ಪ್ರಪಂಚದ ಬಹುಪಾಲು ವಸ್ತುಗಳು ಮತ್ತು ವ್ಯವಸ್ಥೆಗಳು ಬಲಗೈ ಬಳಕೆದಾರರಿಗೆ ಅನುಕೂಲವಾಗುವಂತೆ ವಿನ್ಯಾಸಗೊಂಡಿವೆ. ಈ ‘ಬಲಗೈ ಪ್ರಾಬಲ್ಯದ’ ಜಗತ್ತಿನಲ್ಲಿ ಎಡಗೈ ಬಳಸುವವರ ವಿಶಿಷ್ಟತೆ, ಅವರು ಎದುರಿಸುವ ಸವಾಲುಗಳು ಮತ್ತು ಅವರ ಪ್ರತಿಭೆಯನ್ನು ಗುರುತಿಸಲು ಹಾಗೂ ಅವರ ಕುರಿತಾದ ಮೂಢನಂಬಿಕೆಗಳನ್ನು ಹೋಗಲಾಡಿಸಲು ಪ್ರತಿ ವರ್ಷ ಆ: 13 ರಂದು ವಿಶ್ವ ಎಡಗೈ ಬಳಕೆದಾರರ ದಿನವನ್ನು ಆಚರಿಸಲಾಗುತ್ತದೆ. ಪ್ರಪಂಚದ ಒಟ್ಟು ಜನಸಂಖ್ಯೆಯಲ್ಲಿ ಕೇವಲ ಶೇ. 10 ರಿಂದ 12 ರಷ್ಟು ಜನರು ಮಾತ್ರ ಎಡಗೈ ಬಳಕೆದಾರರಾಗಿದ್ದಾರೆ.
ವೈಜ್ಞಾನಿಕ ಹಿನ್ನೆಲೆ – ಮೆದುಳಿನ ಅದ್ಭುತ ವಿನ್ಯಾಸ
ಎಡಗೈ ಬಳಕೆಯು ಕೇವಲ ಒಂದು ಅಭ್ಯಾಸವಲ್ಲ, ಇದರ ಹಿಂದೆ ಅತ್ಯಂತ ನಿಖರವಾದ ನರವಿಜ್ಞಾನ ಮತ್ತು ತಳಿಶಾಸ್ತ್ರದ ಕಾರಣಗಳಿವೆ. ಮಾನವನ ಮೆದುಳನ್ನು ಎಡ ಮತ್ತು ಬಲ ಗೋಳಾರ್ಧಗಳೆಂದು ವಿಂಗಡಿಸಲಾಗಿದೆ. ನಿಸರ್ಗದ ನಿಯಮದಂತೆ, ಮೆದುಳಿನ ಬಲ ಭಾಗವು ದೇಹದ ಎಡಭಾಗವನ್ನು ಮತ್ತು ಎಡ ಭಾಗವು ದೇಹದ ಬಲಭಾಗವನ್ನು ನಿಯಂತ್ರಿಸುತ್ತದೆ.
ಸೃಜನಶೀಲ ಬಲ ಮೆದುಳು – ಬಲಗೈ ಬಳಕೆದಾರರಲ್ಲಿ ಮೆದುಳಿನ ಎಡಭಾಗ ಸಕ್ರಿಯವಾಗಿದ್ದರೆ, ಎಡಗೈ ಬಳಕೆದಾರರಲ್ಲಿ ಮೆದುಳಿನ ಬಲ ಗೋಳಾರ್ಧವು ಹೆಚ್ಚು ಪ್ರಬಲವಾಗಿರುತ್ತದೆ. ವಿಜ್ಞಾನದ ಪ್ರಕಾರ ಬಲ ಮೆದುಳು ಮುಖ್ಯವಾಗಿ ಸೃಜನಶೀಲತೆ , ಕಲ್ಪನಾಶಕ್ತಿ , ಕಲೆ, ಸಂಗೀತ ಮತ್ತು ದೃಶ್ಯ-ಪ್ರಾದೇಶಿಕ ಸಾಮರ್ಥ್ಯಗಳಿಗೆ ಕೇಂದ್ರವಾಗಿದೆ.
ತಳಿಶಾಸ್ತ್ರ – ವಿಜ್ಞಾನಿಗಳ ಪ್ರಕಾರ ‘LRRTM1’ ನಂತಹ ಕೆಲವು ವಂಶವಾಹಿಗಳು ಮನುಷ್ಯ ಎಡಗೈ ಅಥವಾ ಬಲಗೈ ಬಳಕೆದಾರನಾಗುವುದನ್ನು ನಿರ್ಧರಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಅಂದರೆ, ಇದು ಗರ್ಭಾವಸ್ಥೆಯಲ್ಲಿಯೇ ಮೆದುಳಿನ ಬೆಳವಣಿಗೆಯ ಹಂತದಲ್ಲಿ ನಿರ್ಧಾರವಾಗುವ ನೈಸರ್ಗಿಕ ಪ್ರಕ್ರಿಯೆಯಾಗಿದೆ.
ಬಲಗೈ ಜಗತ್ತಿನಲ್ಲಿ ಎಡಗೈಯವರ ದೈನಂದಿನ ಸವಾಲುಗಳು
ನಾವು ಗಮನಿಸದಿರಬಹುದು, ಆದರೆ ಎಡಗೈ ಬಳಕೆದಾರರು ಈ ಜಗತ್ತಿನಲ್ಲಿ ಪ್ರತಿದಿನ ಸಣ್ಣಪುಟ್ಟ ಹೋರಾಟಗಳನ್ನು ಮಾಡಬೇಕಾಗುತ್ತದೆ.
ಉಪಕರಣಗಳ ವಿನ್ಯಾಸ – ಕತ್ತರಿ, ಕ್ಯಾನ್ ಓಪನರ್, ಕಂಪ್ಯೂಟರ್ ಮೌಸ್, ಕ್ಯಾಮೆರಾ ಬಟನ್‌ಗಳು, ಗಿಟಾರ್‌ನಂತಹ ವಾದ್ಯಗಳು, ವಾಹನಗಳ ಗೇರ್, ಮತ್ತು ಶಾಲೆಯಲ್ಲಿ ಡೆಸ್ಕ್‌ಗೆ ಅಳವಡಿಸಿರುವ ಕುರ್ಚಿಗಳು – ಇವೆಲ್ಲವೂ ಶೇ. 90ರಷ್ಟಿರುವ ಬಲಗೈ ಜನರನ್ನು ದೃಷ್ಟಿಯಲ್ಲಿಟ್ಟುಕೊಂಡು ತಯಾರಿಸಿದವುಗಳು. ಇವುಗಳನ್ನು ಬಳಸುವಾಗ ಎಡಗೈಯವರು ತೀವ್ರ ಮುಜುಗರ ಹಾಗೂ ಕಷ್ಟವನ್ನು ಎದುರಿಸುತ್ತಾರೆ.
ಬರವಣಿಗೆಯ ಸಮಸ್ಯೆ – ಎಡದಿಂದ ಬಲಕ್ಕೆ ಬರೆಯುವ ಭಾಷೆಗಳಲ್ಲಿ (ಉದಾಹರಣೆಗೆ: ಕನ್ನಡ, ಇಂಗ್ಲಿಷ್) ಎಡಗೈಯಿಂದ ಬರೆಯುವಾಗ ಕೈ ಮಸಿಗೆ ತಾಗುವುದು, ಪುಸ್ತಕದ ಬೈಂಡಿಂಗ್ ಅಡ್ಡಿಯಾಗುವುದು ಸಾಮಾನ್ಯ ಸಮಸ್ಯೆ. ಇತ್ತೀಚಿನ ದಿನಗಳಲ್ಲಿ ‘ಲೆಫ್ಟ್-ಹ್ಯಾಂಡೆಡ್ ಸ್ಟೋರ್ಸ್’ ಗಳು ಹುಟ್ಟಿಕೊಂಡಿದ್ದು, ಎಡಗೈ ಬಳಕೆದಾರರಿಗಾಗಿಯೇ ವಿಶೇಷವಾಗಿ ವಿನ್ಯಾಸಗೊಳಿಸಿದ ಕತ್ತರಿ, ಲೇಖನಿ, ಕೀಬೋರ್ಡ್ ಮುಂತಾದ ವಸ್ತುಗಳನ್ನು ಒದಗಿಸುತ್ತಿವೆ.
ಮೂಢನಂಬಿಕೆಗಳು ಮತ್ತು ಮಾನಸಿಕ ದೌರ್ಜನ್ಯ
ಇತಿಹಾಸದುದ್ದಕ್ಕೂ ಎಡಗೈ ಬಳಕೆಯನ್ನು ‘ಅಶುಭ’, ‘ಕೆಟ್ಟದ್ದು’ ಅಥವಾ ‘ದುರಾದೃಷ್ಟ’ ಎಂದು ಬಿಂಬಿಸಲಾಗಿತ್ತು. ಇಂಗ್ಲಿಷ್‌ನ “Sinister” (ಭಯಾನಕ/ದುಷ್ಟ) ಎಂಬ ಪದವು ಲ್ಯಾಟಿನ್ ಭಾಷೆಯಲ್ಲಿ ‘ಎಡ’ ಎಂಬ ಅರ್ಥವನ್ನೇ ಹೊಂದಿದೆ.
ನಮ್ಮ ಸಮಾಜದಲ್ಲಿ ಊಟ ಮಾಡಲು, ಪೂಜೆ ಮಾಡಲು ಅಥವಾ ಶುಭ ಕಾರ್ಯಗಳಲ್ಲಿ ಎಡಗೈ ಬಳಸಬಾರದು ಎಂಬ ಅವೈಜ್ಞಾನಿಕ ನಿಯಮಗಳಿವೆ. ಅನೇಕ ಪೋಷಕರು ಮತ್ತು ಶಿಕ್ಷಕರು ಹುಟ್ಟಿನಿಂದಲೇ ಎಡಗೈ ಬಳಸುವ ಮಕ್ಕಳನ್ನು ಬಲವಂತವಾಗಿ ಹೊಡೆದು, ಶಿಕ್ಷಿಸಿ ಬಲಗೈ ಬಳಸುವಂತೆ ಒತ್ತಾಯಿಸುತ್ತಿದ್ದರು. ಮಗುವಿನ ನೈಸರ್ಗಿಕ ಮೆದುಳಿನ ವಿನ್ಯಾಸಕ್ಕೆ ವಿರುದ್ಧವಾಗಿ ಬಲವಂತ ಮಾಡಿದಾಗ, ಮಕ್ಕಳಲ್ಲಿ ತೊದಲು ನುಡಿಯುವಿಕೆ, ಏಕಾಗ್ರತೆಯ ಕೊರತೆ, ಕಲಿಕಾ ನ್ಯೂನತೆ ಮತ್ತು ತೀವ್ರ ಮಾನಸಿಕ ಒತ್ತಡ ಉಂಟಾಗುತ್ತದೆ ಎಂದು ಮನಶ್ಶಾಸ್ತ್ರಜ್ಞರು ಎಚ್ಚರಿಸಿದ್ದಾರೆ.
ಎಡಗೈ ಬಳಕೆದಾರರ ವಿಶಿಷ್ಟ ಸಾಮರ್ಥ್ಯಗಳು
ಅನೇಕ ಕ್ಷೇತ್ರಗಳಲ್ಲಿ ಎಡಗೈ ಬಳಕೆದಾರರು ತಮ್ಮ ವಿಶಿಷ್ಟ ಸಾಮರ್ಥ್ಯವನ್ನು ಸಾಬೀತುಪಡಿಸಿದ್ದಾರೆ.ಕ್ರಿಕೆಟ್, ಟೆನ್ನಿಸ್, ಬಾಕ್ಸಿಂಗ್ ಮುಂತಾದ ಕ್ರೀಡೆಗಳಲ್ಲಿ ಎಡಗೈ ಆಟಗಾರರು ಎದುರಾಳಿಗಳಿಗೆ ಅನಿರೀಕ್ಷಿತ ಸವಾಲಾಗಿ ಪರಿಣಮಿಸುತ್ತಾರೆ. (ಉದಾ: ರಫೆಲ್ ನಡಾಲ್, ಬ್ರಿಯಾನ್ ಲಾರಾ). ಕ್ರೀಡಾಪಟುಗಳು ಸಾಮಾನ್ಯವಾಗಿ ಬಲಗೈ ಆಟಗಾರರನ್ನು ಎದುರಿಸಲು ಹೆಚ್ಚು ತರಬೇತಿ ಪಡೆದಿರುತ್ತಾರೆ, ಹೀಗಾಗಿ ಎಡಗೈಯವರಿಗೆ ನೈಸರ್ಗಿಕ ಲಾಭ ದೊರೆಯುತ್ತದೆ. ಇತಿಹಾಸದ ಅನೇಕ ಶ್ರೇಷ್ಠ ವ್ಯಕ್ತಿಗಳು ಎಡಗೈ ಬಳಕೆದಾರರಾಗಿದ್ದರು. ಲಿಯೊನಾರ್ಡೊ ಡಾ ವಿನ್ಸಿ, ಆಲ್ಬರ್ಟ್ ಐನ್ಸ್ಟೈನ್, ಮೇರಿ ಕ್ಯೂರಿ, ಚಾರ್ಲಿ ಚಾಪ್ಲಿನ್, ಅಮಿತಾಭ್ ಬಚ್ಚನ್ ಮುಂತಾದವರು ತಮ್ಮ ಸೃಜನಶೀಲತೆಯ ಮೂಲಕ ಜಗತ್ತನ್ನು ಬೆರಗುಗೊಳಿಸಿದ್ದಾರೆ.
ವೈಚಾರಿಕ ದೃಷ್ಟಿಕೋನ
ವೈಜ್ಞಾನಿಕ ದೃಷ್ಟಿಕೋನದಿಂದ ನೋಡಿದಾಗ, ಎಡಗೈ ಬಳಕೆಯು ಯಾವುದೇ ಕಾಯಿಲೆ, ನ್ಯೂನತೆ ಅಥವಾ ಅಶುಭ ಸಂಕೇತವಲ್ಲ. ಇದು ಮನುಕುಲದಲ್ಲಿ ಕಂಡುಬರುವ ಕಣ್ಣಿನ ಬಣ್ಣ ಅಥವಾ ಎತ್ತರದಷ್ಟೇ ಸಹಜವಾದ ನೈಸರ್ಗಿಕ ವೈವಿಧ್ಯತೆ. ಕೇವಲ ಬಹುಸಂಖ್ಯಾತರು ಬಲಗೈ ಬಳಸುತ್ತಾರೆ ಎಂಬ ಒಂದೇ ಕಾರಣಕ್ಕೆ ಅಲ್ಪಸಂಖ್ಯಾತ ಎಡಗೈ ಬಳಕೆದಾರರನ್ನು ಭಿನ್ನವಾಗಿ ಅಥವಾ ಕೀಳಾಗಿ ನೋಡುವುದು ಸಂಪೂರ್ಣ ಅವೈಜ್ಞಾನಿಕ. ವ್ಯವಸ್ಥೆಯು ಎಡಗೈ ಮಕ್ಕಳನ್ನು ಅವರ ಸಹಜ ಸ್ಥಿತಿಯಲ್ಲಿಯೇ ಮುಕ್ತವಾಗಿ ಒಪ್ಪಿಕೊಳ್ಳಬೇಕು. ಅವರನ್ನು ಬಲವಂತವಾಗಿ ಬದಲಾಯಿಸುವ ಬದಲು, ಅವರಿಗೆ ಅಗತ್ಯವಿರುವ ವಿಶೇಷ ಉಪಕರಣಗಳನ್ನು ಒದಗಿಸುವ ಮೂಲಕ ಸಮಾನ ಅವಕಾಶಗಳನ್ನು ಸೃಷ್ಟಿಸಬೇಕು. ಈ ನಿಟ್ಟಿನಲ್ಲಿ ಜಾಗೃತಿ ಮೂಡಿಸಲು ‘ವಿಶ್ವ ಎಡಗೈ ಬಳಕೆದಾರರ ದಿನ’ವು ಅತ್ಯಂತ ಪ್ರಸ್ತುತವಾಗಿದೆ.
