿ ಸಮಾಜಕ್ಕೆ ಕೊಡುಗೆ ನೀಡುವುದೂ ದೊಡ್ಡ ಸಮಾಜ ಸೇವೆಯಾಗಿದ್ದು ಯಾರೂ ಮಾಡದೇ ಈ ಸೇವೆ ಗೋಪಾಲಕೃಷ್ಣ ಭಟ್ ಮಾಡುವ ಜೊತೆಗೆ ಇನ್ನಷ್ಟು ಜನರಿಗೆ ಪ್ರೇರಣೆ ನೀಡಿದ್ದಾರೆ. ಕಾನೂನು ಬದ್ಧವಾಗಿ ಶ್ರೀಮಂತಿಕೆಯನ್ನು ಸಂಪಾದಿಸುವುದು ದೇಶಕ್ಕೆ ದೊಡ್ಡ ಆರ್ಥಿಕತೆ ನಿರ್ಮಿಸಿದಂತಾಗುತ್ತದೆ. ಕಾನೂನು ಬದ್ದವಾಗಿ ಸಂಪಾದಿಸಿ ಉದ್ಯೋಗ ನೀಡಿ, ತೆರಿಗೆ ಕಟ್ಟುವ ಮೂಲಕವೂ ದೇಶಕ್ಕೆ ಕೊಡುಗೆ ನೀಡಬಹುದು. ಶ್ರೀಮಂತರಾಗಿ ಸೇವೆಯ ಮೂಲಕ ಸಮಾಜಕ್ಕೆ ಕೊಡುಗೆ ನೀಡುವುದೂ ದೊಡ್ಡ ಸೇವೆ. ದ್ವಾರಕಾ ಸಂಸ್ಥೆಯ ಮುಖಾಂತರ ದೇಶ, ಸಮಾಜಕ್ಕೆ ಸಂಬಂಧಿಸಿದ ಹತ್ತಾರು ಕ್ಷೇತ್ರದಲ್ಲಿ ಸೇವೆಯ ಮೂಲಕ ಗೋಪಾಲಕೃಷ್ಣ ಭಟ್ ಶ್ರೀಮಂತಿಗೆಯನ್ನು ಸಮಾಜಕ್ಕೆ ಸದ್ವನಿಯೋಗ ಮಾಡುತ್ತಿದ್ದಾರೆ. ನಿಮ್ಮ ಸಾಧನೆಯು ಪುತ್ತೂರಿನ ಆಧುನಿಕ ಚರಿತ್ರೆಯಲ್ಲಿ ದ್ವಾರಕಾದ ಹೆಸರು ಅಜರಾಮರವಾಗಿರಲಿ ಎಂದರು.
ಮುಖ್ಯ ಅತಿಥಿಯಾಗಿದ್ದ ಮಕ್ಕಳ ತಜ್ಞರು, ಆಪ್ತ ಸಲಹೆಗಾರರಾಗಿರುವ ಡಾ.ಸುಲೇಖಾ ವರದರಾಜ್ ಮಾತನಾಡಿ, ದ್ವಾರಕಾ ಸಂಸ್ಥೆಯ ಮುಖಾಂತರ ಹಲವು ಮನೆ, ಮನಗಳನ್ನು ಒಂದು ಗೂಡಿಸಿರುವ ಕಾರ್ಯವು ಅತ್ಯಂತ ಗೌರವ ತಂದಿದೆ. ಬೆಳವಣಿಗೆ ಮತ್ತು ಅಭಿವೃದ್ಧಿಯ ಜೊತೆಗೆ ಸಮಾಜ ಸೇವೆಯ ಮೂಲಕ ಜೀವನದ ವಿಕಸವೂ ಮುಖ್ಯವಾಗಿದ್ದು ಅದನ್ನು ದ್ವಾರಕ ಸಂಸ್ಥೆಯು ಮಾಡಿ ತೋರಿಸಿದೆ. ಜೀವನದ ಅರ್ಥ ಉದ್ದೇಶ ಅರಿಚಯ ಮೂಡಿಸುವ ಜೊತೆಗೆ ಮಕ್ಕಳ ಪರಿಪೂರ್ಣ ವಿಕಸನಕ್ಕೆ ಪೂರಕವಾದ ಕಾರ್ಯವು ದ್ವಾರಕಾ ಪ್ರತಿಷ್ಠಾನದಿಂದ ನಡೆಯುತ್ತಿದೆ ಎಂದರು.
ಪುಸ್ತಕ ಬಿಡುಗಡೆ ಮಾಡಿದ ಸಾಹಿತಿಗಳು, ವಿವೇಕಾನಂದ ಮಹಾವಿದ್ಯಾಲಯದ ಪರೀಕ್ಷಾಂಗ ಕುಲಸಚಿವರಾದ ಡಾ.ಶ್ರೀಧರ ಎಚ್.ಜಿ ಮಾತನಾಡಿ, ಪುಸ್ತಕಗಳನ್ನು ಕೇವಲ ಲೋಕಾರ್ಪಣೆ ಮಾಡಿದರೆ ಸಾಲದ. ಅದನ್ನು ಖರೀದಿಸಿ ಓದುವುದು ಬಹುಮುಖ್ಯವಾಗಿದೆ. ಪ್ರಸ್ತುತ ಸನ್ನಿವೇಶದಲ್ಲಿ ಬರೆಯುವ ಕಲೆಯು ಮಾಸಿದೆ. ಎಲ್ಲವೂ ವಾಟ್ಸಪ್ ಸಂದೇಶದಲ್ಲಿ ಮುಗಿಯುತ್ತದೆ. ಆಯಾ ಕಾಲಕ್ಕೆ ತಕ್ಕಂತೆ ಕೃತಿ ಬಂದಾಗ ಅದಕ್ಕೆ ಹೆಚ್ಚು ಮೌಲ್ಯವಿರಲಿದೆ. ಆಯಾ ವಿಷಯಕ್ಕೆ ತಕ್ಕಂತೆ ಒಂದು ಗ್ರಂಥಾಲಯ ನಿರ್ಮಾಣವಾಗಬೇಕು. ಕಲಾ ಕ್ಷೇತ್ರದ ಅಧ್ಯಯನಕ್ಕೆ ಸಂಬಂಧಿಸಿ ವಿಶಿಷ್ಠ ಗ್ರಂಥಾಲಯ ಮಾಡಿದರೆ ಅಧ್ಯಯನಕ್ಕೆ ಅನುಕೂಲವಾಗಲಿದೆ. ಸಾಮಾಜಿಕ, ಸಾಹಿತ್ಯ ವಾಗಿ ತೊಡಗಿಸಿಕೊಂಡಿರುವ ದ್ವಾರಕ ಪ್ರತಿಷ್ಠಾನದ ಮೂಲಕ ಪುತ್ತೂರಿನ ಸಾಹಿತಿಗಳ ಕೃತಿಗಳು ಒಂದೇ ಕಡೆ ದೊರೆಯುವ ಕಾರ್ಯವಾಗಲಿ ಎಂದರು.
ಗ.ನಾ ಭಟ್ ರಚಿಸಿದ ಸತೀ ಸಾವಿತ್ರಿ ಪುಸ್ತಕದ ಪರಿಚಯ ಮಾಡಿದ ನರಿಮೊಗರು ಸರಸ್ವತಿ ವಿದ್ಯಾ ಮಂದಿರದ ಸಂಚಾಲಕ ಅವಿನಾಶ್ ಕೊಡಂಕಿರಿ ಮಾತನಾಡಿ, ಕಟ್ಟಡ ನಿರ್ಮಾಣದ ಜೊತೆಗೆ ಗೋಪಾಲಕೃಷ್ಣ ಭಟ್‌ರವರು ಸಮಾಜದ ನಿರ್ಮಾಣದಲ್ಲಿ ತೊಡಗಿಸಿಕೊಂಡಿರುವುದು ಪುತ್ತೂರಿನ ಭಾಗ್ಯ ಎಂದರು. ಗ.ನಾ ಭಟ್‌ರವರು ಸ್ವತಃ ಲೇಖಕರಾಗಿ ವಿಶ್ಲೇಷಣೆ ಮಾಡಿ ಸತೀ ಸಾವಿತ್ರಿ ಕೃತಿ ರಚಿಸಿದ್ದಾರೆ. ಕೃತಿಗೆ ನ್ಯಾಯ ಒದಗಿಸಿದ್ದಾರೆ. ಧೀರ ಮಹಿಳೆಯಾಗಿ, ಪರಮ ಪರಿವ್ರತೆಯಾಗಿರುವ ಸಾವಿತ್ರಿಯ ಎಲ್ಲಾ ಪಾತ್ರಗಳನ್ನು ಬಹಳಷ್ಟು ಸೊಗಸಾಗಿ ಕೃತಿಯಲ್ಲಿದ್ದು ಪ್ರತಿಯೊಬ್ಬರೂ ಈ ಕೃತಿಯನ್ನು ಓದಬೇಕು ಎಂದರು.
ಕೃಷ್ಣಮೂರ್ತಿ ಕೆಮ್ಮಾರರವರ ಪುರಾಣ ರಸಪ್ರಶ್ನಾವಲೀಯ ಪರಿಚಯ ಮಾಡಿದ ಯುವ ಬರಹಗಾರ ನವೀನಕೃಷ್ಣ ಎಸ್ ಉಪ್ಪಿನಂಗಡಿ ಮಾತನಾಡಿ, ಎಲ್ಲಾ ವಯೋಮಾನದವರಿಗೆ, ವಿದ್ಯಾರ್ಥಿಗಳಿಗೆ ಅನುಕೂಲವಗುವಂತೆ ವಿಮರ್ಷಾತ್ಮಕ ಮತ್ತು ನೈತಿಕ ಮೌಲ್ಯಗಳ ಸ್ಥೂಲ ಚಿತ್ರಣ ಕೃತಿಯಲ್ಲಿದೆ. ವಯಸ್ಸು ಹಾಗೂ ಓದಿನ ಅನುಭವವನ್ನು ಹೊಂದಿದೆ. ಮಕ್ಕಳಿಗೆ ರಸ ಪ್ರಸ್ನೆಗಳಿಗೆ ಸಂಬಂಧಿಸಿ ಅಧ್ಯಯನಕ್ಕೆ ಭದ್ರ ಬುನಾದಿಯಾಗಲಿದೆ. ಸಾಂಸ್ಕೃತಿಕ ಉದ್ದೀಪನ, ನೆನಪು ಶಕ್ತಿ, ಸಾಮಾನ್ಯ ಜ್ಞಾನ ವೃದ್ದಿಗೆ ಹಾಗೂ ಓದಿನಲ್ಲಿ ಅಸಕ್ತಿ ಮೂಡಿಸಲು ಸಹಕಾರಿಯಾಗಲಿದೆ ಎಂದರು.
ಮಿತ್ತೂರು ಬ್ರಹ್ಮಶ್ರೀ ಪುರೋಹಿತ ತಿಮ್ಮಯ್ಯ ಭಟ್ ಸಂಪ್ರತಿಷ್ಠಾನದ ಅಧ್ಯಕ್ಷ ರಮೇಶ್ ಭಟ್ ಬಿ. ಮಾತನಾಡಿ, ವೇದ ವಸಂತ ಮತ್ತು ವೇದ ಮಾಧವ ಕೃತಿಯುವ ಬಿಡುಗಡೆಯಾಗುವ ಮೂಲಕ ೫೯ ಗ್ರಂಥಗಳು ಬಿಡುಡಗೆಯಾಗಿದೆ. ಸಂಪ್ರತಿಷ್ಠಾನವು ವೈದ್ಯಕೀಯ ಶಿಬಿರ, ಕೋವಿಡ್ ಸಮಯದಲ್ಲಿ ಮನೆ ಮನೆಗೆ ಕಿಟ್ ಸೇರಿದಂತೆ ಹಲವು ರೀತಿಯ ಸಮಾಜ ಸೇವೆಯಲ್ಲಿ ತೊಡಗಿಸಿಕೊಂಡಿದೆ. ದ್ವಾರಕ ಪ್ರತಿಷ್ಠಾನದ ಮೂಲಕ ಇನ್ನಷ್ಟ ಕಾರ್ಯಕ್ರಮಗಳನ್ನು ನಡೆಸುವ ಆಶಯವಿದೆ ಎಂದರು.
ಕೃತಿಕಾರ ಕೃಷ್ಣ ಮೂರ್ತಿ ಕೆಮ್ಮಾರ ಮಾತನಾಡಿ, ಜೀವನದಲ್ಲಿ ನಮ್ಮ ಕಲಿಯುವಿಕೆಯು ನಿರಂತರವಾಗಿರಬೇಕು. ಪುಸ್ತಕದ ಮುಖಾಂತರ ಸಾಧಕರ ವಿಷಯಗಳ ಅನುಭವಕ್ಕೆ ಬರಲಿದೆ. ಪುಸ್ತಕ ಓದುವುದರಿಂದ ಭದ್ರ ಬುನಾದಿ ದೊರೆಯಲಿದ್ದು ನಮ್ಮ ಸಾಧನೆಯ ಯಶಸ್ಸಿನ ಹಾದಿಯಾಗಲಿದೆ ಎಂದರು. ಸತೀ ಸಾವಿತ್ರಿ ಕೃತಿಕಾರ ಗ.ನಾ ಭಟ್ಟ ಮೈಸೂರು ಮಾತನಾಡಿ, ಮನಸ್ಸು, ಮಾತು, ಕೃತಿ ಮೂರನ್ನು ಸತೀ ಸಾವಿತ್ರಿಯು ಅಭಿನ್ನವಾಗಿ ನಡೆದುಕೊಂಡಿರುವುದು ಕೃತಿಯಲ್ಲಿದೆ. ದ್ವಾರಕಾ ಪ್ರತಿಷ್ಠಾನದ ಗೋಪಾಲಕೃಷ್ಣ ಭಟ್‌ರವರ ಸೇವಾ ಕಾರ್ಯ ಶ್ಲಾಘನೀಯವಾಗಿದೆ. ಇವರು ವ್ಯವಹಾರದ ಜೊತೆಗೆ ಸಾಹಿತ್ಯ ಹಾಗೂ ಸಹೃದಯ ಗ್ರಾಹಕರನ್ನು ಒಟ್ಟು ಸೇರಿಸುತ್ತಿದ್ದಾರೆ. ಸಂಸ್ಕೃತ ಪಾಠ ಶಾಲೆ, ಯಕ್ಷಗಾನ ವಿದ್ಯಾಲಯ ಹಾಗೂ ವಿವಿಧ ಸಾಂಸ್ಕೃತಿ ಕಾರ್ಯಕ್ರಮ ನಡೆಸುತ್ತಿದ್ದಾರೆ. ಇಂತಹ ಕಾರ್ಯಕ್ರಮ ಇನ್ನಷ್ಟು ನಡೆದು ಸಮಾಜದ ಸರ್ವತೋಮಖ ಬೆಳವಣಿಗೆ ದ್ವಾರಕಾ ಪ್ರತಿಷ್ಠಾನದ ಕೊಡುಗೆಯಿರಲಿ ಎಂದರು.
ಅಧ್ಯಕ್ಷತೆ ವಹಿಸಿದ್ದ ದ್ವಾರಕಾ ಪ್ರರಿಷ್ಠಾನದ ಗೌರವಾಧ್ಯಕ್ಷ ಹರಿಕೃಷ್ಣ ಭಟ್ ಅರ್ತ್ಯಡ್ಕ ಮಾತನಾಡಿ, ದ್ವಾರಕ ಸಂಸ್ಥೆಯು ಮೊಳಕೆ ಒಡೆದ ಸಂದರ್ಭದಲ್ಲಿ ಕಾರ್ಯರೂಪಕ್ಕೆ ಬಂದ ಕೆಲಸ ಕಾರ್ಯಗಳು ಈಗ ಬೆಳೆದ ಹೆಮ್ಮರದ ಮರದ ರೂಪದಲ್ಲಿ ಎಲ್ಲರಿಗೂ ನೆರಳು, ಆಶ್ರಯ ನೀಡುತ್ತಿದೆ. ವಿದ್ಯಾಭ್ಯಾಸ, ಕಲೆ, ಉದ್ಯೋಗ ಸೇರಿದಂತೆ ಹಲವು ರೀತಿಯಲ್ಲಿ ಸಮಾಜದಲ್ಲಿ ತನ್ನದೇ ಕೊಡುಗೆ ನೀಡುತ್ತಿದೆ. ಸಂಸ್ಥೆಯು ಬೆಳೆದು ಇನ್ನಷ್ಟು ನಾನಾ ರೀತಿಯಲ್ಲಿ ಸಮಾಜ ಸೇವೆಯು ಈ ಸಂಸ್ಥೆಯ ಮೂಲಕ ನಡೆಯಲಿ ಎಂದರು.
ದ್ವಾರಕಾ ಪ್ರತಿಷ್ಠಾನದ ಅಧ್ಯಕ್ಷ ಗೋಪಾಲಕೃಷ್ಣ ಭಟ್ ಪ್ರಾಸ್ತಾವಿಕವಾಗಿ ಮಾತನಾಡಿ, ನಿರ್ಮಾಣ ಕ್ಷೇತ್ರದಲ್ಲಿ 2004-5ರಲ್ಲಿ ಪ್ರಾರಂಭವಾದ ನಮ್ಮ ಸಂಸ್ಥೆಯು ಪುತ್ತೂರು ಕೇಂದ್ರವಾಗಿಸಿಕೊಂಡು ದ.ಕ, ಕಾಸರಗೋಡು ವ್ಯಾಪ್ತಿಯಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಹಂತ ಹಂತವಾಗಿ ಬೆಳೆಯುವ ಜೊತೆಗೆ ಸಾಮಾಜಿಕ ಕೆಲಸವನ್ನು ಜೀವನದ ಅವಿಭಾಜ್ಯ ಅಂಗವಾಗಿ ನಡೆಸಲಾಗುತ್ತಿದೆ. 2019ರಲ್ಲಿ ಪ್ರತಿಷ್ಠಾನ ನೋಂದಾಯಿಸಿಕೊಂಡು ಕಳೆದ ಐದು ವರ್ಷಗಳಲ್ಲಿ ಸಾಮಾಜಿಕ ಚಟುವಟಿಕೆ ಹಾಗೂ 10ಕ್ಕೂ ಅಧಿಕ ಪುಸ್ತಕಗಳ ಬಿಡುಗಡೆ ಮಾಡಿದೆ. ಜೊತೆಗೆ ಕಲಾ ಕ್ಷೇತ್ರದಲ್ಲಿಯೂ ಕೊಡುಗೆ ನೀಡುತ್ತಿದ್ದು ದ್ವಾರಕ ಕಲಾ ಶಾಲೆಯೂ ಕಾರ್ಯನಿರ್ವಹಿಸುತ್ತಿದೆ. ದ್ವಾರಕಾ ಪ್ರತಿಷ್ಠಾನ, ನಿರ್ಮಾಣ ಸಂಸ್ಥೆ ಹಾಗೂ ಕಲಾ ಶಾಲೆಯವರನ್ನು ಒಟ್ಟು ಸೇರಿಸಿಕೊಂಡು ದ್ವಾರಕಾ ಗ್ರೂಪ್ ಆಫ್ ಕಂಪನಿಯ ವಾರ್ಷಿಕೋತ್ಸವವಾಗಿ ದ್ವಾರಕೋತ್ಸವವನ್ನು ಆಚರಿಸಲಾಗುತ್ತಿದೆ ಎಂದರು.
ಹೊಸ ಕೃತಿಗಳ ಬಿಡುಗಡೆ:
ವಿದ್ವಾನ್ ಗ.ನಾ ಭಟ್ ರವರ ಸತೀ. ಸಾವಿತ್ರಿ, ಕೃಷ್ಣಮೂರ್ತಿ ಕೆಮ್ಮಾರವರ ಪುರಾಣ ರಸ ಪ್ರಶ್ನಾವಲೀ, ಮಿತ್ತೂರು ಪುರೋಹಿತ ಶ್ರೀನಿವಾಸ ಭಟ್ಟ ಪರಿಷ್ಕರಣೆ ಮತ್ತು ಪರಿವರ್ಧನೆ ಮಾಡಿದ ವೇದವಸಮಂತ ಮತ್ತು ವೇದ ಮಾಧವ ಎಂಬ ಕೃತಿಗಳು ಕಾರ್ಯಕ್ರಮದಲ್ಲಿ ಬಿಡುಗಡೆಗೊಂಡಿತ್ತು.
ಸನ್ಮಾನ, ಪ್ರತಿಭಾ ಪುರಸ್ಕಾರ
ಸಾವಯವ ಕೃಷಿ ಕ್ಷೇತ್ರದ ಸಾಧಕ ಸುಬ್ರಹ್ಮಣ್ಯ ಭಟ್ಟ ನೆಕ್ಕರೆಕಳೆಯ, ಭಾರತೀಯ ಸೇನೆ, ಕೃಷಿ ಹಾಗೂ ಸಮಾಜ ಸೇವೆಯಲ್ಲಿ ಡಾ.ಗೋಪಾಲಕೃಷ್ಣ ಕಾಂಚೋಡು, ಯಕ್ಷಗಾನ ಹಿಮ್ಮೇಳದಲ್ಲಿ ಪದ್ಯಾಣ ಶಂಕರನಾಎಆಯಣ ಭಟ್ಟ, ವೈಜ್ಞಾನಿಕ ಸಂಶೋಧನಾ ಕ್ಷೇತ್ರದಲ್ಲಿ ಸ್ವಸ್ತಿಕ್ ಭಟ್ ಮುರ್ಗಜೆ, ಸಾಮಾಜಿಕ ಜಾಲತಾಣ ಹಾಗೂ ಆಹಾರೋದ್ಯಮದಲ್ಲಿ ಸುದರ್ಶನ ಭಟ್ಟ ಬೆದ್ರಡಿಯವರನ್ನು ಸನ್ಮಾನಿಸಲಾಯಿತು. ದ್ವಾರಕ ಕಲಾ ಶಾಲೆಯ ಮೂಲಕ ಕೀ.ಬೋರ್ಡ್, ಚೆಂಡೆ, ಮದ್ದಲೆ ತರಬೇತಿ ಪಡೆದ ಉತ್ತಮ ಅಂಕಗಳೊಂದಿಗೆ ಉತ್ತೀರ್ಣರಾದ ವಿದ್ಯಾರ್ಥಿಗಳಿಗೆ ಹಾಗೂ ರಾಮಾಯಣ, ಮಹಾಭಾರತ ಪರೀಕ್ಷೆಯಲ್ಲಿ ಅತ್ಯುತ್ತಮ ಅಂಕ ಪಡೆದ ವಿದ್ಯಾರ್ಥಿಗಳಿಗೆ ಪ್ರತಿಭಾ ಪುರಸ್ಕಾರ ನೀಡಿ ಗೌರವಿಸಲಾಯಿತು.
ದುರ್ಗಾ ಗಣೇಶ್ ಪ್ರಾರ್ಥಿಸಿದರು. ದ್ವಾರಕಾ ಪ್ರತಿಷ್ಠಾನದ ಕಾರ್ಯದರ್ಶಿ ಗಣರಾಜ್ಯ ಕುಂಬ್ಳೆ ಸ್ವಾಗತಿಸಿದರು. ಅಧ್ಯಕ್ಷ ಗೋಪಾಲಕೃಷ್ಣ ಭಟ್ ಅರ್ತ್ಯಡ್ಕ ಶಾಲು ಹಾಕಿ ಹಾಗೂ ಸ್ಮರಣಿಕೆ ನೀಡಿ ಸ್ವಾಗತಿಸಿದರು. ಅಮೃತ ಕೃಷ್ಣಾ ವಂದಿಸಿದರು. ನವೀನಕೃಷ್ಣಾ ಉಪ್ಪಿನಂಗಡಿ ಹಾಗೂ ಶ್ರೀದೇವಿ ಕಾರ್ಯಕ್ರಮ ನಿರೂಪಿಸಿದರು. ಸಂಸ್ಥೆಯ ಸಿಬಂದಿಗಳು ಸಹಕರಿಸಿದರು.
ಕೃಷಿ ಮತ್ತು ಆರ್ಥಿಕ ವಿಚಾರಗೋಷ್ಠಿ:
ಸಭಾ ಕಾರ್ಯಕ್ರಮದ ಬಳಿಕ ನಡೆದ ಕೃಷಿ ಮತ್ತು ಆರ್ಥಿಕ ವಿಚಾರಗೋಷ್ಠಿಯು ನಡೆಯಿತು. ಸಂಪನ್ಮೂಲ ವ್ಯಕ್ತಿಗಳಾಗಿದ್ದ ಗೋಪಾಲಕೃಷ್ಣ ಕಾಂಚೋಡು ಕೃಷಿಯಲ್ಲಿ ಅಡಿಕೆಗೆ ಪರ್ಯಾಯ, ವಿಶ್ವೇಶ್ವರ ಭಟ್ ಬಂಗಾರಡ್ಕರವರು ರಿಯಲ್ ಎಸ್ಟೇಟ್ ಮತ್ತು ಆರ್ಥಿಕತೆ ಹಾಗೂ ಸುಬ್ರಹ್ಮಣ್ಯ ಪ್ರಸಾದ ಭಟ್ಟ ನೆಕ್ಕರಕಳೆಯರವರು ದೇಶೀ ಗೋವು ಮತ್ತು ಗನ್ಯೋತ್ಪನ್ನಗಳ ಕುರಿತು ವಿಷಯ ಮಂಡಿಸಿದರು. ದ್ವಾರಕಾ ಪ್ರತಿಷ್ಠಾನದ ಅಧ್ಯಕ್ಷ ಗೋಪಾಲಕೃಷ್ಣ ಭಟ್ ಅಧ್ಯಕ್ಷತೆ ವಹಿಸಿದ್ದರು.
ಸಾಂಸ್ಕೃತಿಕ ಕಾರ್ಯಕ್ರಮ:
ಅಪರಾಹ್ನ ನಡೆದ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಬಾಬು ಕಾಟುಕುಕ್ಕೆ ಮತ್ತು ದ್ವಾರಕಾ ಕಲಾ ಶಾಲೆಯ ವಿದ್ಯಾರ್ಥಿಗಳಿಂದ ಕೀ-ಬೋರ್ಡ್ ವಾದನ, ಗಣರಾಜ ಕುಂಬ್ಳೆ ನಿರ್ದೇಶನದಲ್ಲಿ ಚೂಡಾಮಣಿ ಯಕ್ಷಗಾನ ತಾಳಮದ್ದಳೆ, ಸಂಜೆ ಆಯಾಭಟ ಪ್ರಶಸ್ತಿ ಪುರಸ್ಕೃತ ಗಾನಭೂಷಣ ವಿದ್ವಾನ ವೆಂಕಟಕೃಷ್ಣ ಭಟ್ ಗುಂಡ್ಯಡ್ಕ ಮತ್ತು ಬಳಗದವರಿಂದ ‘ಭಾವ ಗಾನ ಲಹರಿ’ ಹಾಗೂ ಮೂಕಾಂಬಿಕಾ ಕಲ್ಚರಲ್ ಅಕಾಡೆಮಿ ದೀಪಕ್ ಕುಮಾರ್ ಮತ್ತು ಶಿಷ್ಯರಿಂದ ಮಧುರಾಕೃತಿ-ಶ್ರೀಕೃಷ್ಣ ಲೀಲೆಗಳು ನೃತ್ಯರೂಪಕ ನಡೆಯಿತು.
