ಬಡಗನ್ನೂರು: ಭಾರೀ ಮಳೆಗೆ ಬಡಗನ್ನೂರು ಗ್ರಾಮದ ಸೇನೇರಮಜಲು ಎಂಬಲ್ಲಿ ಕುಡಿಯುವ ನೀರಿನ ಬಾವಿಯ ಕಟ್ಟೆಯು ನೀರೆಳೆಯುವ ರಾಟೆ ಸಮೇತ ಸಂಪೂರ್ಣವಾಗಿ ಕುಸಿದು ಮಣ್ಣುಪಾಲಾದ ಘಟನೆ ಸಂಭವಿಸಿದೆ.
4 ತಿಂಗಳ ಹಿಂದೆಯಷ್ಟೇ ನಿರ್ಮಿಸಲಾಗಿದ್ದ ಕಟ್ಟೆ:
ಬಡಗನ್ನೂರು ಗ್ರಾಮದ ಸೇನೇರಮಜಲು ಪುರಂದರ ರೖೆ ಮನೆಯ ಕುಡಿಯುವ ನೀರಿನ ಬಾವಿಗೆ 4 ತಿಂಗಳ ಹಿಂದೆಯಷ್ಟೇ ನಿರ್ಮಿಸಲಾಗಿದ್ದ ಕಟ್ಟೆ ಸುಮಾರು 10 ಅಡಿ ಆಳವನ್ನು ಹೊಂದಿರುವ ಈ ಬಾವಿಯ ಸುತ್ತಲಿನ ಮಣ್ಣು ಅತ್ಯಂತ ಮೃದುವಾಗಿದ್ದು, ಮಳೆಗಾಲದಲ್ಲಿ ಜರಿದು ಬೀಳಬಾರದೆಂಬ ಮುನ್ನೆಚ್ಚರಿಕೆಯಿಂದ ಕಳೆದ 4 ತಿಂಗಳ ಹಿಂದೆಯಷ್ಟೇ ಸೂಕ್ತ ತಡೆಗೋಡೆ ನಿರ್ಮಿಸಲಾಗಿತ್ತು. ಬಾವಿಯ ತಳಭಾಗದ ಗಟ್ಟಿ ಜಾಗದಿಂದ ಮೇಲ್ಭಾಗಕ್ಕೆ ಸುಮಾರು 8 ಅಡಿಯಷ್ಟು ಎತ್ತರಕ್ಕೆ ಸುತ್ತಲೂ ಕೆಂಪು ಕಲ್ಲಿನಿಂದ ಭದ್ರವಾಗಿ ಗೋಡೆ ಕಟ್ಟಿ, ಸುತ್ತಲೂ ಬಾವಿ ಕಟ್ಟೆಯನ್ನು ನಿರ್ಮಿಸಲಾಗಿತ್ತು. ಆದರೆ, ಜುಲೈ 31ರಂದು ಸುರಿದ ವಿಪರೀತ ಮಳೆಗೆ ಮಣ್ಣು ಸಡಿಲಗೊಂಡು, ಬಾವಿಯ ಕಟ್ಟೆ ಹಾಗೂ ನೀರೆಳೆಯುವ ರಾಟೆ ಸಮೇತ ಇಡೀ ನಿರ್ಮಾಣವು ಬಾವಿಯೊಳಗೆ ಕುಸಿದುಬಿದ್ದಿದೆ.
ಸುಮಾರು 2 ಲಕ್ಷ ರೂಪಾಯಿ ನಷ್ಟ:
ಬಾವಿಯ ಸುದೀರ್ಘ ಬಾಳಿಕೆಗಾಗಿ 8 ಅಡಿ ಎತ್ತರದ ಸುತ್ತುಗೋಡೆ ಹಾಗೂ ಮೇಲ್ಭಾಗದ ಕಟ್ಟೆಯ ನಿರ್ಮಾಣಕ್ಕಾಗಿ ಸುಮಾರು 1,300 ಕೆಂಪು ಕಲ್ಲುಗಳನ್ನು ಬಳಸಲಾಗಿತ್ತು. ಬಾವಿ ನಿರ್ಮಾಣವು ಅತ್ಯಂತ ನಾಜೂಕಿನ ಹಾಗೂ ಶ್ರಮದಾಯಕ ಕೆಲಸವಾಗಿದ್ದರಿಂದ ಕೂಲಿ ಮತ್ತು ಸಾಮಗ್ರಿಗಳಿಗಾಗಿ ಅಧಿಕ ವೆಚ್ಚ ತಗಲಿತ್ತು. ಇ
ದೀಗ ದಿಢೀರ್ ಕುಸಿತದಿಂದಾಗಿ ಅಂದಾಜು 2 ಲಕ್ಷ ರೂಪಾಯಿಗಳಷ್ಟು ಅಪಾರ ನಷ್ಟ ಸಂಭವಿಸಿದೆ ಎಂದು ತಿಳಿದುಬಂದಿದೆ.
ಮಳೆಗಾಲದ ಆರಂಭದಲ್ಲೇ ಕುಡಿಯುವ ನೀರಿನ ಬಾವಿ ಹೀಗೆ ಸಂಪೂರ್ಣ ಧರಾಶಾಹಿಯಾಗಿರುವುದರಿಂದ ಸ್ಥಳೀಯ ಕುಟುಂಬವು ನೀರಿನ ಅಭಾವ ಎದುರಿಸುವಂತಾಗಿದ್ದು, ಆತಂಕಕ್ಕೆ ಒಳಗಾಗಿದೆ.
